Read Akha 1 Saˬmeuˬlaˆ 2 Bible Online

1 Saˬmeuˬlaˆ 2 - Akha bible

1 Saˬmeuˬlaˆ 2

¹Haˬnahˬ guiˬ lahˬ shaˇ-eu, “Sahˬpaˬ Miˬyehˇ, ngaˬ nui ma-ahˇ laˬ kʼaˬ cehˇ jeˬ bi byah-euˬ meh. Yawꞈ neh mˇ-euˬ gaˇ baˬ da neh, laˬ kʼaˬ cehˇ dui dui-eu laꞈ kʼoeˇ, Muiˇ-eu deuˬ-ahˇ ngaˇ uiˇ-eu ma. Miˬyehˇ caw ba laꞈ-euˬ miˇ neh, ngaˇ laˬ kʼaˬ cehˇ dui dui-eu ma.

²“Sahˬpaˬ Miˬyehˇ loꞈ-ehˇ shawˇ-eu, nui gʼaˬ tiˬ gʼaˬ-iˬ maˬ jawˇ-a. Yawꞈ-ahˇ duˇ-eu gʼaˬ maˬ jawˇ-a. Miˬyehˇ loꞈ-ehˇ haw piˇ nya-eu, nui gʼaˬ tiˬ gʼaˬ-iˬ maˬ jawˇ-a.

³Nawˇ guˇ guˇ-ehˇ kʼahˬ sehˇ taˬ jehˆ. Dawˬ kʼaˆ taˬ ngehˬ, ciˬ cuˇ jawˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, siˬ nya mawˇ nya-eu Miˬyehˇ meh. Tsawˇ haˬ zaˬ kʼaˇ mˇ-euˬ jeˬ-ahˇ, aˬ yawꞈ yaˇ kʼaˬ daˇ nehˬ-eu meh.

⁴Gʼaˬ kʼaˆ-eu yehˇ deuˬ-euˬ kaˆ poˆ, kʼehꞈ-iˇ kʼoeˆ-iˇ jiˇ gaˇ keuˆ-awˇ, gʼaˬ baˬ-euˬ deuˬ gʼaˬ kʼaˆ laˇ meh.

⁵Yaw beh ya dzaˬ ya dawˇ-euˬ deuˬ, nymˬ-mˇ gʼaˬ mahˇ ya mahˇ dzaˬ-awˇ, yaw beh mehꞈ-euˬ shuꞈ-euˬ tsawˇ haˬ, nymˬ-mˇ maˬ paˇ dzaˬ jiˇ coeˇ meh. Maˬ baw aˬ ma zaˬ maˬ jawˇ-euˬ, nymˬ-mˇ zaˬ shiꞈ gʼaˬ jawˇ le-awˇ, zaˬ myaˬ dui dui-euˬ aˬ ma gʼaˬ, zaˬ tiˬ gʼaˬ-iˬ maˬ paˇ jawˇ meh.

⁶Sahˬpaˬ Miˬyehˇ, toeˬ dehꞈ toeˬ shiˇ, shiˇ-eu miˇ kʼahˬ-ahˇ bi keuˆ-awˇ, paˇ sheuˬ kʼoꞈ doˆ nehˬ laꞈ-eu meh.

⁷Tiˬ paˆ na deuˬ iˇ shaˬ shaˬ-awˇ, tiˬ paˆ na deuˬ smˇ muiˬ muiˬ ni, tiˬ paˆ na deuˬ laꞈ oꞈ teˬ-awˇ, tiˬ paˆ na deuˬ laꞈ taꞈ tsehˆ ni, aˬ yawꞈ neh bymˇ-euˬ shaˬ bymˇ meh.

⁸iˇ shaˬ zaˬ-ahˇ kʼaˬ lehˇ laꞈ kʼoeˇ, aˬ yawꞈ gʼeu tuˇ tsahˇtuˇ nehˬ-awˇ, maˬ jaˆ-eu tsawˇ haˬ deuˬ-ahˇ kʼawꞈ, aˬ yawꞈ bi dehꞈ tuˇ laˇ-eu meh. Sahˬ paˬ zaˬ yo-ahˇ bi gʼoeˇ-awˇ, taˬ huiˬ-eu jeˬ bi oꞈ-eu meh. Aˬ jeˬ miˇ neh ehˇ naˇ, miˇ tsaˬ-euˬ dawˬ pehˬ duˬ puˇ-aˬ, Sahˬpaˬ Miˬyehˇ-euˬ pyeuꞈ-awˇ, kʼoeˇ-euˬ kʼoeˇ taˆ miˇtsaˬtahˬkʼawˇ, aˬ yawꞈ neh tsoˆ daˆ taˬ-euˬ meh.

⁹“Yawꞈ-ahˇ saˇ jaˇ ziꞈ-eu deuˬ-ahˇ, yaw dehꞈ dehꞈ gaˇ haw piˇ nehˬ-awˇ, maˬ tsaˬ maˬ dawˇ-eu tsawˇ haˬ deuˬ, yaw zahˇ laꞈ kʼoeˇ byoˆ-iˇ-eu meh. Tsawˇ haˬ zaˬ yawˬ ha-euˬ gʼaˬ neh, gʼaˬ leˇ-eu gʼaˬ maˬ pyeuꞈ laˇ-a.

¹⁰SahˬpaˬMiˬyehˇ-ahˇ muiˇ-eu deuˬ, luˬ-iˇ seˇ-iˇ gaˇ keuˆ tehꞈ-a. Aˬ yawꞈ maꞈ-ahˇ mˬ kʼoeˇ taˆ neh, mˬ jeˬ tsawˬ tehˆ bi tehˆ tehꞈ-a. Miˇ tsaˬ zaˬ dawˬ tawˆ-ahˇ, Sahˬpaˬ Miˬyehˇ yaˇ kʼaˬ daˇ meh. Yawꞈ neh ka nehˬ-euˬ sahˬ paˬ-ahˇ, dzoeˬdzaˬ-eu baoˬyawꞈ biꞈ nehˬ-awˇ, yawꞈ neh tseˇ doˆ-euˬ sahˬ paˬ-ahˇ, gʼaˬ leˇ-eu gʼaˬ bi pyeuꞈ tehꞈ-a.”

¹¹Kʼoeˇ naˇ, Laˬmahˇ meuˬ-ahˇ Eˇlaˬkaˬnaˬ gʼoꞈ-iˇ-euˬ meh. Ehˇ kʼawꞈ, aˬ li Saˬmeuˬlaˆ gʼaˬ Shiˇloˬ meuˬ-ahˇ jawˇ yaꞈ-awˇ, piˇ ma Eˇliˆ-euˬ laꞈ oˆ Sahˬpaˬ Miˬyehˇ-euˬ gaˇ mˇ-euˬ meh.

¹²Eˇliˆ-euˬ aˬ li deuˬ gaˇ dahˇ maˬ tsoeˬ-a. Aˬ yawꞈ maꞈ Sahˬpaˬ Miˬyehˇ-ahˇ yaw zeu maˬ baw-a.

¹³Aˬ cawˬ lawˇ laˇ shehˇ laˇ ngeh, piˇ ma deuˬ-ahˇ oꞈ-eu shaˬ bymˇ aˬ joˆ-ehˇ ya yuˇ-eu gaˇ kawˆ zahˇ sahˇ kʼoꞈ taˬ taˬ-euˬ jaˆ kʼawꞈ, aˬ yawꞈ maꞈ yaw zeu maˬ baw-a. Tsawˇ haˬ tiˬ gʼaˬ lawˇ laˇ shehˇ laˇ ngeh, piˇ ma-euˬ gʼaˬ zaˬ ti gʼaˬ, seuˬ smˇ seuˬ tsoꞈ-eu shaˬ yoꞈ yuˇ-awˇ oe-eu meh. Kʼoeˇ naˇ, shaˬ jiˇ puꞈ luꞈ gaˇ oe-awˇ,

¹⁴shaˬ jiˇ puꞈ taˬ-euˬ oeˬ lahˬ-ahˇ shaˬ yoꞈ kʼoeˇ neh kawˆ-awˇ, kʼaˇ tsi doˆ-euˬ shaˬ jiˇ deuˬ piˇ ma gʼaˇ duˬ yuˇ-eu meh. Shiˇloˬ meuˬ-ahˇ kʼaˇ lawˇ kʼaˇ shehˇ laˇ-euˬ Iˇsaˬleˬlaˆ tsawˇ haˬ deuˬ-ahˇ, kʼoeˇ loꞈ-ehˇ jahˇ nehˬ-eu meh.

¹⁵Kʼoeˇ uˬ taꞈ, lawˇ-eu tsawˇ haˬ kʼoeˇ gʼaˬ shaˬ tsuˇ yuˇ doˆ-awˇ miˬ dzaˬ-ahˇ dzah puiˆ-awˇ maˬ ya lawˇ mi naˆ-ehˇ, piˇ ma-euˬ gʼaˬ zaˬ oe-awˇ, “Piˇ ma shaˬ jiˇ yaw jaꞈ maˬ geuꞈ mawꞈ nya jeˇ. Yaw jmˬ tehꞈ-ehˇ geuꞈ ma jeˇ” lehˇ ehˇ le-eu meh.

¹⁶Lawˇ-eu tsawˇ haˬ kʼoeˇ gʼaˬ ehˇ-eu, “Aˬ dui yaw tsaˬ yaw dawˇ dawˇ-ehˇ jahˇ kaˇ-euˇ. Shaˬ tsuˇ jeˬ huˬ dzah puiˆ-awˇ lawˇ gʼaˬ miˇ tsa, nawˇ kʼaˇ geuꞈ mawꞈ-eu loꞈ-ehˇ yuˇ-awˬ.” Ehˇ kʼawꞈ, piˇ ma-euˬ gʼaˬ zaˬ kʼoeˇ gʼaˬ ehˇ-eu, “Toˆ-ehˇ maˬ geuꞈ. Nymˬ-mˇ mi naˆ-ehˇ biꞈ laꞈ-awˬ. Maˬ biꞈ laꞈ naˇ ceh doˆ geuꞈ ma.”

¹⁷Eˇliˆ-euˬ aˬ li deuˬ neh mˇ-euˬ iˬ baˇ kʼoeˇ, Sahˬpaˬ Miˬyehˇ mehˬ shi huiˬ dui dui-eu iˬ baˇ pyeuꞈ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ-ahˇ lawˇ nehˬ shehˇ nehˬ-eu jeˬ-ahˇ aˬ yawꞈ maꞈ yehˬ bawˬ sehˇ lu-ehˇ jahˇ-euˬ meh.

¹⁸Aˇ yamˬ kʼoeˇ yamˬ laꞈ kʼoeˇ, aˬ li li zaˬ Saˬmeuˬlaˆ-aˬ, shawˇ jehˆ ni gʼeh-eu saˬ paˇ neh guꞈ taˬ-euˬ muiˬ-eu shawˇ-eu pehˇ kʼahˬ pehˇ mahˇ dm-awˇ, Sahˬpaˬ Miˬyehˇ-euˬ gaˇ mˇ luꞈ-eu meh.

¹⁹Tiˬ kʼoꞈ tiˬ poˆ aˬ yawꞈ-euˬ aˬ da lawˇ-eu shehˇ-eu jeˬ mˇ laˇ ngeh, aˬ ma gʼaˬ kʼawꞈ caw teh laˇ-awˇ, aˬ yawꞈ gʼaˇ duˬ pehˇ kʼahˬ pehˇ mahˇ mahˇ zaˬ tiˬ kahˇ guꞈ laꞈ nehˬ-eu meh.

²⁰Kʼoeˇ loꞈ-ehˇ kʼaˇ lawˇ kʼaˇ shehˇ laˇ ngeh, Eˇlaˬkaˬnaˬ aˬ nyaꞈ dzeˇ zaˬ-ahˇ Eˇliˆ dawˬ ngehˬ gʼeh nehˬ-awˇ, “Sahˬpaˬ Miˬyehˇ-ahˇ a nehˬ taˬ-euˬ nawˬ li heu li-euˬ dah zaˇ, zaˬ miˬ zaˬ heu gʼaˬ o neh Sahˬpaˬ Miˬyehˇ nawˬ-ahˇ zaˬ paˇ bi jawˇ le luꞈ-uˇ” lehˇ, Eˇlaˬkaˬnaˬ-ahˇ ehˇ nehˬ-eu meh. Kʼoeˇ naˇ, aˬ nyaꞈ dzeˇ zaˬ gʼoꞈ-iˇ-eu meh.

²¹Haˬnahˬ-ahˇ Sahˬpaˬ Miˬyehˇ aˬ diˇ aˬ maˇ guiˬ lahˬ biꞈ nehˬ-awˇ, aˬ li smˬ li hawˇ-eu aˬ buˇ nyiˬ buˇ paˇ bi jawˇ le-euˬ meh. Aˬ li Saˬmeuˬlaˆ gʼaˬ-aˬ, Sahˬpaˬ Miˬyehˇ-euˬ gaˇ mˇ mˇ-ehˇ huiˬ laˇ luꞈ-eu meh.

²²Nymˬ-mˇ poˆ jawˇ, Eˇliˆ tsawˇ mawˬ mawˬ dui dui laˇ taˬ-euˬ meh. Aˬ yawꞈ-euˬ aˬ li deuˬ Iˇsaˬleˬlaˆ tsawˇ haˬ deuˬ-ahˇ aˬ joˆ-ehˇ jahˇ nehˬ luꞈ-eu gaˇ kawˆ hawˇ-eu, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ gaˇ mˇ luꞈ-eu zaˬ miˬ zaˬ deuˬ nehˬ-ehˇ yuꞈ taꞈ gaˇ keuˆ ni aˬ yawꞈ maꞈ dehꞈ cawˆ taˬ-euˬ gaˇ kawˆ-ahˇ, Eˇliˆ maˬ tsehˆ leˇ ni ya gaˬ luꞈ-eu meh.

²³Kʼoeˇ miˇ neh, aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ aˬ jeˬ miˇ neh teu loꞈ-ehˇ mˇ luꞈ te. Aˬ yawꞈ gʼaˬ yawꞈ yawˬ ha neh kʼaˇ mˇ dzeuˇ-euˬ iˬ baˇ ngaˬ-ahˇ ehˇ doˆ nehˬ laꞈ-awˬ.

²⁴Ngaˬ-euˬ aˬ li deuˬ-oˇ, aˬ kaˇ naˇ kʼoeˇ loꞈ-ehˇ maˬ paˇ dehꞈ-eu gʼaˇ duˬ yaw kʼaˆ kʼaˆ-ehˇ yahˇ-awˬ. Sahˬpaˬ Miˬyehˇ-euˬ tsawˇ haˬ deuˬ ja luꞈ-eu gaˇ kawˆ heu hmˬ-aˬ, guˆ dui dui laˇ paˬ-ehˇ gʼeh-eu gaˇ kawˆ meh.

²⁵Tsawˇ haˬ nyiˬ gʼaˬ yaw kaˬ mˇ lehˬ naˇ, Miˬyehˇ aˇ kaˬ piˇ nehˬ nya meh. Ehˇ kʼawꞈ, Sahˬpaˬ Miˬyehˇ-ahˇ mˇ lehˬ-euˬ tsawˇ haˬ-ahˇ, aˬ suˇ gʼaˬ aˇ kaˬ piˇ nehˬ nya nmˇ.” Ehˇ kʼawꞈ, yawˬ ha aˬ da neh mehˬ nehˬ-euˬ dawˬ-ahˇ aˬ ha mehˇ nmˇ maˬ naˇ haˬ-a. Aˬ jeˬ miˇ neh ehˇ naˇ, aˬ yawꞈ maꞈ-ahˇ bi shiˇ-eu gʼaˇ duˬ, Sahˬpaˬ Miˬyehˇ noeˬ tsehˆ-awˇ lehˬ hmˬ laˆ saˆ taˬ gʼaˬ-euˬ meh.

²⁶Aˬ li Saˬmeuˬlaˆ-aˬ, tiˬ nah saˇ-iˬ tiˬ nah huiˬ laˇ luꞈ-awˇ, Sahˬpaˬ Miˬyehˇ maˬ ehˇ, tsawˇ haˬ zaˬ maˬ ehˇ, aˬ yawꞈ-ahˇ nui kʼahˇ shiˇ-eu meh.

²⁷Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ Eˇliˆ jawˇ gaˇ laˇ-awˇ, Sahˬpaˬ Miˬyehˇ-euˬ dawˬ heu loꞈ-ehˇ tsaꞈ nehˬ laˇ-euˬ meh. “Nawˬ-euˬ aˬ poeˬ Aˬloˬ hawˇ-eu aˬ yawꞈ-euˬ miˬ sawˇ zaˬ deuˬ Iˇjiˇtuˆ sahˬ paˬ-euˬ zaˬ kʼaˆ geuꞈ luꞈ ngeh, ngaˬ-euˬ gʼawˇ mawˇ Aˬloˬ-ahˇ pah mehˬ nehˬ-euˬ ma.

²⁸Piˇ ma geuꞈ-awˇ, lawˇ duˬ-ahˇ ngaˬ-euˬ gaˇ bi mˇ-eu gʼaˇ duˬ maˬ ehˇ, tsiˇ yaw saw jeˬ doꞈ-eu gʼaˇ duˬ maˬ ehˇ, piˇ ma deuˬ ya dm-eu pehˇ kʼahˬ pehˇ nymˇ dm-awˇ ngaˬ-euˬ mehˬ shi bi laˇ-eu gʼaˇ duˬ maˬ ehˇ, Iˇsaˬleˬlaˆ tsawˇ jeuˬ tsawˇ ca heu myaˆ ni gʼeh-eu laꞈ kʼoeˇ, Aˬloˬ-euˬ nymˇ jiˇ-ahˇ ngaˇ tseˇ doˆ-euˬ ma. Lawˇ duˬ kʼoeˇ taˆ dzah puiˆ-awˇ lawˇ-eu jeˬ laꞈ kʼoeˇ, aˬ yawꞈ maꞈ-ahˇ oꞈ-eu shaˬ bymˇ bi baw-euˬ ma.

²⁹Toˆ-ehˇ ngeuˇ naˇ, ngaˬ-euˬ tsawˇ haˬ deuˬ-ahˇ ngaˬ neh bi lawˇ-euˬ loꞈ-ehˇ, aˬ yawꞈ maꞈ ngaˬ-ahˇ lawˇ nehˬ laꞈ-euˬ jeˬ hawˇ-eu damˬ nehˬ laꞈ-euˬ jeˬ-ahˇ, aˬ jeˬ miˇ neh mehˇ juiˇ juiˇ te. Ngaˬ-ahˇ kʼaˇ lawˇ kʼaˇ shehˇ laˇ-euˬ jeˬ laꞈ kʼoeˇ, kʼaˇ muiˬ kʼaˇ kuiˇ-eu jeˬ-ahˇ nawˬ li deuˬ yuˇ doˆ-awˇ dzaˬ luꞈ gaˇ haw sheˇ. Eˇliˆ-oˇ, nawˬ-euˬ aˬ li deuˬ-ahˇ kʼoeˇ loꞈ-ehˇ bi jahˇ-awˇ, ngaˬ-ahˇ naˆ maˬ tseˇ aˬ yawꞈ maꞈ-ahˇ nawˇ aˬ jeˬ miˇ neh taˬ huiˬ te.

³⁰Ngaˇ-aˬ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ma. Nawˬ-euˬ nymˇ jiˇ hawˇ-eu nawˬ-euˬ aˇ jeuˬ-ahˇ, aˬ myah luꞈ ngaˬ-euˬ gaˇ mˇ-eu piˇ ma deuˬ bi geuꞈ ma lehˇ, dzeuˇ laˇ ngeh ngaˇ saˇ jaˇ dzaˬ taˬ-euˬ ma. Ehˇ kʼawꞈ, nymˬ-mˇ kʼoeˇ loꞈ-ehˇ maˬ paˇ geuꞈ nya meh lehˇ ngaˇ ehˇ-eu ma. Ngaˬ-ahˇ taˬ huiˬ-eu tsawˇ haˬ-ahˇ ngaˇ taˬ huiˬ nehˬ-awˇ, ngaˬ-ahˇ yaw zeu maˬ baw-eu tsawˇ haˬ-ahˇ ngaˇ yaw zeu maˬ baw.

³¹Nawˬ-euˬ nymˇ jiˇ laꞈ kʼoeˇ tsawˇ haˬ tiˬ gʼaˬ-iˬ mawˬ laˇ ngeh keuˆ ni maˬ bi dehꞈ keuˆ-eu gʼaˇ duˬ, nawˬ-euˬ nymˇ jiˇ hawˇ-eu nawˬ-euˬ aˇ jeuˬ laꞈ kʼoeˇ kʼaˇ jawˇ-eu zaˬ guˬ dawˬ tawˆ luꞈ-ahˇ, ngaˇ ya sehꞈ jiˇ-eu aˇ yamˬ peh laˇ luꞈ meh.

³²Shaˬ-eu zahˬ-eu jeˬ-ahˇ nawˇ ya tahˬ puˬ-awˇ, Iˇsaˬleˬlaˆ tsawˇ haˬ nui deuˬ-ahˇ ngaˬ neh biꞈ-euˬ guiˬ lahˬ yaw dzahˇ-ahˇ nawˇ myaˆ ya naˆ tehꞈ-a. Kʼoeˇ uˬ taꞈ, nawˬ-euˬ nymˇ jiˇ laꞈ kʼoeˇ kʼaˇ jawˇ-eu tsawˇ haˬ tiˬ gʼaˬ-iˬ mawˬ laˇ ngeh keuˆ ni maˬ ya dehꞈ-aˇ.

³³Ehˇ kʼawꞈ, nawˬ-euˬ zaˬ deuˬ uˆ deuˬ heu myaˆ ni gʼeh-eu laꞈ kʼoeˇ, tiˬ gʼaˬ bi dehꞈ-awˇ, kʼoeˇ gʼaˬ-ahˇ ngaˬ-euˬ gaˇ mˇ-eu piˇ ma bi geuꞈ ma. Kʼoeˇ gʼaˬ kʼawꞈ, myaˆ behꞈ paˇ behꞈ-iˇ-awˇ noeˬ tmˬ duˬ ma jaˆ-ehˇ pyeuꞈ-iˇ-eu uˬ taꞈ, nawˬ-euˬ zaˬ nawˬ-euˬ uˆ nui deuˬ dawˬ tawˆ luꞈ, shaˆ shiˇ shiˇ jiˇ tehꞈ-a.

³⁴Nawˬ li Hawˇpaˬniˇ hawˇ-eu Piˇnaˬhaˇ aˬ nyaꞈ nyiˬ mehˇ nmˇ luꞈ tiˬ nah laꞈ kʼoeˇ tehꞈ-ehˇ shiˇ ngeh, ngaˬ neh kʼaˇ ehˇ taˬ-euˬ jeˬ dawˬ tawˆ luꞈ aˬ diˇ aˬ maˇ pyeuꞈ laˇ luꞈ-eu gaˇ kawˆ, nawˬ-ahˇ bi mawˇ-eu ma.

³⁵Ngaˬ-ahˇ saˇ jaˇ ziꞈ-awˇ ngaˇ kʼaˇ bi mˇ mawꞈ-eu jeˬ mˇ-eu piˇ ma tiˬ gʼaˬ ngaˇ tseˇ doˆ ma. Kʼoeˇ gʼaˬ-euˬ zaˬ deuˬ uˆ deuˬ jeuˬ le o le-awˇ, ngaˬ neh tseˇ doˆ-euˬ sahˬ paˬ mehˬ shi aˬ yawꞈ aˬ myah luꞈ gaˇ ya mˇ tehꞈ-a.

³⁶Nawˬ-euˬ zaˬ nawˬ-euˬ uˆ deuˬ laꞈ kʼoeˇ maˬ shiˇ-ehˇ kʼaˇ dehꞈ yaꞈ-euˬ deuˬ piˇ ma kʼoeˇ gʼaˬ jawˇ gaˇ le-awˇ, pyuˇ hawˇ-eu dzaˬ dzaˬ dawˇ dawˇ ya shaˇ leˇ gaˇ keuˆ tehꞈ-a. ‘Nga maꞈ maˬ ya mehꞈ sehꞈ-eu gʼaˇ duˬ, nawˬ-ahˇ caw mˇ paˬ-ehˇ gʼeh-eu gaˇ jaˆ naˇ bi mˇ laꞈ-awˬ’ lehˇ, piˇ ma kʼoeˇ gʼaˬ-ahˇ aˬ yawꞈ maꞈ ya shaˇ leˇ tehꞈ-a.”