Read Akha 1 Saˬmeuˬlaˆ 29 Bible Online

1 Saˬmeuˬlaˆ 29 - Akha bible

1 Saˬmeuˬlaˆ 29

¹Yeˬzaˬleˬlaˇ deh kʼawꞈ-ahˇ jaˆ-eu iˇ cuꞈ iˇ beuˆ dawˬ peh Iˇsaˬleˬlaˆ tsawˇ haˬ deuˬ taˆ tsoˆ-awˇ jawˇ ngeh, Piˇliˇtiˆ tsawˇ haˬ deuˬ yehˇ dawˬ tawˆ luꞈ-ahˇ, Aˬpyehˇ meuˬ-ahˇ sheuˬ keuˆ laꞈ-euˬ meh.

²Piˇliˇtiˆ sahˬ paˬ ngaˬ gʼaˬ-aˬ, aˇ yaˇ gʼaˬ, aˇ heˇ gʼaˬ lehˇ biˇ paˆ taˬ-euˬ aˬ yawꞈ maꞈ-euˬ guiˇ maꞈ deuˬ nehˬ-ehˇ, mehˬ hu paw cah luꞈ-eu meh. Daˬbiˇ hawˇ-eu aˬ yawꞈ-euˬ tsawˇ haˬ deuˬ-aˬ, sahˬ paˬ Aˬkiˇ nehˬ-ehˇ mehˬ nah paw cah-euˬ meh.

³Piˇliˇtiˆ guiˇ maꞈ deuˬ kʼoeˇ taˆ uˆ lahˇ-eu yaw huiˬ yaw mahˇ deuˬ Daˬbiˇ hawˇ-eu aˬ yawꞈ-euˬ tsawˇ haˬ deuˬ-ahˇ mawˇ-awˇ, “Heˬbyehˇ tsawˇ haˬ heu deuˬ heu gaˇ aˬ jeˬ jahˇ luꞈ ta” lehˇ naˇ haˬ-euˬ meh. Aˬkiˇ ehˇ-eu, “Heu-aˬ, Daˬbiˇ lehˇ kuˇ-eu Iˇsaˬleˬlaˆ sahˬ paˬ Sawˇluˆ-euˬ gaˇ mˇ-eu yaw huiˬ yaw mahˇ tiˬ gʼaˬ meh. Aˬ yawꞈ ngaˬ nehˬ-ahˇ jawˇ luꞈ-eu myahˇ laˇ-euˬ meh. Ngaˬ nehˬ-ehˇ jawˇ le ngeh tiˬ nah neh, ngaˬ-euˬ mehˬ shi aˬ yawꞈ neh mˇ lehˬ taˬ-euˬ tiˬ jeˬ-iˬ maˬ jaˆ-a.”

⁴Ehˇ kʼawꞈ, Piˇliˇtiˆ guiˇ maꞈ deuˬ kʼoeˇ taˆ uˆ lahˇ-eu yaw huiˬ yaw mahˇ kʼoeˇ deuˬ Aˬkiˇ-ahˇ nui ma pehˇ laˇ-awˇ ehˇ-eu, “Tsawˇ haˬ heu gʼaˬ-ahˇ nawˬ neh biꞈ taˬ-euˬ meuˬ-ahˇ bi gʼoꞈ-iˇ-awˬ. Aˬ dui maꞈ guiˇ deuˆ gaˇ taˬ bi laˇ. Nymˬ-mˇ guiˇ deuˆ gaˇ keuˆ leˇ naˇ, aˬ dui maꞈ-ahˇ aˬ yawꞈ paˇ deuˆ laˇ tehꞈ-a. Aˬ yawꞈ-euˬ sahˬ paˬ aˬ yawꞈ-ahˇ nui kʼahˇ shiˇ ni mˇ-eu gʼaˇ duˬ, aˬ dui-euˬ tsawˇ haˬ-ahˇ sehꞈ-eu naˆ maˬ tseˇ muiˬ dzehˬ-eu gaˇ ma, aˬ yawꞈ gʼaˇ duˬ aˬ gaˇ paˇ dahˇ ta.

⁵Uˬ duˬ ya ehˇ duˬ leꞈ naˇ, zaˬ miˬ zaˬ deuˬ gaˇ nyeh nyeh nyeh-ehˇ, Sawˇluˆ aˇ heˇ gʼaˬ sehꞈ-awˇ, Daˬbiˇ aˇ muiˇ gʼaˬ sehꞈ-euˬ meh lehˇ caˇ-eu kʼoeˇ, aˬ yawꞈ-ahˇ caˇ nehˬ-eu meh.”

⁶Kʼoeˇ ngeh, Aˬkiˇ neh Daˬbiˇ-ahˇ kuˇ-awˇ heu loꞈ-ehˇ ehˇ nehˬ-euˬ meh. “Nawˇ-aˬ, ngaˬ-ahˇ saˇ jaˇ ziꞈ-eu tsawˇ haˬ pyeuꞈ-eu gaˇ kawˆ, Iˇsaˬleˬlaˆ tsawˇ jeuˬ-euˬ dehꞈ luꞈ-eu Miˬyehˇ mehˬ shi ngaˇ kamˬ-eu ma. Nawˇ ngaˬ nehˬ-ehˇ tiˬ kawˆ loꞈ-ehˇ le-awˇ guiˇ deuˆ-eu gʼaˇ duˬ, ngaˇ nui ma tsaˬ-euˬ ma. Nawˇ ngaˬ nehˬ-ehˇ jawˇ le ngeh tiˬ nah neh, nawˇ yaw lehˬ jeˬ mˇ-eu ngaˇ maˬ mawˇ haw-aˬ.

⁷Ehˇ kʼawꞈ, sahˬ paˬ nui deuˬ nawˬ-ahˇ nui ma maˬ tsaˬ-a. Kʼoeˇ miˇ neh, ciˬ cuˇ ni gʼoꞈ-iˇ-awˇ, aˬ yawꞈ maꞈ nui ma maˬ tsaˬ-eu jeˬ maˬ mˇ ni jawˇ-iˇ-awˬ.”

⁸Daˬbiˇ ehˇ-eu, “Sahˬ paˬ-oˇ, ngaˇ aˬ jeˬ mˇ lehˬ taˬ-euˬ jaˆ ta. Nawˇ ehˇ-eu loꞈ-ehˇ, nawˬ nehˬ-ehˇ ngaˇ jawˇ le ngeh tiˬ nah neh, ngaˬ neh mˇ lehˬ-euˬ jeˬ-ahˇ nawˇ maˬ ya mawˇ-euˬ ngeuˇ naˇ, ngaˬ-euˬ sahˬ paˬ pyeuꞈ-eu nawˬ nehˬ-ehˇ ngaˇ le-awˇ, nawˬ-ahˇ muiˇ-eu deuˬ-ahˇ aˬ jeˬ miˇ neh guiˇ maˬ ya deuˆ leˇ ta.”

⁹Daˬbiˇ-ahˇ Aˬkiˇ ehˇ nehˬ-eu, “Nawˇ ehˇ-eu tsaˬ meh. Miˬyehˇ-euˬ mˬ taˆ gʼaˬ kʼehˇ tiˬ gʼaˬ loꞈ-ehˇ nawˇ saˇ jaˇ ziꞈ meh lehˇ ngaˇ jah-eu ma. Ehˇ kawꞈ, nawˬ-ahˇ nga maꞈ nehˬ-ehˇ guiˇ deuˆ gaˇ maˬ bi le nya-a lehˇ, sahˬ paˬ nui deuˬ ehˇ-eu meh.

¹⁰Kʼoeˇ miˇ neh Daˬbiˇ-oˇ, Sawˇluˆ-ahˇ byehˇ dzeh yaꞈ-awˇ ngaˬ nehˬ-ehˇ kʼaˇ jawˇ le-euˬ naw maꞈ yawˬ gʼaˬ na luꞈ, ni shawˬ uˬ shawˬ yaw naꞈ-ehˇ tuˇ-awˇ, uˬ bya bya laˇ-eu nehˬ-ehˇ gʼoꞈ-iˇ-awˬ.”

¹¹Yawˬ nah yawˬ uˬ shawˬ yaw naꞈ-ehˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ Piˇliˇtiˆ miˇ kʼahˬ paw gʼoꞈ-iˇ-eu lehˇ doˆ-iˇ-awˇ, Piˇliˇtiˆ tsawˇ haˬ deuˬ-aˬ, Yeˬzaˬleˬlaˇ meuˬ paw le gʼeh leꞈ-euˬ meh.