Read Akha 1 Saˬmeuˬlaˆ 27 Bible Online

1 Saˬmeuˬlaˆ 27 - Akha bible

1 Saˬmeuˬlaˆ 27

¹Daˬbiˇ-euˬ nui ma laꞈ kʼoeˇ heu loꞈ-ehˇ shaˇ noeˬ luꞈ-eu meh. “Sawˇluˆ ngaˬ-ahˇ sehꞈ laˇ-eu aˇ nah tiˬ nah jaˆ laˇ-eu nga. Piˇliˇtiˆ miˇ kʼahˬ-ahˇ cehˆ jawˇ-iˇ-eu-aˬ, ngaˬ-euˬ gʼaˇ duˬ zaˬ dzehˬ-eu nga. Kʼoeˇ loꞈ-ehˇ jahˇ naˇ, Iˇsaˬleˬlaˆ miˇ kʼahˬ laꞈ kʼoeˇ Sawˇluˆ ngaˬ-ahˇ maˬ paˇ poˆ nya-eu miˇ neh, ngaˇ ya buˬ-iˇ tehꞈ-a.”

²Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ koꞈ yaˇ gʼaˬ tiˬ poˆ tehꞈ-ehˇ doˆ-iˇ-awˇ, Gaˬdaˇ sahˬ paˬ Maˬoˆ-euˬ aˬ li Aˬkiˇ jawˇ gaˇ cehˆ uˇ-iˇ-euˬ meh.

³Daˬbiˇ hawˇ-eu aˬ yawꞈ-euˬ tsawˇ haˬ deuˬ-aˬ, aˬ yawꞈ maꞈ-euˬ miˬ sawˇ zaˬ deuˬ nehˬ-ehˇ tiˬ kawˆ loꞈ-ehˇ, Gaˬdaˇ meuˬ-ahˇ jawˇ-euˬ meh. Daˬbiˇ-euˬ miˬ zaˬ deuˬ pyeuꞈ-eu Yeˬzaˬleˬlaˇ meuˬ-ahˇ jawˇ-eu Aˬhiˇnoˬ hawˇ-eu, Gaˬlaˬmeˬlaˇ meuˬ-ahˇ jawˇ-eu Naˬbaˬlaˇ-euˬ miˬ coeˬ miˬ ma Aˬbiˇgeˬlaˆ aˬ nyaꞈ kʼawꞈ, Daˬbiˇ nehˬ-ehˇ kʼoeˇ gaˇ jawˇ-euˬ meh.

⁴Daˬbiˇ Gaˬdaˇ meuˬ-ahˇ cehˆ jawˇ-iˇ-euˬ gaˇ kawˆ Sawˇluˆ ya gaˬ ngeh, Daˬbiˇ-ahˇ maˬ paˇ poˆ ni byehˇ-euˬ meh.

⁵Aˬkiˇ-ahˇ Daˬbiˇ ehˇ nehˬ-eu, “Nawˇ ngaˬ-euˬ cawˬ pyeuꞈ-eu ma lehˇ ngeuˇ naˇ, ngaˇ jawˇ-eu gʼaˇ duˬ meuˬ meuˬ zaˬ tiˬ meuˬ biꞈ laꞈ sheˇ. Sahˬ paˬ jawˇ duˬ meuˬ pyeuꞈ-eu Gaˬdaˇ meuˬ heu meuˬ laꞈ kʼoeˇ, nawˬ nehˬ-ehˇ tiˬ kawˆ loꞈ-ehˇ ngaˇ jawˇ-eu maˬ loˬ-aˇ.”

⁶Kʼoeˇ ngeh, Aˬkiˇ neh Daˬbiˇ-ahˇ Ziˇkaˬlehˆ meuˬ biꞈ-awˇ bi jawˇ-euˬ meh. Kʼoeˇ miˇ neh, kʼoeˇ ngeh nah neh aˇ dahˬ beh-awˇ, Ziˇkaˬlehˆ meuˬ kʼoeˇ meuˬ Yuˇdaˆ sahˬ paˬ deuˬ-ahˇ taꞈ-eu meuˬ pyeuꞈ laˇ-euˬ meh.

⁷Piˇliˇtiˆ miˇ kʼahˬ laꞈ kʼoeˇ, ba la tseˇ koꞈ siˬ Daˬbiˇ jawˇ-euˬ meh.

⁸Aˇ nah aˇ yamˬ kʼoeˇ yamˬ laꞈ kʼoeˇ, miˇ tsaˬ kʼoeˇ tsahˇ-ahˇ gʼawˬ myahˇ ni jawˇ keuˆ laꞈ-euˬ tsawˇ haˬ deuˬ pyeuꞈ-eu, Geˬshuˇlaˆ tsawˇ jeuˬ, Geˬlaˬziˇ tsawˇ jeuˬ, Aˬmaˬlehˇ tsawˇ jeuˬ kʼoeˇ deuˬ-ahˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ guiˇ deuˆ-euˬ meh. Shuˇyaˆ meuˬ-ahˇ neh Iˇjiˇtuˆ miˇ kʼahˬ-ahˇ tuˆ ni, aˬ yawꞈ maꞈ-euˬ miˇ kʼahˬ-ahˇ Daˬbiˇ guiˇ deuˆ-euˬ meh.

⁹Kʼaˬ dzeˇ zaˬ hawˇ-eu zaˬ miˬ zaˬ dawˬ tawˆ luꞈ-ahˇ aˬ yawꞈ maꞈ sehꞈ-awˇ, yawˇ, mawˇ neˇ, mahˬ tahˬ laˆ, law taw heu deuˬ tsahˇ geuꞈ-euˬ uˬ taꞈ, dm gʼaˬ dm lmˇ-ahˇ keuˆ ni yuˇ-awˇ, Aˬkiˇ jawˇ gaˇ gʼoꞈ leˇ-euˬ meh.

¹⁰“Heu poˆ jawˇ nawˇ aˬ geu paw guiˇ deuˆ-iˇ teˬ” lehˇ, aˬ yawꞈ-ahˇ Aˬkiˇ naˇ haˬ ngeh, Yuˇdaˆ miˇ kʼahˬ laꞈ oˆ dzaˬ-ahˇ loˇ, Yeˬlaˬmeˬlaˇ tsawˇ jeuˬ-euˬ miˇ kʼahˬ-ahˇ loˇ, Kaˬnaˆ tsawˇ jeuˬ-eu miˇ kʼahˬ-ahˇ loˇ lehˇ, tiˬ gaˇ paw aˬ yawꞈ toeˬ mehˬ nehˬ-awˇ, kʼoeˇ gaˇ guiˇ deuˆ-iˇ-euˬ ma lehˇ ehˇ kʼoꞈ nehˬ-euˬ meh.

¹¹Aˬ yawꞈ hawˇ-eu aˬ yawꞈ-euˬ tsawˇ haˬ deuˬ neh mˇ yaꞈ-euˬ jeˬ-ahˇ, kʼaˇ ngeuˇ-eu loꞈ-ehˇ Gaˬdaˇ meuˬ-ahˇ maˬ bi gaˬ keuˆ leˇ-eu gʼaˇ duˬ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, dawˬ tawˆ luꞈ-ahˇ aˬ yawꞈ sehꞈ jiˇ-euˬ meh. Daˬbiˇ Piˇliˇtiˆ miˇ kʼahˬ-ahˇ jawˇ-eu aˇ yamˬ laꞈ kʼoeˇ, kʼoeˇ loꞈ-ehˇ tehꞈ-ehˇ mˇ mˇ-ehˇ jawˇ-euˬ meh.

¹²Aˬkiˇ-euˬ nui ma laꞈ kʼoeˇ, “Daˬbiˇ-euˬ tsawˇ jeuˬ Iˇsaˬleˬlaˆ tsawˇ haˬ deuˬ Daˬbiˇ-ahˇ bye dui dui-eu miˇ neh, maˬ shiˇ tiˬ ziˇ ngaˬ-euˬ zaˬ kʼaˆ aˬ yawꞈ ya geuꞈ-eu ngaˇ” lehˇ noeˬ-awˇ, Daˬbiˇ-ahˇ jah dui dui-euˬ meh.