Read Akha 1 Saˬmeuˬlaˆ 19 Bible Online

1 Saˬmeuˬlaˆ 19 - Akha bible

1 Saˬmeuˬlaˆ 19

¹Sawˇluˆ-aˬ, aˬ yawꞈ-euˬ aˬ li Yawˇnaˆshaˬ hawˇ-eu aˬ yawꞈ-eu gaˇ mˇ-eu yaw huiˬ yaw mahˇ deuˬ-ahˇ, Daˬbiˇ-ahˇ aˬ yawꞈ sehꞈ-eu lehˇ lehˬ hmˬ luꞈ-eu gaˇ kawˆ ehˇ mehˬ nehˬ-euˬ meh. Ehˇ kʼawꞈ, Yawˇnaˆshaˬ gʼaˬ Daˬbiˇ-ahˇ gʼoeˇ dui dui-eu meh.

²Kʼoeˇ miˇ neh, Daˬbiˇ-ahˇ Yawˇnaˆshaˬ ehˇ nehˬ-eu, “Ngaˬ da nawˬ-ahˇ sehꞈ-eu lehˇ gʼeh-eu meh. Nawˇ yahˇ pawˇ-eu laꞈ kʼoeˇ, ni shawˬ uˬ shawˬ paw tiˬ gaˇ cehˆ zaꞈ-iˇ-awˇ jawˇ-awˬ.

³Nawˇ dzuˇ zaꞈ luꞈ-eu deh ga-ahˇ ngaˬ da-euˬ dawˬ peh ngaˇ yawꞈ leˇ-awˇ, nawˬ-euˬ gaˇ kawˆ aˬ yawꞈ-ahˇ ngaˇ dzawˇ nehˬ ma. Kʼoeˇ naˇ, nawˬ-ahˇ kʼaˇ-ehˇ nehˬ paˬ-ehˇ gʼeh-eu jeˬ ngaˇ paˇ ehˇ gaˬ le ma.”

⁴Yawˇnaˆshaˬ-aˬ, aˬ yawꞈ-euˬ aˬ da Sawˇluˆ-ahˇ Daˬbiˇ gʼaˇ duˬ shaˇ ju-eu laꞈ kʼoeˇ, heu loꞈ-ehˇ ehˇ nehˬ-euˬ meh. “Sahˬ paˬ-oˇ, nawˬ-euˬ zaˬ kʼaˆ Daˬbiˇ kʼoeˇ taˆ nawˇ yaw lehˬ jeˬ taˬ mˇ nehˬ laꞈ. Nawˬ-euˬ kʼoeˇ taˆ aˬ yawꞈ neh mˇ taˬ-euˬ yaw lehˬ tiˬ jeˬ-iˬ maˬ jaˆ-a. Kʼoeˇ uˬ taꞈ, aˬ yawꞈ neh kʼaˇ mˇ-euˬ yawˬ jeˬ na luꞈ, nawˬ-ahˇ caw ba-eu jeˬ tehꞈ-ehˇ pyeuꞈ-eu meh.

⁵Aˬ yawꞈ-euˬ gʼawˇ mawˇ ya shiˇ gaˇ aˬ yawꞈ maˬ guˆ ni, Gawˇliˇyaˆ-ahˇ aˬ yawꞈ sehꞈ-eu laꞈ kʼoeˇ, Iˇsaˬleˬlaˆ tsawˇ jeuˬ gʼaˇ duˬ Sahˬpaˬ Miˬyehˇ guiˇ deuˆ gʼaˬ-euˬ meh. Kʼoeˇ loꞈ-ehˇ jahˇ-euˬ gaˇ ya mawˇ ngeh, nawˇ laˬ kʼaˬ cehˇ-euˬ meh. Toˆ-ehˇ ngeuˇ naˇ, nymˬ-mˇ tiˬ jeˬ-iˬ gaˇ kawˆ maˬ jaˆ gaˇ Daˬbiˇ-ahˇ nawˇ sehꞈ-eu laꞈ kʼoeˇ, mˇ lehˬ taˬ-euˬ jeˬ maˬ jaˆ-eu tsawˇ haˬ-ahˇ aˬ jeˬ miˇ neh yaw haiˬ jeˬ jahˇ nehˬ mawꞈ te.”

⁶Yawˇnaˆshaˬ neh ehˇ-euˬ dawˬ kʼoeˇ dawˬ Sawˇluˆ-euˬ nui ma-ahˇ zaw leˇ-awˇ, Daˬbiˇ-ahˇ aˬ yawꞈ maˬ paˇ sehꞈ ma lehˇ, Sahˬpaˬ Miˬyehˇ mehˬ shi kamˬ tsehˆ-euˬ meh.

⁷Kʼoeˇ naˇ, Yawˇnaˆshaˬ Daˬbiˇ-ahˇ kuˇ-awˇ, gaˇ kawˆ yawˬ jeˬ na luꞈ ja shaw nehˬ jiˇ-awˇ, Daˬbiˇ-ahˇ Sawˇluˆ jawˇ gaˇ paˇ sheuˬ kʼoꞈ gʼeh nehˬ-euˬ meh. Daˬbiˇ gʼeh yaw beh loꞈ-ehˇ sahˬ paˬ-euˬ gaˇ mˇ mˇ-ehˇ paˇ jawˇ-euˬ meh.

⁸Piˇliˇtiˆ tsawˇ haˬ deuˬ nehˬ-ehˇ guiˇ tiˬ poˆ paˇ deuˆ-eu laꞈ kʼoeˇ, Daˬbiˇ neh paˇ bi deuˆ gʼaˬ-awˇ, Piˇliˇtiˆ tsawˇ haˬ deuˬ cehˆ byaˆ jiˇ-euˬ meh.

⁹Tiˬ nah keuˆ laˇ ngeh, Sahˬpaˬ Miˬyehˇ neh bi oe-euˬ haiˬ-eu yaw sahˇ Sawˇluˆ-ahˇ paˇ uˆ lahˇ le-euˬ meh. Aˬ yawꞈ-euˬ nymˇ laꞈ kʼoeˇ gahˬ tuˆ tehˬ-awˇ aˬ yawꞈ nuiˇ luꞈ-eu meh. Daˬbiˇ gʼaˬ kʼawꞈ kʼoeˇ gaˇ deuˇ-mˬ diˬ luꞈ-eu meh.

¹⁰Kʼoeˇ ngeh, Sawˇluˆ gʼaˬ aˬ yawꞈ tuˆ tehˬ luꞈ-eu gahˬ neh Daˬbiˇ-ahˇ kaˇ pyawˇ-ahˇ joeˬ tsoˆ nehˬ-eu lehˇ leh jeh-euˬ meh. Ehˇ kʼawꞈ, Daˬbiˇ awˆ yawˬ-euˬ miˇ neh, gahˬ kʼoeˇ kahˇ tehꞈ-ehˇ kaˇ pyawˇ-ahˇ joeˬ tsoˆ taˬ-awˇ jaˆ-eu meh. Kʼoeˇ naˇ, Daˬbiˇ cehˆ byoˆ-awˇ, maˬ bi sehꞈ ni dzeuˇ-iˇ-euˬ meh.

¹¹Kʼoeˇ ngeh miˇ Sawˇluˆ tsawˇ haˬ pyehˬ gʼeh-awˇ, Daˬbiˇ-euˬ nymˇ-ahˇ bi loꞈ jawˬ-euˬ laꞈ kʼoeˇ, uˬ shawˬ paw Daˬbiˇ-ahˇ bi sehꞈ-eu lehˇ gʼeh-eu meh. “Nymˇ ciꞈ nawˇ maˬ cehˆ dzeuˇ nya naˇ, ni shawˬ nah ya shiˇ meh” lehˇ, Daˬbiˇ-ahˇ aˬ yawꞈ-euˬ miˬ zaˬ Miˇkaˬlaˇ ehˇ nehˬ-euˬ meh.

¹²Miˇkaˬlaˇ neh Daˬbiˇ-ahˇ laˇ gʼoˆ gʼoˆ zaˬ-ahˇ neh pyehˬ ka nehˬ-awˇ, bi cehˆ dzeuˇ-euˬ meh.

¹³Kʼoeˇ naˇ, ja ciˬ kʼoeˇ taˆ tahˬ pahˬ aˬ ma mawˇ kawˇ tiˬ hmˬ Miˇkaˬlaˇ baꞈ yuꞈ-awˇ, uˬ duˬ-ahˇ ciꞈ myehꞈ caꞈ hm uˬ gʼmˬ yuˇ taˬ-awˇ, aˇ bui sheu dm taˬ-euˬ meh.

¹⁴Sawˇluˆ-euˬ tsawˇ haˬ deuˬ Daˬbiˇ-ahˇ nyehꞈ laˇ ngeh, Daˬbiˇ jawˇ saˇ maˬ doˆ-a lehˇ aˬ yawꞈ maꞈ-ahˇ Miˇkaˬlaˇ ehˇ nehˬ-euˬ meh.

¹⁵Ehˇ kʼawꞈ, Sawˇluˆ neh aˬ yawꞈ-euˬ tsawˇ haˬ deuˬ-ahˇ Daˬbiˇ jawˇ gaˇ paˇ bi iˇ-awˇ, “Ja ciˬ ciˬ lah-ehˇ heu gaˇ baꞈ kʼoꞈ laꞈ-awˬ. Aˬ yawꞈ-ahˇ ngaˇ sehꞈ ma” lehˇ dawˬ biꞈ-euˬ meh.

¹⁶Aˬ yawꞈ maꞈ naˬ suˬ laꞈ kʼoeˇ uˇ leˇ haw ngeh, ja ciˬ kʼoeˇ taˆ tahˬ pahˬ aˬ ma mawˇ kawˇ baꞈ yuꞈ taˬ-awˇ, uˬ duˬ-ahˇ ciꞈ myehꞈ caꞈ hm uˬ gʼmˬ yuˇ taˬ-awˇ bi jaˆ gaˇ ya mawˇ-euˬ meh.

¹⁷“Aˬ jeˬ miˇ neh nawˇ ngaˬ-ahˇ teu loꞈ-ehˇ tsawˇ gahˇ gahˇ-awˇ, ngaˬ-ahˇ muiˇ-eu tsawˇ haˬ bi cehˆ dzeuˇ te” lehˇ Miˇkaˬlaˇ-ahˇ Sawˇluˆ ehˇ nehˬ ngeh, “Aˬ yawꞈ ya cehˆ dzeuˇ ni maˬ caw ba nehˬ naˇ, ngaˬ-ahˇ aˬ yawꞈ sehꞈ ma lehˇ lmˬ-eu miˇ neh heu loꞈ-ehˇ jahˇ-euˬ ma” lehˇ, Miˇkaˬlaˇ ehˇ kʼoꞈ nehˬ-euˬ meh.

¹⁸Daˬbiˇ cehˆ dzeuˇ-awˇ, Laˬmahˇ meuˬ-ahˇ Saˬmeuˬlaˆ jawˇ gaˇ le-awˇ, Sawˇluˆ neh aˬ yawꞈ-ahˇ kʼaˇ jahˇ nehˬ-euˬ jeˬ dawˬ tawˆ luꞈ dzawˇ nehˬ-euˬ meh. Kʼoeˇ naˇ, Saˬmeuˬlaˆ aˬ yawꞈ nyaꞈ Naˬiˇyoˆ pu-ahˇ iˇ-awˇ jawˇ-euˬ meh.

¹⁹Laˬmahˇ gahˬ kaˬ laꞈ kʼoeˇ jaˆ-eu Naˬiˇyoˆ pu-ahˇ Daˬbiˇ jawˇ luꞈ-eu gaˇ kawˆ, Sawˇluˆ-ahˇ aˬ cawˬ tsaꞈ gaˬ-euˬ meh.

²⁰Kʼoeˇ ngeh, Daˬbiˇ-ahˇ bi nyehꞈ-iˇ-eu gʼaˇ duˬ, Sawˇluˆ tsawˇ haˬ pyehˬ gʼeh-euˬ meh. Saˬmeuˬlaˆ aˬ yuiꞈ geuꞈ-awˇ, Miˬyehˇ gʼaˇ duˬ ngehˬ dah-eu tsawˇ haˬ tiˬ deuˬ uiˬ leˇ-awˇ gaˇ nyeh nyeh nyeh-ehˇ guˇ luꞈ gaˇ, Sawˇluˆ neh pyehˬ gʼeh-euˬ tsawˇ haˬ kʼoeˇ deuˬ ya mawˇ-euˬ meh. Aˬ yawꞈ maꞈ-ahˇ kʼawꞈ, Miˬyehˇ-euˬ yaw sahˇ uˆ lahˇ le-awˇ, aˬ yawꞈ maꞈ kʼawꞈ guˇ guˇ-ehˇ gaˇ nyeh nyeh-euˬ meh.

²¹Gaˇ kawˆ kʼoeˇ Sawˇluˆ ya gaˬ ngeh, tsawˇ haˬ tiˬ muˇ paˇ pyehˬ gʼeh-euˬ meh. Kʼoeˇ deuˬ kʼawꞈ, yaw beh pyehˬ gʼeh leꞈ-euˬ deuˬ loꞈ-ehˇ, guˇ guˇ-ehˇ gaˇ nyeh nyeh-euˬ meh. Smˬ poˆ tiˬ poˆ tsawˇ haˬ paˇ pyehˬ gʼeh kʼawꞈ, kʼoeˇ loꞈ-ehˇ tehꞈ-ehˇ gʼeh-eu meh.

²²Kʼoeˇ ngeh poˆ jawˇ, Sawˇluˆ aˬ yawꞈ-euˬ gʼawˇ mawˇ Laˬmahˇ meuˬ-ahˇ iˇ-euˬ meh. Seˬkuˬ lehˇ kuˇ-eu jawˇ duˬ-ahˇ jaˆ-eu lah duˬ duˬ ma dawˬ peh aˬ yawꞈ iˇ keuˆ-awˇ, Saˬmeuˬlaˆ hawˇ-eu Daˬbiˇ aˬ gaˇ jawˇ ta lehˇ naˇ haˬ ngeh, Naˬiˇyoˆ pu-ahˇ jawˇ meh lehˇ, aˬ cawˬ aˬ yawꞈ-ahˇ ehˇ nehˬ-euˬ meh.

²³Aˬ yawꞈ kʼoeˇ gaˇ iˇ luꞈ ngeh, aˬ yawꞈ-ahˇ kʼawꞈ Miˬyehˇ-euˬ yaw sahˇ uˆ lahˇ le-awˇ, Naˬiˇyoˆ pu-ahˇ iˇ-eu gaˇ ma law caw guˇ guˇ-ehˇ, gaˇ nyeh nyeh nyeh-ehˇ iˇ gʼeh-euˬ meh.

²⁴Saˬmeuˬlaˆ mehˬ shi aˬ yawꞈ mehˬ tsoeˬ lehˆ dzeh-awˇ, gaˇ nyeh nyeh nyeh-ehˇ guˇ-eu laꞈ kʼoeˇ, tiˬ nah tiˬ miˇ neˇ myawˆ ni ga-euˬ meh. Kʼoeˇ ngeh neh naˇ, “Sawˇluˆ gʼeh Miˬyehˇ gʼaˇ duˬ ngehˬ dah-eu tsawˇ haˬ pyeuꞈ tsehˆ shaw taˬ loˇ” lehˇ ehˇ-eu dawˬ daˬ jaˆ laˇ-euˬ meh.