Read Akha 1 Saˬmeuˬlaˆ 7 Bible Online

1 Saˬmeuˬlaˆ 7 - Akha bible

1 Saˬmeuˬlaˆ 7

¹Kʼoeˇ ngeh, Giˇliˇyaˆyeˬlmˬ meuˬ-ahˇ jawˇ-eu tsawˇ haˬ deuˬ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ laˬ le-awˇ, gawˬ duˇ kʼoeˇ taˆ tsoˆ taˬ-euˬ Aˬbiˇnaˬdehˇ-euˬ nymˇ-ahˇ baꞈ taˬ-euˬ meh. Kʼoeˇ naˇ, aˬ yawꞈ-euˬ aˬ li Eˇlaˬzaˬ gʼaˬ-ahˇ Sahˬpaˬ Miˬyehˇ-ahˇ a nehˬ-awˇ, Dawˬ ma saˇ jaˇ Bahˬ keuˆ-ahˇ haw-eu pyaˆ-eu gʼaˬ bi geuꞈ-euˬ meh.

²Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-aˬ, Giˇliˇyaˆyeˬlmˬ meuˬ laꞈ kʼoeˇ, nyiˬ tseˇ kʼoꞈ ehˇ gʼaˬ ni jaˆ-euˬ meh. Aˇ yamˬ kʼoeˇ yamˬ laꞈ kʼoeˇ, Iˇsaˬleˬlaˆ tsawˇ haˬ dawˬ tawˆ luꞈ Sahˬpaˬ Miˬyehˇ bi caw ba le-eu gʼaˇ duˬ guˇ guˇ-ehˇ shaˇ-euˬ meh.

³Iˇsaˬleˬlaˆ tsawˇ haˬ deuˬ-ahˇ Saˬmeuˬlaˆ laˇ ehˇ nehˬ-eu, “Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ jawˇ gaˇ gʼoꞈ laˇ ma lehˇ ngeuˇ naˇ, aˬ cawˬ tsawˇ jeuˬ-euˬ miˬ yehˇ dawˬ tawˆ luꞈ hawˇ-eu Aˬshaˇtaˬyoˇ miˬ yehˇ ma-euˬ tahˬ pahˬ aˬ ma mawˇ kawˇ-ahˇ naw maꞈ ya byehˇ dzeh yaꞈ meh. Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-ahˇ aˬ diˇ aˬ maˇ a nehˬ-awˇ, aˬ yawꞈ-ahˇ tehꞈ-ehˇ uˬ duˬ tahˬ-awˬ. Piˇliˇtiˆ tsawˇ haˬ-euˬ aˬ laꞈ laꞈ kʼoeˇ, naw maꞈ-ahˇ aˬ yawꞈ ka kʼoꞈ nehˬ laꞈ tehꞈ-a.”

⁴Kʼoeˇ naˇ, Baˬlaˇ miˬ yehˇ hawˇ-eu Aˬshaˇtaˬyoˇ miˬ yehˇ ma-euˬ tahˬ pahˬ aˬ ma mawˇ kawˇ deuˬ-ahˇ Iˇsaˬleˬlaˆ tsawˇ haˬ deuˬ byehˇ dzeh-awˇ, Sahˬpaˬ Miˬyehˇ-ahˇ tehꞈ-ehˇ uˬ duˬ tahˬ-euˬ meh.

⁵Kʼoeˇ naˇ, Saˬmeuˬlaˆ ehˇ-eu, “Iˇsaˬleˬlaˆ tsawˇ haˬ deuˬ dawˬ tawˆ luꞈ-ahˇ Miˇzaˬpaˬ meuˬ-ahˇ kuˇ uiˬ-awˬ. Naw maꞈ gʼaˇ duˬ Sahˬpaˬ Miˬyehˇ-ahˇ ngaˇ kʼoeˇ gaˇ guiˬ lahˬ shaˇ ma.”

⁶Kʼoeˇ ngeh, aˬ yawꞈ maꞈ dawˬ tawˆ luꞈ Miˇzaˬpaˬ meuˬ-ahˇ uiˬ laˇ jiˇ-euˬ meh. Aˬ yawꞈ maꞈ iˇ cuꞈ kʼawꞈ-awˇ shehˆ-eu laꞈ kʼoeˇ, Sahˬpaˬ Miˬyehˇ-ahˇ lawˇ nehˬ-awˇ, maˬ dzaˬ maˬ dawˇ ni nah lah lah-euˬ meh. “Nga maꞈ Sahˬpaˬ Miˬyehˇ mehˬ shi iˬ baˇ mˇ-euˬ ma” lehˇ aˬ yawꞈ maꞈ ehˇ-eu meh. Saˬmeuˬlaˆ-aˬ, Miˇzaˬpaˬ meuˬ-ahˇ jawˇ-awˇ, Iˇsaˬleˬlaˆ tsawˇ haˬ yaw kaˬ ja dzaˬ gaˇ yaˇ kʼaˬ daˇ nehˬ-euˬ meh.

⁷Iˇsaˬleˬlaˆ tsawˇ haˬ deuˬ Miˇzaˬpaˬ meuˬ-ahˇ uiˬ leˇ-awˇ jawˇ-eu gaˇ kawˆ Piˇliˇtiˆ tsawˇ haˬ deuˬ ya gaˬ ngeh, Piˇliˇtiˆ sahˬ paˬ kʼoeˇ ngaˬ gʼaˬ aˬ yawꞈ maꞈ-euˬ tsawˇ haˬ sheuˬ-awˇ, guiˇ deuˆ-eu lehˇ laˇ-euˬ meh. Gaˇ kawˆ kʼoeˇ Iˇsaˬleˬlaˆ tsawˇ haˬ deuˬ ya gaˬ ngeh, guˆ-euˬ meh.

⁸“Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ aˬ dui-ahˇ ka kʼoꞈ nehˬ laꞈ ni, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ tehˇ tehˬ-awˬ” lehˇ, Saˬmeuˬlaˆ-ahˇ aˬ yawꞈ maꞈ ehˇ nehˬ-euˬ meh.

⁹Saˬmeuˬlaˆ yawˇ zaˬ tiˬ mawˇ sehꞈ-awˇ, mawˇ lah-ehˇ miˬ dzaˬ-ahˇ dzah puiˆ-awˇ Sahˬpaˬ Miˬyehˇ-ahˇ lawˇ nehˬ-euˬ meh. Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ bi caw ba-eu gʼaˇ duˬ Sahˬpaˬ Miˬyehˇ-ahˇ aˬ yawꞈ guiˬ lahˬ shaˇ-awˇ, aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-euˬ meh.

¹⁰Saˬmeuˬlaˆ lawˇ luꞈ sehˇ luꞈ ngeh, Piˇliˇtiˆ tsawˇ haˬ deuˬ mehˬ hu paw jiˆ laˇ-awˇ guiˇ deuˆ-eu lehˇ gʼeh-eu meh. Ehˇ kʼawꞈ, mˬ kʼoeˇ taˆ neh Sahˬpaˬ Miˬyehˇ aˬ yawꞈ maꞈ-ahˇ mˬ jeˬ tsawˬ tehˆ tehˆ nehˬ-euˬ meh. Aˬ yawꞈ maꞈ teuˆ bahˬ teuˆ lahˇ jiˇ-awˇ, guˆ dui dui-eu laꞈ kʼoeˇ cehˆ byaˆ jiˇ-euˬ meh.

¹¹Iˇsaˬleˬlaˆ tsawˇ haˬ deuˬ Miˇzaˬpaˬ meuˬ-ahˇ neh baˬ maꞈ puˇ jeˬ-ehˇ doˆ le-awˇ, Piˇliˇtiˆ tsawˇ haˬ deuˬ-ahˇ gaˇ pehˇ kahˇ li sehꞈ sehꞈ-ehˇ teh-awˇ, Behˬgaˬ meuˬ-euˬ dzahˇ dahˬ-ahˇ keuˆ ni teh keuˆ-euˬ meh.

¹²Kʼoeˇ naˇ, Saˬmeuˬlaˆ kʼaˬ lo tiˬ siˬ yuˇ-awˇ, Miˇzaˬpaˬ meuˬ hawˇ-eu Yeˬshaˬnahˬ meuˬ yaw kaˬ-ahˇ ka tuˇ-awˇ, “Sahˬpaˬ Miˬyehˇ iˬ nah keuˆ ni aˬ dui-ahˇ caw ba luꞈ meh” lehˇ ehˇ-awˇ, kʼaˬ lo kʼoeˇ siˬ-ahˇ Eˇbaˬneˬzaˬ[3] lehˇ myahˇ nehˬ-euˬ meh.

¹³Piˇliˇtiˆ tsawˇ haˬ deuˬ kʼoeˇ loꞈ-ehˇ guiˇ deuˆ smˬ-awˇ, Saˬmeuˬlaˆ yaw dehꞈ kʼaˇ dehꞈ-euˬ tiˬ ziˇ, aˬ yawꞈ maꞈ Iˇsaˬleˬlaˆ tsawˇ haˬ deuˬ-ahˇ guiˇ maˬ deuˆ laˇ nya ni, Sahˬpaˬ Miˬyehˇ neh laˆ tsoeˬ nehˬ-euˬ meh.

¹⁴Eˇkaˬloˬ meuˬ hawˇ-eu Gaˬdaˇ meuˬ yaw kaˬ-ahˇ jaˆ-eu Piˇliˇtiˆ tsawˇ haˬ deuˬ neh deuˆ za-euˬ meuˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ-euˬ laꞈ-ahˇ paˇ ahˇ leˇ jiˇ-awˇ, Iˇsaˬleˬlaˆ tsawˇ haˬ deuˬ yawˬ ha-euˬ miˇ kʼahˬ dawˬ tawˆ luꞈ paˇ za kʼoꞈ-euˬ meh. Iˇsaˬleˬlaˆ tsawˇ haˬ-aˬ, Kaˬnaˬ tsawˇ haˬ nehˬ-ehˇ kʼawꞈ guiˇ maˬ deuˆ ni tsaˬ leˇ-eu laꞈ kʼoeˇ jawˇ-euˬ meh.

¹⁵Saˬmeuˬlaˆ-aˬ, aˬ yawꞈ yaw dehꞈ kʼaˇ dehꞈ-euˬ tiˬ ziˇ Iˇsaˬleˬlaˆ miˇ kʼahˬ-ahˇ uˆ lahˇ-euˬ meh.

¹⁶Beˬdeˬlaˇ meuˬ, Giˇlaˇgaˬlaˇ meuˬ, Miˇzaˬpaˬ meuˬ heu deuˬ-ahˇ, aˬ yawꞈ kʼoꞈ yawꞈ cah doe-awˇ, dawˬ ja kʼaˇ doˆ gaˇ yaˇ kʼaˬ daˇ nehˬ-euˬ meh.

¹⁷Kʼoeˇ naˇ, aˬ yawꞈ jawˇ-eu Laˬmahˇ meuˬ-ahˇ paˇ gʼoꞈ-iˇ-awˇ, kʼoeˇ gaˇ kʼawꞈ yaˇ kʼaˬ daˇ nehˬ-euˬ meh. Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, Laˬmahˇ meuˬ laꞈ kʼoeˇ lawˇ duˬ tiˬ tsahˇ aˬ yawꞈ gawˬ-euˬ meh.