Read Akha 1 Saˬmeuˬlaˆ 3 Bible Online

1 Saˬmeuˬlaˆ 3 - Akha bible

1 Saˬmeuˬlaˆ 3

¹Eˇliˆ neh mehˬ nehˬ tsoˆ nehˬ-euˬ loꞈ-ehˇ, Sahˬpaˬ Miˬyehˇ-euˬ gaˇ-ahˇ Saˬmeuˬlaˆ mˇ luꞈ-eu aˇ nah aˇ yamˬ kʼoeˇ yamˬ laꞈ kʼoeˇ, Sahˬpaˬ Miˬyehˇ neh bi tsaꞈ le-euˬ dawˬ-ahˇ yaw kʼaˆ-ehˇ maˬ ya gaˬ-ehˇ, Sahˬpaˬ Miˬyehˇ neh pah mehˬ nehˬ-euˬ jeˬ-ahˇ kʼawꞈ yaw kʼaˆ-ehˇ maˬ ya mawˇ ni pyeuꞈ-iˇ-euˬ meh.

²Tiˬ miˇ keuˆ laˇ ngeh, myaˆ nuiˆ yaw kʼaˆ-ehˇ maˬ mawˇ shawˇ nya-ehˇ pyeuꞈ-iˇ-euˬ Eˇliˆ-aˬ, aˬ yawꞈ jawˇ-eu kuˆ lawˆ-ahˇ yuꞈ luꞈ-eu meh.

³Saˬmeuˬlaˆ-aˬ, Sahˬpaˬ Miˬyehˇ jawˇ-eu Sehˬ gʼawˆ-ahˇ jaˆ-eu Dawˬ ma saˇ jaˇ Bahˬ keuˆ dawˬ peh yuꞈ luꞈ-eu meh. Uˬ bya bya taw maˬ taw laˇ-euˬ miˇ neh, tsiˇ kʼmˬ maˬ miˆ-iˇ ni doꞈ luꞈ-eu meh.

⁴Kʼoeˇ ngeh, Sahˬpaˬ Miˬyehˇ Saˬmeuˬlaˆ-ahˇ kuˇ-awˇ, Saˬmeuˬlaˆ oˬ toˬ-euˬ meh.

⁵Kʼoeˇ naˇ, Eˇliˆ jawˇ gaˇ aˬ yawꞈ cehˆ gʼeh-awˇ, “Nawˇ ngaˬ-ahˇ kuˇ te loˇ. Ngaˇ heu gaˇ jawˇ ma” lehˇ ehˇ nehˬ-euˬ meh. Ehˇ kʼawꞈ, “Ngaˇ nawˬ-ahˇ maˬ kuˇ. Gʼoꞈ yuꞈ-iˇ-awˬ” lehˇ, Eˇliˆ aˬ yawꞈ-ahˇ ehˇ-eu miˇ neh, Saˬmeuˬlaˆ paˇ gʼoꞈ yuꞈ-iˇ-euˬ meh.

⁶Saˬmeuˬlaˆ-ahˇ Sahˬpaˬ Miˬyehˇ tiˬ poˆ paˇ kuˇ le-euˬ meh. Saˬmeuˬlaˆ paˇ tsawˬ tuˇ laˇ-awˇ, Eˇliˆ jawˇ gaˇ iˇ-awˇ, “Nawˇ ngaˬ-ahˇ kuˇ te loˇ. Ngaˇ heu gaˇ jawˇ ma” lehˇ ehˇ nehˬ-euˬ meh. Eˇliˆ gʼeh, “Ngaˬ li-oˇ. Ngaˇ nawˬ-ahˇ maˬ kuˇ. Gʼoꞈ yuꞈ-iˇ-awˬ” lehˇ ehˇ nehˬ-euˬ meh.

⁷Sahˬpaˬ Miˬyehˇ aˬ yawꞈ-ahˇ dawˬ maˬ ngehˬ cawˬ le haw-euˬ miˇ neh, Sahˬpaˬ Miˬyehˇ-ahˇ Saˬmeuˬlaˆ maˬ siˬ nya-a siˬ.

⁸Kʼoeˇ naˇ, Saˬmeuˬlaˆ-ahˇ Sahˬpaˬ Miˬyehˇ smˬ poˆ tiˬ poˆ paˇ kuˇ le-euˬ meh. Kʼoeˇ ngeh poˆ kʼawꞈ, Saˬmeuˬlaˆ tsawˬ tuˇ laˇ-awˇ, Eˇliˆ jawˇ gaˇ paˇ iˇ-awˇ, “Nawˇ ngaˬ-ahˇ kuˇ te loˇ. Ngaˇ heu gaˇ jawˇ ma” lehˇ paˇ ehˇ nehˬ-iˇ-euˬ meh. Kʼoeˇ ngeh poˆ jawˇ, “Aˬ li heu li-ahˇ kuˇ le-euˬ gʼaˬ-aˬ, Sahˬpaˬ Miˬyehˇ ngaˇ” lehˇ, Eˇliˆ noeˬ siˬ-euˬ meh.

⁹Kʼoeˇ miˇ neh, Saˬmeuˬlaˆ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Nawˇ gʼoꞈ yuꞈ-iˇ-awˬ. Nawˬ-ahˇ tiˬ poˆ paˇ kuˇ laˇ naˇ, ‘Sahˬpaˬ Miˬyehˇ-oˇ, nawˬ-euˬ dawˬ-ahˇ nawˬ-euˬ zaˬ kʼaˆ naˇ haˬ luꞈ ma’ lehˇ ehˇ kʼoꞈ nehˬ-awˬ” lehˇ ehˇ nehˬ-euˬ meh. Kʼoeˇ ngeh, Saˬmeuˬlaˆ paˇ gʼoꞈ yuꞈ-iˇ-euˬ meh.

¹⁰Sahˬpaˬ Miˬyehˇ kʼoeˇ gaˇ yawꞈ le-awˇ, yaw beh kuˇ-eu loꞈ-ehˇ “Saˬmeuˬlaˆ-oˇ, Saˬmeuˬlaˆ-oˇ” lehˇ kuˇ le-euˬ meh. Saˬmeuˬlaˆ gʼeh, “Nawˬ-euˬ dawˬ-ahˇ nawˬ-euˬ zaˬ kʼaˆ naˇ haˬ luꞈ ma” lehˇ ehˇ kʼoꞈ nehˬ-euˬ meh.

¹¹Saˬmeuˬlaˆ-ahˇ Sahˬpaˬ Miˬyehˇ ehˇ nehˬ-eu, “Tiˬ nah keuˆ laˇ naˇ, guˆ dui dui laˇ paˬ-ehˇ gʼeh-eu jeˬ Iˇsaˬleˬlaˆ tsawˇ jeuˬ kʼoeˇ taˆ ngaˇ bi keuˆ le-awˇ, gaˇ kawˆ kʼoeˇ kʼaˇ ya gaˬ-eu tsawˇ haˬ yawˬ gʼaˬ na luꞈ, myaꞈ leˇ tehꞈ-a.

¹²Eˇliˆ-euˬ nymˇ jiˇ kʼoeˇ taˆ bi keuˆ le ma lehˇ ngaˬ neh kʼaˇ ehˇ taˬ-euˬ jeˬ dawˬ tawˆ luꞈ, aˇ dahˬ beh gaˇ neh aˇ saˬ saˬ gaˇ keuˆ ni kʼoeˇ ngeh nah laꞈ kʼoeˇ bi keuˆ le jiˇ ma.

¹³Aˬ yawꞈ-euˬ aˬ li deuˬ ngaˬ-ahˇ ngehˬ bahˬ tmˇ bahˬ-euˬ miˇ neh, aˬ yawꞈ-euˬ nymˇ jiˇ-ahˇ aˬ myah luꞈ ngaˇ kʼehˬ nehˬ ma lehˇ, Eˇliˆ-ahˇ ngaˇ ehˇ nehˬ taˬ-euˬ jaˆ-eu ma. Aˬ yawꞈ maꞈ kʼoeˇ loꞈ-ehˇ gʼeh luꞈ-eu Eˇliˆ siˬ nya kʼawꞈ, aˬ yawꞈ maꞈ-ahˇ maˬ laˆ tsoeˬ-a.

¹⁴Huiˬ dui dui-eu iˬ baˇ heu hmˬ baˬ da neh keuˆ le-eu luˬ-iˇ seˇ-iˇ-eu jeˬ-ahˇ ya buˬ-iˇ ni, lawˇ-eu shehˇ-eu jeˬ hawˇ-eu damˬ nehˬ-eu jeˬ neh maˬ paˇ jahˇ dzeuˇ nya meh lehˇ, Eˇliˆ-euˬ nymˇ jiˇ-ahˇ ngaˇ maˇ jawˆ ni ehˇ nehˬ taˬ-euˬ ma.”

¹⁵Saˬmeuˬlaˆ-aˬ, uˬ shawˬ uˬ bya bya laˇ ngeh keuˆ ni yuꞈ-euˬ meh. Kʼoeˇ naˇ, aˬ yawꞈ tuˇ-awˇ, Sahˬpaˬ Miˬyehˇ-euˬ nymˇ laˇ gʼoˆ pah-euˬ meh. Yaw sahˇ laꞈ kʼoeˇ aˬ yawꞈ ya siˬ ya mawˇ-euˬ je, Eˇliˆ-ahˇ aˬ yawꞈ maˬ dzawˇ nehˬ peuˬ-a.

¹⁶“Aˬ li Saˬmeuˬlaˆ-oˇ” lehˇ Eˇliˆ aˬ yawꞈ-ahˇ kuˇ laˇ ngeh, aˬ yawꞈ oˬ toˬ kʼoꞈ nehˬ-euˬ meh.

¹⁷“Sahˬpaˬ Miˬyehˇ nawˬ-ahˇ aˬ jeˬ ehˇ ta. Tiˬ jeˬ-iˬ maˬ zaꞈ taˬ ni ngaˬ-ahˇ dzawˇ mehˬ nehˬ laꞈ sheˇ. Aˬ yawꞈ neh nawˬ-ahˇ kʼaˇ ehˇ nehˬ-euˬ yawˬ jeˬ na luꞈ nawˇ ngaˬ-ahˇ maˬ dzawˇ nehˬ laꞈ naˇ, Miˬyehˇ nawˬ-ahˇ yaw kʼaˆ-ehˇ kʼehˬ nehˬ laꞈ tehꞈ-a” lehˇ ehˇ nehˬ-euˬ meh.

¹⁸Kʼoeˇ ngeh, Sahˬpaˬ Miˬyehˇ neh kʼaˇ ehˇ nehˬ-euˬ jeˬ dawˬ tawˆ luꞈ, tiˬ jeˬ-iˬ maˬ zaꞈ taˬ ni, Eˇliˆ-ahˇ Saˬmeuˬlaˆ dzawˇ nehˬ jiˇ-euˬ meh. Eˇliˆ ehˇ-eu, “Aˬ yawꞈ Sahˬpaˬ Miˬyehˇ pyeuꞈ-eu miˇ neh, aˬ yawꞈ neh muiˬ meh lehˇ kʼaˇ noeˬ-euˬ jeˬ aˬ yawꞈ mˇ tehꞈ-a.”

¹⁹Saˬmeuˬlaˆ huiˬ laˇ luꞈ-eu loꞈ-ehˇ, Sahˬpaˬ Miˬyehˇ aˬ yawꞈ nehˬ-ehˇ jawˇ-awˇ, aˬ yawꞈ neh kʼaˇ ehˇ-euˬ jeˬ bi pyeuꞈ laˇ-euˬ meh.

²⁰Kʼoeˇ miˇ neh, Saˬmeuˬlaˆ Sahˬpaˬ Miˬyehˇ gʼaˇ duˬ ngehˬ dah-eu gʼaˬ maˇ maˇ ni pyeuꞈ-eu gaˇ kawˆ, Iˇsaˬleˬlaˆ miˇ kʼahˬ doe ni kʼaˇ jawˇ-eu tsawˇ haˬ dawˬ tawˆ luꞈ siˬ nya jiˇ-euˬ meh.

²¹Sahˬpaˬ Miˬyehˇ-aˬ, Saˬmeuˬlaˆ jawˇ gaˇ oe-awˇ dawˬ ngehˬ cawˬ le-euˬ jawˇ duˬ pyeuꞈ-eu Shiˇloˬ meuˬ-ahˇ, aˬ yawꞈ-euˬ gʼawˇ mawˇ maˬ tsehˆ leˇ ni pah mehˬ-euˬ meh. Saˬmeuˬlaˆ dawˬ kʼaˇ ngehˬ doˆ laˇ ngeh, Iˇsaˬleˬlaˆ miˇ kʼahˬ kʼahˬ lah ni naˇ haˬ geuꞈ-eu meh.