Read Akha 1 Saˬmeuˬlaˆ 23 Bible Online

1 Saˬmeuˬlaˆ 23 - Akha bible

1 Saˬmeuˬlaˆ 23

¹Piˇliˇtiˆ tsawˇ haˬ deuˬ Kiˇlahˬ meuˬ-ahˇ guiˇ deuˆ le-awˇ, keuˆ le-euˬ cehˇ deuˬ pi geuꞈ luꞈ-eu gaˇ kawˆ Daˬbiˇ ya gaˬ-euˬ meh.

²Kʼoeˇ miˇ neh, Piˇliˇtiˆ tsawˇ haˬ deuˬ-ahˇ guiˇ deuˆ-iˇ-eu gʼaˇ duˬ, Sahˬpaˬ Miˬyehˇ-ahˇ aˬ yawꞈ naˇ haˬ-euˬ meh. “Aˬ yawꞈ maꞈ-ahˇ guiˇ deuˆ-iˇ-awˇ, Kiˇlahˬ meuˬ-ahˇ ka kʼoꞈ nehˬ-awˬ” lehˇ, Sahˬpaˬ Miˬyehˇ ehˇ-eu meh.

³Ehˇ kʼawꞈ, Daˬbiˇ-euˬ tsawˇ haˬ deuˬ Daˬbiˇ-ahˇ ehˇ-eu, “Aˬ dui maꞈ heu gaˇ Yuˇdaˆ miˇ kʼahˬ laꞈ kʼoeˇ jawˇ luꞈ-eu tehꞈ-ehˇ kʼawꞈ, guˆ kʼaˇ za-eu-aˬ, nymˬ-mˇ Kiˇlahˬ meuˬ-ahˇ Piˇliˇtiˆ tsawˇ haˬ deuˬ-ahˇ guiˇ paˇ deuˆ-iˇ naˇ, heu naˆ maˬ tseˆ shaˬ laˇ-eu maˬ ngeuˇ-a loˇ.”

⁴Kʼoeˇ miˇ neh, Sahˬpaˬ Miˬyehˇ-ahˇ Daˬbiˇ tiˬ poˆ paˇ naˇ haˬ-euˬ meh. Sahˬpaˬ Miˬyehˇ ehˇ-eu, “Kiˇlahˬ meuˬ-ahˇ guiˇ deuˆ-iˇ-awˬ. Aˬ jeˬ miˇ neh ehˇ naˇ, naw maꞈ-ahˇ Piˇliˇtiˆ tsawˇ haˬ deuˬ kʼoeˇ taˆ ngaˇ bi gʼaˬ leˇ ma.”

⁵Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ Kiˇlahˬ meuˬ-ahˇ iˇ-awˇ, Piˇliˇtiˆ tsawˇ haˬ deuˬ-ahˇ guiˇ deuˆ-iˇ-euˬ meh. Piˇliˇtiˆ tsawˇ haˬ deuˬ gʼawˬ mya ni deuˆ sehꞈ-awˇ, aˬ yawꞈ maꞈ-euˬ jeˬ zaˬ deuˬ kʼawꞈ tsahˇ geuꞈ-euˬ meh. Kʼoeˇ loꞈ-ehˇ jahˇ-awˇ, meuˬ kʼoeˇ meuˬ-ahˇ Daˬbiˇ ka kʼoꞈ-euˬ meh.

⁶Aˬhiˇmaˬlehˇ-euˬ aˬ li Aˬbyaˬdaˬ cehˆ doˆ-awˇ, Kiˇlahˬ meuˬ-ahˇ Daˬbiˇ jawˇ gaˇ cehˆ uˇ-iˇ ngeh, piˇ ma dm-eu pehˇ kʼahˬ pehˇ nymˇ kʼawꞈ yuˇ gʼeh-euˬ meh.

⁷Daˬbiˇ Kiˇlahˬ meuˬ-ahˇ iˇ-euˬ gaˇ kawˆ Sawˇluˆ ya gaˬ ngeh, heu loꞈ-ehˇ ehˇ-eu meh. “Daˬbiˇ-ahˇ Miˬyehˇ neh ngaˬ-euˬ aˬ laꞈ laꞈ kʼoeˇ a nehˬ laꞈ-euˬ nga. Meuˬ meuˬ lahˇ yaw muiˬ paˬ-ehˇ gawˬ ziꞈ taˬ-awˇ, meuˬ lahˇ kʼehˬ laˇ gʼoˆ ziꞈ dah ni jaˆ-eu meuˬ kʼoeˇ meuˬ laꞈ kʼoeˇ Daˬbiˇ iˇ uˇ-euˬ-aˬ, aˬ yawˇ yawꞈ lahˇ ju kʼmˇ taˬ-euˬ gaˇ cehˆ paꞈ leˇ-euˬ gaˇ duˇ-eu nga.”

⁸Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ-ahˇ loꞈ jawˬ-iˇ-eu gʼaˇ duˬ, Sawˇluˆ aˬ yawꞈ-euˬ guiˇ maꞈ deuˬ-ahˇ kuˇ uiˬ-euˬ meh.

⁹Sawˇluˆ guiˇ deuˆ le-eu lehˇ lehˬ hmˬ taˬ-euˬ gaˇ kawˆ Daˬbiˇ ya gaˬ ngeh, “Piˇ ma dm-eu pehˇ kʼahˬ pehˇ nymˇ yuˇ laꞈ sheˇ” lehˇ, piˇ ma Aˬbyaˬdaˬ-ahˇ aˬ yawꞈ ehˇ nehˬ-euˬ meh.

¹⁰Daˬbiˇ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ zaˬ kʼaˆ pyeuꞈ-eu ngaˇ heu gaˇ jawˇ luꞈ-eu miˇ neh, Kiˇlahˬ meuˬ heu meuˬ-ahˇ Sawˇluˆ laˆ cawˆ le-eu lehˇ lehˬ hmˬ luꞈ-eu gaˇ kawˆ, ngaˇ ya gaˬ duˬ taˬ-euˬ ma.

¹¹Kiˇlahˬ meuˬ-ahˇ jawˇ-eu tsawˇ haˬ deuˬ, ngaˬ-ahˇ Sawˇluˆ-euˬ aˬ laꞈ laꞈ kʼoeˇ a nehˬ tehꞈ-a loˇ. Ngaˬ neh ya gaˬ taˬ-euˬ loꞈ-ehˇ, Sawˇluˆ aˬ diˇ oe tehꞈ-a loˇ. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, gaˇ kawˆ heu ngaˬ-ahˇ tiˬ poˆ ehˇ nehˬ laꞈ-eu gʼaˇ duˬ, ngaˇ nawˬ-ahˇ shaˇ-eu ma.” Sahˬpaˬ Miˬyehˇ ehˇ-eu, “Sawˇluˆ aˬ diˇ oe tehꞈ-a.”

¹²Daˬbiˇ tiˬ poˆ paˇ ehˇ-eu, “Kiˇlahˬ meuˬ-ahˇ jawˇ-eu tsawˇ haˬ deuˬ, ngaˇ hawˇ-eu ngaˬ-euˬ tsawˇ haˬ deuˬ-ahˇ, Sawˇluˆ-euˬ aˬ laꞈ laꞈ kʼoeˇ a nehˬ tehꞈ-a loˇ.” Sahˬ paˬ Miˬyehˇ ehˇ-eu, “A nehˬ tehꞈ-a” lehˇ Sahˬpaˬ Miˬyehˇ ehˇ kʼoꞈ nehˬ-euˬ meh.

¹³Kʼoeˇ naˇ, Daˬbiˇ hawˇ-eu koꞈ yaˇ gʼaˬ ehˇ gʼaˬ ni byah-eu aˬ yawꞈ-euˬ tsawˇ haˬ deuˬ, Kiˇlahˬ meuˬ-ahˇ neh yaw kawˇ-ehˇ doˆ-iˇ-awˇ, yahˇ pawˇ-euˬ meh. Daˬbiˇ Kiˇlahˬ meuˬ-ahˇ neh doˆ-iˇ dzeuˇ-euˬ gaˇ kawˆ Sawˇluˆ ya gaˬ ngeh, aˬ yawꞈ neh noeˬ taˬ-euˬ loꞈ-ehˇ maˬ mˇ ni byehˇ-euˬ meh.

¹⁴Ziˇpaˬ meuˬ dawˬ peh jaˆ-eu bawˇ tsahˬ bawˇ dahˇ laꞈ kʼoeˇ, gawˬ jawˬ gawˬ duˇ-ahˇ Daˬbiˇ cehˆ zaꞈ-awˇ jawˇ-euˬ meh. Kʼoeˇ ngeh, aˬ yawꞈ-ahˇ poˆ mawˇ-eu gʼaˇ duˬ, Sawˇluˆ maˬ naˬ leˇ ni leh jeh luꞈ-eu meh. Ehˇ kʼawꞈ, Miˬyehˇ aˬ yawꞈ-ahˇ Sawˇluˆ-euˬ aˬ laꞈ laꞈ kʼoeˇ maˬ a nehˬ-a.

¹⁵Ziˇpaˬ meuˬ dawˬ peh jaˆ-eu bawˇ tsahˬ bawˇ dahˇ laꞈ kʼoeˇ, Hawˇlehˆ lehˇ kuˇ-eu jawˇ duˬ-ahˇ Daˬbiˇ jawˇ luꞈ ngeh, Sawˇluˆ aˬ yawꞈ-ahˇ sehꞈ-eu lehˇ laˇ luꞈ-eu gaˇ kawˆ aˬ yawꞈ ya siˬ-euˬ meh.

¹⁶Daˬbiˇ jawˇ-eu Hawˇlehˆ-ahˇ Yawˇnaˆshaˬ le-awˇ, “Miˬyehˇ nawˬ-ahˇ haw piˇ nehˬ laꞈ tehꞈ-a” lehˇ ehˇ-awˇ gʼaˬ biꞈ nehˬ-euˬ meh.

¹⁷Yawˇnaˆshaˬ ehˇ-eu, “Taˬ guˆ. Ngaˬ da Sawˇluˆ nawˬ-ahˇ tiˬ jeˬ-iˬ maˬ jahˇ laˇ nya-a. Nawˇ Iˇsaˬleˬlaˆ tsawˇ jeuˬ-euˬ sahˬ paˬ ya pyeuꞈ laˇ-awˇ, ngaˇ nawˬ-euˬ laꞈ oˆ teˬ ni jawˇ-awˇ gaˇ ya mˇ-eu gaˇ kawˆ aˬ yawꞈ siˬ duˬ luꞈ meh.”

¹⁸Aˬ yawꞈ nyaꞈ tiˬ gʼaˬ tiˇ gʼaˬ maˬ byehˇ ni cawˬ cawˬ taꞈ-eu gʼaˇ duˬ, muiˬ-eu shawˇ-eu saˇ jaˇ dzaˬ taꞈ-euˬ meh. Kʼoeˇ naˇ, Daˬbiˇ gʼaˬ Hawˇlehˆ-ahˇ jawˇ yaꞈ-awˇ, Yawˇnaˆshaˬ gʼaˬ gʼoꞈ ka-iˇ-euˬ meh.

¹⁹Ziˇpaˬ meuˬ-ahˇ jawˇ-eu tsawˇ haˬ tiˬ paˆ na deuˬ, Giˇbyaˬ meuˬ-ahˇ Sawˇluˆ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Daˬbiˇ-aˬ, nga maꞈ jawˇ-eu Yuˇdaˆ miˇ kʼahˬ bawˇ tsahˬ bawˇ dahˇ-euˬ laꞈ taˆ paw dzeˇ, Haˬciˇlahˬ gawˬ jawˬ-ahˇ jaˆ-eu Hawˇlehˆ lehˇ kuˇ-eu jawˇ duˬ kʼoeˇ tsahˇ-ahˇ dzuˇ zaꞈ luꞈ meh.

²⁰Sahˬ paˬ-oˇ, nawˇ aˬ yawꞈ-ahˇ aˇ naˆ ni nyehꞈ mi mawꞈ-eu nga maꞈ siˬ nya ma. Teu miˇ neh, nga maꞈ-euˬ miˇ kʼahˬ-ahˇ oe-awˬ. Nawˇ aˬ yawꞈ-ahˇ aˬ diˇ ya nyehꞈ mi tehꞈ-a lehˇ nga maꞈ ehˇ tsehˆ peuˬ ma.”

²¹Tsawˇ haˬ kʼoeˇ deuˬ-ahˇ Sawˇluˆ heu loꞈ-ehˇ ehˇ nehˬ-euˬ meh. “Naw maꞈ ngaˬ-ahˇ gʼawˬ shaˬ gaˬ-eu siˬ nya-eu miˇ neh, Sahˬpaˬ Miˬyehˇ naw maꞈ-ahˇ guiˬ lahˬ biꞈ luꞈ-uˇ.

²²Tiˬ poˆ paˇ gʼoꞈ-iˇ-awˇ, yaw muiˬ paˬ-ehˇ paˇ haw duˬ-iˇ-awˬ. Aˬ yawꞈ aˬ geu tsahˇ-ahˇ maˇ diˇ jawˇ-awˇ, aˬ geu gʼaˬ neh mawˇ duˬ taˬ-euˬ gaˇ kawˆ pyehˆ tseˇ duˬ laꞈ-awˬ. Aˬ yawꞈ gahˇ dui dui-eu gaˇ kawˆ aˬ cawˬ ja-eu ngaˇ ya gaˬ-euˬ ma.

²³Aˬ yawꞈ aˬ geu tsahˇ-ahˇ dzuˇ zaꞈ luꞈ nga lehˇ yaw duˬ duˬ-ehˇ haw duˬ-awˇ, ngaˇ jawˇ gaˇ yaw kawˇ-ehˇ cehˆ gaˬ laˇ-awˬ. Kʼoeˇ naˇ, naw maꞈ nehˬ-ehˇ ngaˇ oe-awˇ, gahˬ kaˬ kʼoeˇ kaˬ laꞈ kʼoeˇ aˬ yawꞈ maˬ cehˆ doˆ dah-ehˇ jawˇ naˇ, shaˬ teh teh-eu loꞈ-ehˇ aˬ yawꞈ-ahˇ poˆ ma. Yuˇdaˆ miˇ kʼahˬ kʼahˬ lah ni ya poˆ doe paˬ-ehˇ gʼeh naˇ kʼawꞈ poˆ doe tehꞈ-a.”

²⁴Kʼoeˇ naˇ, tsawˇ haˬ kʼoeˇ deuˬ doˆ-iˇ-awˇ, Sawˇluˆ-euˬ mehˬ hu Ziˇpaˬ meuˬ-ahˇ gʼoꞈ-iˇ-euˬ meh. Daˬbiˇ hawˇ-eu aˬ yawꞈ-euˬ tsawˇ haˬ deuˬ-aˬ, Yuˇdaˆ miˇ kʼahˬ bawˇ tsahˬ bawˇ dahˇ-euˬ laꞈ oˆ dzaˬ-ahˇ jaˆ-eu Maˬoˬ bawˇ tsahˬ bawˇ dahˇ laꞈ kʼoeˇ, ciˬ cuˇ ni jaˆ-eu deh kʼawꞈ-ahˇ jawˇ luꞈ-eu meh.

²⁵Kʼoeˇ ngeh, Sawˇluˆ hawˇ-eu aˬ yawꞈ-euˬ tsawˇ haˬ deuˬ Daˬbiˇ-ahˇ poˆ leˇ-euˬ meh. Ehˇ kʼawꞈ, gaˇ kawˆ kʼoeˇ Daˬbiˇ ya gaˬ-awˇ, Maˬoˬ bawˇ tsahˬ bawˇ dahˇ laꞈ kʼoeˇ jaˆ-eu lo guˇ tehꞈ-ehˇ gʼeh-eu gawˬ jawˬ tiˬ jawˬ kʼoeˇ taˆ le daˆ-euˬ meh. Kʼoeˇ loꞈ-ehˇ le daˆ taˬ-euˬ gaˇ kawˆ Sawˇluˆ paˇ ya gaˬ ngeh, Daˬbiˇ-euˬ mehˬ nah paˇ teh leˇ-euˬ meh.

²⁶Gawˬ jawˬ tiˬ jawˬ-ahˇ tehꞈ-ehˇ, Sawˇluˆ hawˇ-eu aˬ yawꞈ-euˬ tsawˇ haˬ deuˬ tiˬ paw dzeˇ kʼaˇ-ahˇ jawˇ-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ tiˬ paw dzeˇ kʼaˇ-ahˇ jawˇ luꞈ-eu meh. Sawˇluˆ hawˇ-eu aˬ yawꞈ-euˬ tsawˇ haˬ deuˬ teh miˇ laˇ paˬ-ehˇ pyeuꞈ laˇ-awˇ, aˬ yawꞈ maꞈ-ahˇ nyehꞈ mi shaw-iˬ-eu miˇ neh, Daˬbiˇ hawˇ-eu aˬ yawꞈ-euˬ tsawˇ haˬ deuˬ cehˆ tehˇ tehˬ luꞈ-eu meh.

²⁷Kʼoeˇ tiˬ kʼehˇ laˇ kʼehˬ laꞈ kʼoeˇ, tsawˇ haˬ tiˬ gʼaˬ Sawˇluˆ jawˇ gaˇ cehˆ keuˆ laˇ-awˇ, “Yaw kawˇ ma-ehˇ gʼoꞈ le-awˬ. Piˇliˇtiˆ tsawˇ haˬ deuˬ aˬ dui-euˬ miˇ kʼahˬ-ahˇ guiˇ deuˆ-eu lehˇ laˇ luꞈ meh” lehˇ ehˇ gaˬ laˇ-euˬ meh.

²⁸Kʼoeˇ naˇ, Daˬbiˇ mehˬ nah Sawˇluˆ maˬ paˇ caw teh ni byehˇ-awˇ, Piˇliˇtiˆ tsawˇ haˬ deuˬ-ahˇ guiˇ deuˆ-iˇ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ ‘Buˬiˇ law-iˇ-eu Lo guˇ’ lehˇ kuˇ-eu meh.

²⁹Jawˇ duˬ kʼoeˇ tsahˇ-ahˇ neh Daˬbiˇ iˇ doˆ gʼeh-awˇ, Eˬgeˬdiˇ gahˬ kaˬ paw iˇ-awˇ jawˇ zaꞈ-euˬ meh.