Read Akha 1 Saˬmeuˬlaˆ 21 Bible Online

1 Saˬmeuˬlaˆ 21 - Akha bible

1 Saˬmeuˬlaˆ 21

¹Kʼoeˇ naˇ, Noˇbaˆ meuˬ-ahˇ Aˬhiˇmaˬlehˇ jawˇ gaˇ Daˬbiˇ iˇ-euˬ meh. Kʼoeˇ ngeh, Aˬhiˇmaˬlehˇ yaw dzuˬ dzuˬ dzuˬ-ehˇ doˆ le-awˇ, “Aˬ jeˬ miˇ neh cawˬ tiˬ gʼaˬ-iˬ maˬ ahˇ ni nawˇ tehꞈ-ehˇ heu gaˇ oe teˬ” lehˇ naˇ haˬ-eu meh.

²Daˬbiˇ ehˇ-eu, “Sahˬ paˬ-euˬ gaˇ jaˆ-eu miˇ neh ngaˇ heu gaˇ oe-euˬ ma. Ngaˬ-ahˇ heu gaˇ pyehˬ gʼeh leꞈ-awˇ bi mˇ-euˬ jeˬ aˬ cawˬ-ahˇ taˬ bi siˬ lehˇ, sahˬ paˬ ngaˬ-ahˇ ehˇ taˬ-euˬ meh. Ngaˬ-euˬ tsawˇ haˬ deuˬ-ahˇ kʼawꞈ, jawˇ duˬ tiˬ tsahˇ-ahˇ paˇ tahˬ puˬ ma lehˇ ehˇ taˬ yaꞈ-euˬ ma.

³Nymˬ-mˇ nawˇ jawˇ gaˇ dzaˬ paˬ-ehˇ gʼeh-eu aˬ jeˬ jaˆ te. Kaˬ muˇ ngaˬ siˬ kʼawꞈ muiˬ, nui jeˬ aˬ geu jeˬ kʼawꞈ muiˬ, ngaˬ-ahˇ biꞈ laꞈ sheˇ.”

⁴Piˇ ma Aˬhiˇmaˬlehˇ ehˇ-eu, “Muiˬ-eu shawˇ-eu kaˬ muˇ maˬ ngeuˇ naˇ nui jeˬ tiˬ jeˬ-iˬ maˬ jaˆ. Nymˬ-mˇ heu myaˆ nah laꞈ kʼoeˇ nawˬ-euˬ tsawˇ haˬ deuˬ zaˬ miˬ zaˬ nehˬ-ehˇ maˬ yuꞈ maˬ jawˇ taꞈ-aˬ lehˇ ngeuˇ naˇ, kaˬ muˇ heu dzaˬ nya tehꞈ-a.”

⁵Daˬbiˇ ehˇ-eu, “Aˬ yawꞈ maꞈ kʼoeˇ loꞈ-ehˇ maˬ gʼeh-a. Yaw kʼaˆ-ehˇ maˬ huiˬ-eu gaˇ mˇ-eu gʼaˇ duˬ nga maꞈ gaˇ ma doˆ-iˇ ngeh kʼawꞈ, ngaˬ-euˬ tsawˇ haˬ deuˬ aˬ myah luꞈ yaw muiˬ yaw shawˇ shawˇ-ehˇ jawˇ-eu meh. Nymˬ-mˇ loꞈ-ehˇ huiˬ dui dui-eu gaˇ mˇ-eu lehˇ doˆ le-euˬ-aˬ, ehˇ kʼaˇ maˬ paˇ za-aˇ.”

⁶Kʼoeˇ ngeh, muiˬ-eu shawˇ-eu kaˬ muˇ kʼoeˇ, piˇ ma neh Daˬbiˇ-ahˇ biꞈ-euˬ meh. Aˬ jeˬ miˇ neh ehˇ naˇ, kʼoeˇ loꞈ-ehˇ gʼeh-eu Miˬyehˇ-ahˇ lawˇ nehˬ-euˬ kaˬ muˇ tehꞈ-ehˇ aˬ yawꞈ jawˇ gaˇ jaˆ-eu meh. Kaˬ muˇ kʼoeˇ-aˬ, kaˬ muˇ yaw shuiꞈ yuˇ gʼeh-awˇ dzeˇ paˇ paˇ ngeh, muiˬ-eu shawˇ-eu hawˬ jeh kʼoeˇ taˆ jaˆ gaˇ yuˇ kʼoꞈ laꞈ-euˬ kaˬ muˇ yaw oeˇ meh.

⁷Kʼoeˇ ngeh nah, Sawˇluˆ-euˬ yawˇ bo-eu paw aˬ yuiꞈ geuꞈ-eu gʼaˬ pyeuꞈ-eu Eˬdoˬ tsawˇ jeuˬ Doˇgaˆ lehˇ myahˇ-euˬ gʼaˬ kʼawꞈ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-awˇ mˇ paˬ-ehˇ gʼeh-eu jeˬ jaˆ-eu miˇ neh, kʼoeˇ gaˇ laˇ taˬ-awˇ jawˇ-eu meh.

⁸Aˬhiˇmaˬlehˇ-ahˇ Daˬbiˇ ehˇ nehˬ-euˬ, “Nawˇ jawˇ gaˇ gahˬ hawˇ-eu mi cehˇ tiˬ kahˇ na maˬ jaˆ loˇ. Ngaˬ-ahˇ tiˬ poˆ biꞈ laꞈ sheˇ. Sahˬ paˬ ngaˬ-ahˇ Yaw kawˇ-ehˇ doˆ-iˇ-awˬ lehˇ dawˬ biꞈ laꞈ-euˬ miˇ neh, tehˬ law baw law-ehˇ doˆ le-awˇ, ngaˬ-euˬ mi cehˇ hawˇ-eu guiˇ deuˆ-eu keu ka yuˇ-eu maˬ dah-aˬ.”

⁹Aˬhiˇmaˬlehˇ ehˇ-eu, “Eˇlahˬ deh kʼawꞈ-ahˇ nawˬ neh sehꞈ-euˬ Piˇliˇtiˆ tsawˇ haˬ Gawˇliˇyaˆ kʼoeˇ gʼaˬ-euˬ mi cehˇ kʼoeˇ kahˇ heu gaˇ jaˆ meh. Saˬ paˇ neh lahˇ taˬ-awˇ, piˇ ma dm-eu pehˇ kʼahˬ pehˇ nymˇ-euˬ naˇ kʼah paw dzeˇ jaˆ meh. Nawˇ yuˇ gʼeh mawꞈ naˇ yuˇ gʼeh nya meh. Mi cehˇ kʼoeˇ kahˇ maˬ ngeuˇ naˇ, guiˇ deuˆ-eu keu ka nui jeˬ tiˬ jeˬ-iˬ heu gaˇ maˬ jaˆ-a.” Daˬbiˇ ehˇ-eu, “Teu kahˇ naˆ maˬ tseˇ muiˬ-eu maˬ paˇ jaˆ-aˇ. Teu kahˇ biꞈ laꞈ-awˬ.”

¹⁰Daˬbiˇ-aˬ, Sawˇluˆ jawˇ gaˇ neh cehˆ doˆ-awˇ, Gaˬdaˇ meuˬ-ahˇ sahˬ paˬ Aˬkiˇ jawˇ gaˇ iˇ-euˬ meh.

¹¹Sahˬ paˬ-euˬ gaˇ mˇ-eu yaw huiˬ yaw mahˇ deuˬ sahˬ paˬ Aˬkiˇ-ahˇ ehˇ nehˬ-eu, “Tsawˇ haˬ heu gʼaˬ aˬ yawꞈ maꞈ-euˬ miˇ kʼahˬ kʼoeˇ taˆ sahˬ paˬ sahˬ ma geuꞈ luꞈ-eu Daˬbiˇ lehˇ ehˇ-eu kʼoeˇ gʼaˬ maˬ ngeuˇ nga loˇ. Zaˬ mi zaˬ deuˬ gaˇ nyeh nyeh nyeh-ehˇ, ‘Sawˇluˆ aˇ heˇ gʼaˬ sehꞈ-awˇ, Daˬbiˇ aˇ muiˇ gʼaˬ sehꞈ-euˬ meh’ lehˇ caˇ-eu kʼoeˇ, aˬ yawꞈ-ahˇ caˇ nehˬ-euˬ maˬ ngeuˇ-a loˇ.”

¹²Aˬ yawꞈ maꞈ neh ehˇ-euˬ dawˬ kʼoeˇ dawˬ Daˬbiˇ-euˬ nui ma-ahˇ shaˬ zahˬ bi mˇ-awˇ, sahˬ paˬ Aˬkiˇ-ahˇ Daˬbiˇ guˆ dui dui-euˬ meh.

¹³Kʼoeˇ miˇ neh, aˬ yawꞈ maꞈ aˬ yawꞈ-euˬ dawˬ peh uiˬ laˇ ngeh, nui ma maˬ byah-eu geuꞈ-awˇ, aˬ yawꞈ-ahˇ paꞈ-eu lehˇ gʼeh ngeh, tsawˇ uˬ teuˆ-eu loꞈ-ehˇ teuˆ mehˬ nehˬ-euˬ meh. Meuˬ lahˇ kʼehˬ doe ni aˬ yawꞈ sahˬ boꞈ boꞈ byawꞈ boꞈ byawꞈ-ehˇ cah-awˇ, aˬ yawꞈ-euˬ mehˬ mahˬ-ahˇ iˇ ju bi ju ka-euˬ meh.

¹⁴Kʼoeˇ ngeh, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ sahˬ paˬ Aˬkiˇ heu loꞈ-ehˇ ehˇ nehˬ-euˬ meh. “Haw sheˇ. Tsawˇ haˬ teu gʼaˬ tsawˇ uˬ maˬ ngeuˇ nga loˇ. Aˬ yawꞈ-ahˇ aˬ jeˬ miˇ neh ngaˇ jawˇ gaˇ sheuˬ laꞈ teˬ.

¹⁵Ngaˇ jawˇ gaˇ tsawˇ uˬ maˬ jawˇ-eu miˇ neh sheuˬ laꞈ teˬ loˇ. Aˬ jeˬ miˇ neh teu loꞈ-ehˇ jawꞈ dui dui-eu tsawˇ uˬ-ahˇ ngaˬ-euˬ nymˇ laꞈ kʼoeˇ sheuˬ uˇ laꞈ-awˇ, ngaˬ-ahˇ bi laˆ bahˬ laˇ teˬ.”