Read Akha 1 Saˬmeuˬlaˆ 22 Bible Online

1 Saˬmeuˬlaˆ 22 - Akha bible

1 Saˬmeuˬlaˆ 22

¹Daˬbiˇ-aˬ, Gaˬdaˇ meuˬ-ahˇ neh cehˆ doˆ-awˇ, Aˬduˬlamˬ meuˬ dawˬ peh jaˆ-eu lo kʼahˬ-ahˇ iˇ-euˬ meh. Aˬ yawꞈ kʼoeˇ gaˇ jawˇ-eu gaˇ kawˆ aˬ yawꞈ-euˬ aˇ doˆ deuˬ hawˇ-eu aˬ yuiꞈ aˬ nyiˇ deuˬ ya siˬ ngeh, aˬ yawꞈ jawˇ gaˇ jawˇ leˇ-euˬ meh.

²Aˬ cawˬ neh smˇ kʼaˆ kʼaˆ dzaˬ-euˬ uˬ moˆ ya jawˇ-eu tsawˇ haˬ deuˬ, aˬ cawˬ-ahˇ dziˇ dzoˆ maˬ tsoeˬ kʼoꞈ nya ni shaˬ-eu tsawˇ haˬ deuˬ, aˬ cawˬ neh biˇ siˇ bi siˇ-awˇ nui kʼahˇ maˬ shiˇ-ehˇ shaˬ luꞈ-eu tsawˇ haˬ deuˬ, oeˬ yaˇ gʼaˬ ehˇ gʼaˬ ni aˬ yawꞈ jawˇ paw cehˆ uˇ leˇ-awˇ, kʼoeˇ deuˬ kʼoeˇ taˆ Daˬbiˇ aˬ yuiꞈ geuꞈ-awˇ sheuˬ gʼeh-euˬ meh.

³Kʼoeˇ gaˇ neh naˇ, Mawˇbaˆ miˇ kʼahˬ laꞈ kʼoeˇ jaˆ-eu Miˇzaˬpaˬ meuˬ-ahˇ Daˬbiˇ iˇ-awˇ, “Miˬyehˇ ngaˬ-euˬ gʼaˇ duˬ gaˇ ma aˬ joˆ-ehˇ laˆ saˆ taˬ-euˬ gaˇ kawˆ ngaˇ maˬ ya siˬ duˬ kʼoeˇ keuˆ ni, ngaˬ da hawˇ-eu ngaˬ ma-ahˇ nawˬ nehˬ-ehˇ tiˬ kʼehˬ bi jawˇ nehˬ laꞈ lehˇ nawˬ-ahˇ shaˇ-eu ma” lehˇ, Mawˇbaˆ sahˬ paˬ-ahˇ Daˬbiˇ ehˇ nehˬ-euˬ meh.

⁴Kʼoeˇ naˇ, aˬ yawꞈ-euˬ aˬ da aˬ ma-ahˇ Mawˇbaˆ sahˬ paˬ nehˬ-ehˇ taˬ yaꞈ-awˇ, lo kʼahˬ kʼoeˇ kʼahˬ laꞈ kʼoeˇ aˬ yawꞈ kʼaˇ dzuˇ zaꞈ luꞈ kʼoeˇ keuˆ ni, kʼoeˇ gaˇ bi jawˇ-euˬ meh.

⁵Kʼoeˇ naˇ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu, Gaˆ lehˇ myahˇ-euˬ tiˬ gʼaˬ Daˬbiˇ jawˇ gaˇ oe-awˇ, “Nawˇ heu gaˇ maˬ paˇ jawˇ ni Yuˇdaˆ miˇ kʼahˬ-ahˇ yaw kawˇ-ehˇ iˇ-awˬ” lehˇ ehˇ le-euˬ meh. Kʼoeˇ ngeh, Daˬbiˇ doˆ-iˇ-awˇ, Hehˇyehˆ lehˇ kuˇ-eu bawˇ tsahˬ bawˇ dahˇ-ahˇ jawˇ-iˇ-euˬ meh.

⁶Tiˬ nah keuˆ laˇ ngeh, Giˇbyaˬ meuˬ laꞈ kʼoeˇ, miˬ shuˬ paꞈ muˆ aˇ bawˇ[5] dawˬ pehˬ-ahˇ, Sawˇluˆ gahˬ tuˆ tehˬ-awˇ nuiˇ luꞈ-eu meh. Aˬ yawꞈ-euˬ gaˇ mˇ-eu yaw huiˬ yaw mahˇ dawˬ tawˆ luꞈ kʼawꞈ, aˬ yawꞈ nuiˇ luꞈ-eu jawˬ jawˬ-ehˇ yawꞈ luꞈ-eu meh. Kʼoeˇ ngeh, Daˬbiˇ hawˇ-eu aˬ yawꞈ-euˬ tsawˇ haˬ deuˬ-ahˇ poˆ mawˇ-euˬ gaˇ kawˆ aˬ yawꞈ ya gaˬ gʼaˬ-euˬ meh.

⁷Aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Beˬyaˬmiˬ tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ. Daˬbiˇ-aˬ, naw maꞈ dawˬ tawˆ luꞈ-ahˇ deh yaˇ hawˇ-eu aˬ gaꞈ yaˇ kmˇ biˇ nehˬ laꞈ-awˇ, naw maꞈ-ahˇ aˬ yawꞈ-euˬ guiˇ maꞈ kʼoeˇ taˆ uˆ lahˇ-eu yaw huiˬ deuˬ bi geuꞈ nehˬ laꞈ tehꞈ-a lehˇ noeˬ luꞈ te loˇ.

⁸Naw maꞈ kʼoeˇ loꞈ-ehˇ noeˬ-awˇ ngaˬ-ahˇ puiˬ-eu lehˇ gʼeh te loˇ. Ngaˬ li Yawˇnaˆshaˬ Daˬbiˇ-ahˇ nui ma taꞈ-eu gaˇ kawˆ naw maꞈ tiˬ gʼaˬ-iˬ ngaˬ-ahˇ maˬ ehˇ nehˬ laꞈ-aˬ. Naw maꞈ tiˬ gʼaˬ-iˬ ngaˬ-euˬ gʼaˇ duˬ maˬ shaˇ noeˬ nehˬ laꞈ ni, ngaˬ-euˬ tsawˇ haˬ tiˬ gʼaˬ pyeuꞈ-eu Daˬbiˇ ngaˬ-ahˇ sehꞈ-eu lehˇ nymˬ-mˇ leh jeh luꞈ-eu gaˇ kawˆ hawˇ-eu, Daˬbiˇ kʼoeˇ loꞈ-ehˇ leh jeh gaˇ ngaˬ li gʼaˬ baꞈ baꞈ-eu gaˇ kawˆ heu, naw maꞈ ngaˬ-ahˇ maˬ ehˇ nehˬ laꞈ ni jawˇ-eu meh.”

⁹Kʼoeˇ ngeh, Doˇgaˆ gʼaˬ kʼawꞈ, Sawˇluˆ-euˬ gaˇ mˇ-eu yaw huiˬ yaw mahˇ deuˬ nehˬ-ehˇ yawꞈ luꞈ-eu meh. Aˬ yawꞈ ehˇ-eu, “Noˇbaˆ meuˬ-ahˇ Aˬhiˇtuˆ-euˬ aˬ li Aˬhiˇmaˬlehˇ jawˇ gaˇ ngaˇ iˇ ngeh, Daˬbiˇ-ahˇ kʼoeˇ gaˇ ya mawˇ-euˬ ma.

¹⁰Daˬbiˇ aˬ joˆ-ehˇ mˇ paˬ shaˇ paˬ-ehˇ gʼeh-eu gaˇ kawˆ Aˬhiˇmaˬlehˇ neh Sahˬpaˬ Miˬyehˇ-ahˇ naˇ haˬ nehˬ-awˇ, dzaˬ dzaˬ dawˇ dawˇ hawˇ-eu Piˇliˇtiˆ tsawˇ haˬ Gawˇliˆyaˆ-euˬ mi cehˇ kʼoeˇ kahˇ Daˬbiˇ-ahˇ biꞈ nehˬ-eu meh.”

¹¹Kʼoeˇ ngeh, sahˬ paˬ Sawˇluˆ tsawˇ haˬ pyehˬ gʼeh-awˇ, piˇ ma Aˬhiˇmaˬlehˇ-ahˇ maˬ ehˇ, Noˇbaˆ meuˬ-ahˇ piˇ ma geuꞈ luꞈ-eu aˬ yawꞈ-euˬ aˬ yuiꞈ aˬ nyiˇ dawˬ tawˆ luꞈ maˬ ehˇ, aˬ yawꞈ jawˇ gaˇ bi kuˇ laꞈ-euˬ meh.

¹²“Aˬhiˇmaˬlehˇ-oˇ, ngaˇ ehˇ gaˇ naˇ haˬ-awˬ” lehˇ Sawˇluˆ ehˇ ngeh, “Sahˬ paˬ-oˇ, ngaˇ naˇ haˬ luꞈ ma” lehˇ, Aˬhiˇmaˬlehˇ ehˇ kʼoꞈ nehˬ-euˬ meh.

¹³Sawˇluˆ ehˇ-eu, “Aˬ jeˬ miˇ neh Daˬbiˇ naw maꞈ ngaˬ-ahˇ puiˬ-eu lehˇ leh jeh te. Aˬ jeˬ miˇ neh Daˬbiˇ-ahˇ dzaˬ dzaˬ dawˇ dawˇ hawˇ-eu mi cehˇ biꞈ-awˇ, aˬ yawꞈ gʼaˇ duˬ Sahˬpaˬ Miˬyehˇ-ahˇ mehˬ bawˬ mˇ nehˬ teˬ. Nymˬ-mˇ ngaˇ jawˇ gaˇ neh aˬ yawꞈ cehˆ doˆ-awˇ, ngaˬ-ahˇ sehꞈ-eu lehˇ nawˬ jawˬ luꞈ meh.”

¹⁴Aˬhiˇmaˬlehˇ ehˇ-eu, “Daˬbiˇ-aˬ, nawˬ-euˬ gaˇ mˇ-eu yaw huiˬ yaw mahˇ dawˬ tawˆ luꞈ kʼoeˇ taˆ, nawˬ-ahˇ saˇ jaˇ ziꞈ dui dui-eu tiˬ gʼaˬ meh. Aˬ yawꞈ-aˬ, nawˬ-euˬ aˬ zaˬ pyeuꞈ-awˇ, nawˬ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu uˬ taꞈ, sahˬ paˬ-euˬ nymˇ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ aˬ yawꞈ-ahˇ yaw zeu baw dui dui-eu meh.

¹⁵Aˬ yawꞈ gʼaˇ duˬ Miˬyehˇ-ahˇ ngaˇ mehˬ bawˬ mˇ nehˬ-euˬ ngeuˇ ma. Ehˇ kʼawꞈ, kʼoeˇ ngeh poˆ tehꞈ-ehˇ aˬ yawꞈ gʼaˇ duˬ ngaˇ kʼoeˇ loꞈ-ehˇ mˇ nehˬ haw-euˬ maˬ ngeuˇ. Nawˬ-ahˇ puiˬ-eu lehˇ leh jeh-euˬ lehˇ ehˇ-eu gaˇ kawˆ heu hmˬ-ahˇ taꞈ leˇ-awˇ, ngaˇ hawˇ-eu ngaˬ-euˬ aˬ yuiꞈ aˬ nyiˇ tiˬ gʼaˬ-ahˇ-iˬ nawˇ noeˬ bahˬ-eu maˬ tsaˬ-a. Gaˇ kawˆ heu hmˬ-ahˇ taꞈ leˇ-awˇ ngaˇ tiˬ jeˬ-iˬ maˬ ya siˬ-aˬ.”

¹⁶Sahˬ paˬ Sawˇluˆ ehˇ-eu, “Aˬhiˇmaˬlehˇ-oˇ, nawˇ hawˇ-eu nawˬ-euˬ aˬ yuiꞈ aˬ nyiˇ dawˬ tawˆ luꞈ ya shiˇ meh.”

¹⁷Kʼoeˇ naˇ, kʼoeˇ gaˇ yawꞈ luꞈ-eu aˬ yawꞈ-ahˇ loꞈ piˇ-eu guiˇ maꞈ-ahˇ ehˇ nehˬ-eu, “Sahˬpaˬ Miˬyehˇ-euˬ piˇ ma heu deuˬ-ahˇ sehꞈ-awˬ. Aˬ jeˬ miˇ neh ehˇ naˇ, aˬ yawꞈ maꞈ Daˬbiˇ-ahˇ nui ma taꞈ-awˇ, Daˬbiˇ cehˆ doˆ-euˬ gaˇ kawˆ aˬ yawꞈ maꞈ siˬ nya jiˇ kʼawꞈ, ngaˬ-ahˇ maˬ ehˇ nehˬ laꞈ ni zaꞈ taˬ-euˬ meh.” Ehˇ kʼawꞈ, sahˬ paˬ-ahˇ loꞈ piˇ-eu guiˇ maꞈ kʼoeˇ maꞈ, Sahˬpaˬ Miˬyehˇ-euˬ piˇ ma kʼoeˇ deuˬ-ahˇ maˬ sehꞈ-a.

¹⁸Kʼoeˇ ngeh, “Nawˇ sehꞈ-awˬ” lehˇ Doˇgaˆ-ahˇ Sawˇluˆ ehˇ nehˬ-awˇ, Doˇgaˆ neh piˇ ma kʼoeˇ deuˬ-ahˇ sehꞈ-euˬ meh. Kʼoeˇ ngeh nah piˇ ma-euˬ pehˇ kʼahˬ pehˇ nymˇ dm-awˇ piˇ ma geuꞈ nya-eu yehꞈ tseˇ gʼaˬ-ahˇ aˬ yawꞈ sehꞈ dzeh-euˬ meh.

¹⁹Piˇ ma deuˬ jawˇ-eu meuˬ pyeuꞈ-eu Noˇbaˆ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ kʼawꞈ sehꞈ jiˇ-awˬ lehˇ, Sawˇluˆ dawˬ biꞈ-euˬ meh. Kʼaˬ dzeˇ zaˬ hawˇ-eu zaˬ miˬ zaˬ dawˬ tawˆ luꞈ maˬ ehˇ, zaˬ guˬ deuˬ hawˇ-eu zaˬ yaw nahˬ deuˬ maˬ ehˇ, mawˇ neˇ, mahˬ tahˬ laˆ hawˇ-eu yawˇ dawˬ tawˆ luꞈ maˬ ehˇ, maˬ bi dzeuˇ-iˇ ni sehꞈ jiˇ-euˬ meh.

²⁰Ehˇ kʼawꞈ, Aˬhiˇmaˬlehˇ-euˬ aˬ li Aˬbyaˬdaˬ gʼaˬ cehˆ dzeuˇ-awˇ, Daˬbiˇ jawˇ paw cehˆ uˇ-iˇ-euˬ meh.

²¹Sahˬpaˬ Miˬyehˇ-euˬ piˇ ma deuˬ-ahˇ Sawˇluˆ neh sehꞈ-euˬ gaˇ kawˆ, Daˬbiˇ-ahˇ aˬ yawꞈ dzawˇ nehˬ-euˬ meh.

²²Aˬbyaˬdaˬ-ahˇ Daˬbiˇ ehˇ nehˬ-eu, “Kʼoeˇ ngeh nah Doˇgaˆ-ahˇ ngaˇ kʼoeˇ gaˇ ya mawˇ ngeh, gaˇ kawˆ kʼoeˇ Sawˇluˆ-ahˇ aˬ yawꞈ paˇ tsaꞈ nehˬ-iˇ-eu yaw duˬ baw tehꞈ-a lehˇ ngaˇ siˬ duˬ-euˬ ma. Ngaˇ baˬ da neh nawˬ-euˬ aˬ yuiꞈ aˬ nyiˇ dawˬ tawˆ luꞈ ya shiˇ jiˇ-euˬ meh.

²³Maˬ guˆ ni ngaˬ nehˬ-ehˇ jawˇ-awˬ. Nawˬ-ahˇ maˬ ehˇ, ngaˬ-ahˇ maˬ ehˇ, Sawˇluˆ sehꞈ mawꞈ meh. Ehˇ kʼawꞈ, ngaˬ nehˬ-ehˇ jawˇ naˇ nawˇ guˆ kʼaˇ maˬ za-aˇ.”