Read Akha 1 Saˬmeuˬlaˆ 18 Bible Online

1 Saˬmeuˬlaˆ 18 - Akha bible

1 Saˬmeuˬlaˆ 18

¹Sawˇluˆ hawˇ-eu Daˬbiˇ aˬ nyaꞈ dawˬ ngehˬ cawˬ gʼaˬ ngeh, Sawˇ luˆ-euˬ aˬ li Yawˇnaˆshaˬ gʼaˬ Daˬbiˇ-ahˇ nui kʼahˇ shiˇ dui dui-awˇ, yawˬ ha-euˬ gʼawˇ mawˇ-ahˇ gaˬ-eu loꞈ-ehˇ Daˬbiˇ-ahˇ gaˬ-euˬ meh.

²Kʼoeˇ ngeh nah neh aˇ dahˬ beh-awˇ, Daˬbiˇ-ahˇ Sawˇluˆ maˬ bi gʼoꞈ-iˇ ni, aˬ yawꞈ nehˬ-ehˇ bi jawˇ-euˬ meh.

³Yawˇnaˆshaˬ-aˬ, maˬ shiˇ tiˬ ziˇ Daˬbiˇ nehˬ-ehˇ cawˬ cawˬ daˆ leꞈ-eu gʼaˇ duˬ saˇ jaˇ dzaˬ-euˬ meh. Aˬ jeˬ miˇ neh ehˇ naˇ, Daˬbiˇ-ahˇ aˬ yawꞈ nui kʼahˇ shiˇ dui dui-eu meh.

⁴Yawˇnaˆshaˬ-aˬ, aˬ yawꞈ dm luꞈ-eu pehˇ kʼahˬ pehˇ mahˇ lehˆ-awˇ, Daˬbiˇ-ahˇ biꞈ-euˬ meh. Aˬ yawꞈ guiˇ deuˆ ngeh zmˬ-eu keu ka deuˬ pyeuꞈ-eu shmˇ mehˬ tsoeˬ, mi cehˇ, kaˆ, joꞈ paꞈ kʼoeˇ deuˬ kʼawꞈ, dawˬ tawˆ luꞈ Daˬbiˇ-ahˇ biꞈ nehˬ-euˬ meh.

⁵Sawˇluˆ neh kʼaˇ bi mˇ-euˬ jeˬ-ahˇ Daˬbiˇ mˇ pyeuꞈ nya-eu meh. Kʼoeˇ miˇ neh, Sawˇluˆ neh aˬ yawꞈ-ahˇ guiˇ maꞈ kʼoeˇ taˆ uˆ lahˇ-eu aˬ yuiꞈ tiˬ gʼaˬ bi geuꞈ-euˬ meh. Kʼoeˇ loꞈ-ehˇ bi geuꞈ-euˬ gaˇ, Sawˇluˆ-euˬ gaˇ mˇ-eu yaw huiˬ yaw mahˇ deuˬ hawˇ-eu, aˬ yawꞈ-euˬ tsawˇ haˬ deuˬ kʼawꞈ nui kʼahˇ shiˇ-eu meh.

⁶Daˬbiˇ Gawˇliˇyaˆ-ahˇ sehꞈ gʼaˬ-awˇ gʼoꞈ laˇ-eu loꞈ-ehˇ, yehˇ dawˬ tawˆ luꞈ kʼawꞈ yawˬ ha-euˬ nymˇ-ahˇ yawˬ ha gʼoꞈ laˇ luꞈ ngeh, Iˇsaˬleˬlaˆ miˇ kʼahˬ meuˬ yawˬ meuˬ na luꞈ laꞈ kʼoeˇ jawˇ-eu zaˬ miˬ zaˬ dawˬ tawˆ luꞈ, sahˬ paˬ Sawˇluˆ-ahˇ ha laˬ le-euˬ meh. Aˬ yawꞈ maꞈ laˬ kʼaˬ cehˇ-eu caˇ dawˬ caˇ-awˇ, tahˬ hawˇ-eu deuˇ-mˬ diˬ-awˇ gaˇ nyeh nyeh-eu meh.

⁷Zaˬ miˬ zaˬ kʼoeˇ deuˬ kʼoeˇ loꞈ-ehˇ bawˬ-iˬ gʼeh-eu laꞈ kʼoeˇ, “Sawˇluˆ aˇ heˇ gʼaˬ sehꞈ-awˇ, Daˬbiˇ aˇ muiˇ gʼaˬ sehꞈ-euˬ meh” lehˇ aˬ yawꞈ maꞈ caˇ-eu meh.

⁸Kʼoeˇ loꞈ-ehˇ caˇ gaˇ Sawˇluˆ maˬ naˇ haˬ nahˇ-ehˇ, nui ma pehˇ laˇ-euˬ meh. Aˬ yawꞈ ehˇ-eu, “Daˬbiˇ-ahˇ aˇ muiˇ gʼaˬ lehˇ aˬ yawꞈ maꞈ ehˇ-awˇ, ngaˬ-ahˇ aˇ heˇ gʼaˬ lehˇ tehꞈ-ehˇ aˬ yawꞈ maꞈ ehˇ-eu meh. Aˬ yawꞈ maꞈ aˬ yawꞈ-ahˇ sahˬ paˬ bi geuꞈ-eu lehˇ gʼeh-eu nga.”

⁹Kʼoeˇ ngeh nah neh naˇ, Daˬbiˇ-ahˇ aˬ yawꞈ myaˆ naˆ-euˬ meh.

¹⁰Yawˬ nah yawˬ keuˆ laˇ ngeh, Miˬyehˇ neh bi oe-euˬ haiˬ-eu yaw sahˇ Sawˇluˆ-ahˇ uˆ lahˇ le-awˇ, aˬ yawꞈ-euˬ nymˇ laꞈ kʼoeˇ tsawˇ uˬ tiˬ gʼaˬ loꞈ-ehˇ aˬ yawꞈ toˇ toˇ-ehˇ jawˇ-eu meh. Daˬbiˇ gʼaˬ aˬ myah myah loꞈ-ehˇ deuˇ-mˬ diˬ diˬ-ehˇ jawˇ-awˇ, Sawˇluˆ gʼaˬ gahˬ tiˬ kahˇ tuˆ tehˬ luꞈ-eu meh.

¹¹“Ngaˇ aˬ yawꞈ-ahˇ kaˇ pyawˇ-ahˇ joeˬ tsoˆ gʼeh ma” lehˇ Sawˇluˆ aˬ yawˇ yawꞈ ehˇ-awˇ, nyiˬ poˆ keuˆ ni Daˬbiˇ-ahˇ gahˬ neh joeˬ-euˬ meh. Ehˇ kʼawꞈ, nyiˬ poˆ luꞈ Daˬbiˇ awˆ yawˬ-euˬ meh.

¹²Daˬbiˇ-ahˇ Sawˇluˆ guˆ-eu meh. Aˬ jeˬ miˇ neh ehˇ naˇ, Daˬbiˇ nehˬ-ehˇ Sahˬpaˬ Miˬyehˇ jawˇ-awˇ, aˬ yawꞈ-ahˇ Sahˬpaˬ Miˬyehˇ byehˇ dzeh-euˬ meh.

¹³Kʼoeˇ miˇ neh, Daˬbiˇ-ahˇ aˬ yawꞈ jawˇ gaˇ neh bi doˆ-iˇ-awˇ, yehˇ tiˬ heˇ gʼaˬ kʼoeˇ taˆ haw-eu aˬ yuiꞈ bi geuꞈ-euˬ meh. Daˬbiˇ-aˬ, aˬ yawꞈ-euˬ yehˇ kʼoeˇ deuˬ sheuˬ-awˇ guiˇ deuˆ-iˇ-euˬ meh.

¹⁴Daˬbiˇ neh kʼaˇ mˇ kʼaˇ shaˇ-euˬ jeˬ huiˬ laˇ mahˇ laˇ luꞈ-eu meh. Aˬ jeˬ miˇ neh ehˇ naˇ, aˬ yawꞈ nehˬ-ehˇ Sahˬpaˬ Miˬyehˇ jawˇ-eu meh.

¹⁵Daˬbiˇ kʼoeˇ loꞈ-ehˇ mˇ pyeuꞈ shaˇ pyeuꞈ nya gaˇ Sawˇluˆ ya mawˇ ngeh, Daˬbiˇ-ahˇ paˇ guˆ dzehˬ laˇ-euˬ meh.

¹⁶Ehˇ kʼawꞈ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, Daˬbiˇ-ahˇ gaˬ-eu meh. Aˬ jeˬ miˇ neh ehˇ naˇ, aˬ yawꞈ-aˬ, kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ, mˇ pyeuꞈ shaˇ pyeuꞈ nya-eu aˬ yuiꞈ aˬ tsu tiˬ gʼaˬ pyeuꞈ-eu meh.

¹⁷“Ngaˬ-ahˇ saˇ jaˇ ziꞈ-eu yehˇ tiˬ gʼaˬ loꞈ-ehˇ, Sahˬpaˬ Miˬyehˇ gʼaˇ duˬ nawˇ kʼaˬ duˬ ni guiˇ deuˆ naˇ, ngaˬ buˇ aˬ yuiꞈ gʼaˬ pyeuꞈ-eu Meˬlaˇ nawˬ-ahˇ bi mˇ dzaˬ laˇ ma” lehˇ, Daˬbiˇ-ahˇ Sawˇluˆ ehˇ nehˬ-euˬ meh. Kʼoeˇ loꞈ-ehˇ jahˇ naˇ, Daˬbiˇ-ahˇ aˬ yawꞈ sehꞈ-eu maˬ loˬ-ehˇ, Piˇliˇtiˆ tsawˇ haˬ deuˬ neh bi deuˆ sehꞈ tehꞈ-a lehˇ Sawˇluˆ noeˬ-euˬ meh.

¹⁸Daˬbiˇ ehˇ-eu, “Sahˬ paˬ-euˬ aˬ zaˬ geuꞈ paˬ-ehˇ ngaˇ aˬ joˆ-ehˇ gʼeh-eu tsawˇ haˬ nga. Iˇsaˬleˬlaˆ miˇ kʼahˬ laꞈ kʼoeˇ ngaˬ da-euˬ nymˇ jiˇ aˬ jeˬ ehˇ nyaꞈ nyeuˆ ta.”

¹⁹Ehˇ kʼawꞈ, Meˬlaˇ gʼaˬ Daˬbiˇ-ahˇ ya mˇ dzaˬ-iˇ-eu aˇ yamˬ keuˆ laˇ ngeh, Meˬhawˇlaˬ meuˬ-ahˇ jawˇ-eu Aˬdaˬleˬlaˆ-ahˇ bi mˇ dzaˬ-iˇ-euˬ meh.

²⁰Sawˇluˆ-euˬ aˬ buˇ Miˇkaˬlaˇ gʼaˬ, Daˬbiˇ-ahˇ mawꞈ leˇ-eu meh. Gaˇ kawˆ kʼoeˇ Sawˇluˆ ya gaˬ ngeh, laꞈ kʼaˬ cehˇ-eu meh.

²¹“Miˇkaˬlaˇ-ahˇ gʼoe-awˇ Daˬbiˇ-ahˇ lahˇ ju kʼmˇ-eu laꞈ kʼoeˇ, Piˇliˇtiˆ tsawˇ haˬ deuˬ neh bi sehꞈ-eu gʼaˇ duˬ, Miˇkaˬlaˇ Daˬbiˇ-ahˇ bi mˇ dzaˬ-iˇ ma” lehˇ Sawˇluˆ noeˬ-euˬ meh. Kʼoeˇ naˇ, “Nawˇ ngaˬ-euˬ aˬ zaˬ ya geuꞈ meh” lehˇ, Daˬbiˇ-ahˇ aˬ yawꞈ tiˬ poˆ paˇ ehˇ nehˬ-euˬ meh.

²²Sawˇluˆ-euˬ gaˇ mˇ-eu yaw huiˬ yaw mahˇ deuˬ-ahˇ Sawˇluˆ heu loꞈ-ehˇ ehˇ nehˬ-euˬ meh. “Daˬbiˇ-ahˇ ciˬ cuˇ ni kuˇ-awˇ, heu loꞈ-ehˇ ehˇ nehˬ-awˬ. Sahˬ paˬ Sawˇluˆ nawˬ-ahˇ nui ma tsaˬ dui dui-awˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ kʼawꞈ nawˬ-ahˇ nui kʼahˇ shiˇ luꞈ meh. Teu miˇ neh sahˬ paˬ-euˬ aˬ buˇ-ahˇ nawˇ sheuˬ mawꞈ naˇ, nymˬ-mˇ aˇ yamˬ tsaˬ dui dui meh lehˇ ehˇ nehˬ-awˬ.”

²³Gaˇ kawˆ kʼoeˇ Daˬbiˇ-ahˇ aˬ yawꞈ maꞈ ehˇ nehˬ ngeh, “Ngaˇ loꞈ-ehˇ gʼeh-eu teˬ dui dui-eu yaw shaˬ zaˬ tiˬ gʼaˬ, sahˬ paˬ-euˬ zaˬ miˬ yuˇ-eu gʼaˇ duˬ maˬ awˬ-a” lehˇ Daˬbiˇ ehˇ-eu meh.

²⁴Daˬbiˇ kʼoeˇ loꞈ-ehˇ ehˇ-eu gaˇ kawˆ, Sawˇluˆ-ahˇ aˬ yawꞈ maꞈ paˇ tsaꞈ gaˬ nehˬ leˇ-euˬ meh.

²⁵Kʼoeˇ ngeh, “Sahˬ paˬ-euˬ aˬ buˇ-ahˇ sheuˬ-euˬ aˇ poeˬ sahˬ paˬ nawˬ-ahˇ shaˇ mawꞈ-eu jeˬ-aˬ, aˬ yawꞈ-ahˇ muiˇ-eu Piˇliˇtiˆ tsawˇ haˬ deuˬ-ahˇ nawˇ laꞈ poˆ poˆ nehˬ-eu laꞈ kʼoeˇ, Piˇliˇtiˆ tsawˇ haˬ deuˬ-euˬ baˆ kʼoˆ mehˬ dzaˬ tiˬ yaˇ hmˬ yuˇ kʼoꞈ nehˬ laꞈ naˇ gʼaˬ meh lehˇ, Daˬbiˇ-ahˇ naw maꞈ ehˇ nehˬ-awˬ” lehˇ, aˬ yawꞈ maꞈ-ahˇ Sawˇluˆ ehˇ nehˬ-euˬ meh. Daˬbiˇ-ahˇ Piˇliˇtiˆ tsawˇ haˬ deuˬ neh bi sehꞈ ni, Sawˇluˆ kʼoeˇ loꞈ-ehˇ tsawˇ gahˇ gahˇ-euˬ meh.

²⁶Sawˇluˆ-euˬ gaˇ mˇ-eu yaw huiˬ yaw mahˇ kʼoeˇ deuˬ, Sawˇluˆ neh ehˇ-euˬ dawˬ kʼoeˇ Daˬbiˇ-ahˇ dzawˇ nehˬ ngeh, sahˬ paˬ-euˬ aˬ zaˬ ya geuꞈ-eu dawˬ peh peh laˇ-euˬ miˇ neh, Daˬbiˇ laˬ kʼaˬ cehˇ-eu meh. Oeˇ mˇ baˇ-eu aˇ nah maˬ keuˆ laˇ mi naˆ-ehˇ,

²⁷Daˬbiˇ hawˇ-eu aˬ yawꞈ-eu tsawˇ haˬ deuˬ doˆ-iˇ-awˇ, Piˇliˇtiˆ tsawˇ haˬ nyiˬ yaˇ gʼaˬ-ahˇ sehꞈ-euˬ meh. Sahˬ paˬ-euˬ aˬ zaˬ ya geuꞈ ni, sahˬ paˬ jawˇ gaˇ baˆ kʼoˆ mehˬ dzaˬ kʼoeˇ deuˬ yuˇ gʼeh-awˇ gui nehˬ-euˬ meh. Kʼoeˇ naˇ, Sawˇluˆ neh Daˬbiˇ hawˇ-eu Miˇkaˬlaˇ aˬ nyaꞈ-ahˇ bi sheuˬ dahˬ dzaˬ-euˬ meh.

²⁸Daˬbiˇ nehˬ-ehˇ Sahˬpaˬ Miˬyehˇ jawˇ-eu gaˇ kawˆ hawˇ-eu, aˬ yawꞈ-euˬ aˬ buˇ Miˇkaˬlaˇ Daˬbiˇ-ahˇ aˬ diˇ aˬ maˇ gaˬ-eu gaˇ kawˆ-ahˇ SawˇLuˆ ya siˬ duˬ ngeh, Daˬbiˇ-ahˇ aˬ yawꞈ guˆ dzehˬ laˇ-awˇ, maˬ shiˇ tiˬ ziˇ muiˇ-euˬ meh.

³⁰Piˇliˇtiˆ tsawˇ haˬ deuˬ laˇ-awˇ guiˇ kʼaˇ deuˆ laˇ ngeh, Sawˇluˆ-euˬ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ naˆ maˬ tseˇ Daˬbiˇ guiˇ deuˆ gʼaˬ nya dzehˬ-eu miˇ neh, Daˬbiˇ tsawˇ myahˇ doˆ dui dui-eu meh.