Read Akha 1 Saˬmeuˬlaˆ 8 Bible Online

1 Saˬmeuˬlaˆ 8 - Akha bible

1 Saˬmeuˬlaˆ 8

¹Saˬmeuˬlaˆ tsawˇ mawˬ mawˬ laˇ ngeh, aˬ yawꞈ-euˬ a li deuˬ-ahˇ Iˇsaˬleˬlaˆ miˇ kʼahˬ laꞈ kʼoeˇ yaˇ kʼaˬ daˇ-eu tsawˇ haˬ deuˬ bi geuꞈ-euˬ meh.

²Aˬ li aˬ yuiꞈ gʼaˬ Yawˇlaˆ pyeuꞈ-awˇ, aˬ nyiˇ gʼaˬ Aˬbiˇyaˬ pyeuꞈ-eu meh. Aˬ yawꞈ nyaꞈ nmˇ-aˬ, Beˬlaˇsheˬba meuˬ-ahˇ yaˇ kʼaˬ daˇ-eu tsawˇ haˬ pyeuꞈ-eu meh.

³Aˬ nyaꞈ nmˇ-aˬ, aˬ da-ahˇ maˬ dzaw geuꞈ-ehˇ, pyuˇ za laˇ ni tehꞈ-ehˇ gaˇ mˇ-awˇ, aˬ cawˬ neh laꞈ nmꞈ nmꞈ nehˬ-euˬ pyuˇ yuˇ dzaˬ-eu laꞈ kʼoeˇ, dawˇ coe ni yaˇ kʼaˬ maˬ daˇ-a.

⁴Iˇsaˬleˬlaˆ tsawˇ haˬ aˬ yuiꞈ aˬ tsu dawˬ tawˆ luꞈ gm leˇ-awˇ, Laˬmahˇ meuˬ-ahˇ Saˬmeuˬlaˆ jawˇ gaˇ iˇ-euˬ meh.

⁵Aˬ yawꞈ maꞈ Saˬmeuˬlaˆ-ahˇ ehˇ nehˬ-eu, “Nawˇ tsawˇ mawˬ mawˬ laˇ gʼaˬ-euˬ kʼawꞈ, nawˬ li deuˬ nawˬ-ahˇ dzaw geuꞈ-awˇ yaw dehꞈ maˬ dehꞈ-a. Kʼoeˇ miˇ neh, aˬ cawˬ tsawˇ jeuˬ sahˬ paˬ baw-eu loꞈ-ehˇ, nga maꞈ kʼawꞈ sahˬ paˬ baw laˇ ni, nga maꞈ-ahˇ bi uˆ lahˇ-eu sahˬ paˬ tiˬ gʼaˬ tseˇ doˆ nehˬ laꞈ-awˬ.”

⁶Aˬ yawꞈ maꞈ sahˬ paˬ tiˬ gʼaˬ shaˇ gaˇ Saˬmeuˬlaˆ nui ma maˬ tsaˬ-a. Kʼoeˇ miˇ neh, Sahˬpaˬ Miˬyehˇ-ahˇ aˬ yawꞈ guiˬ lahˬ shaˇ-euˬ meh.

⁷Kʼoeˇ ngeh, Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ ehˇ gaˇ naˇ haˬ nehˬ-awˬ. Nawˬ-ahˇ aˬ yawꞈ maꞈ byehˇ dzeh-eu maˬ ngeuˇ-a. Ngaˬ-euˬ mawˇ do aˬ yawꞈ maꞈ kʼoeˇ taˆ maˬ bi uˆ lahˇ-eu gʼaˇ duˬ, aˬ yawꞈ maꞈ ngaˬ-ahˇ byehˇ dzeh-euˬ meh.

⁸Iˇjiˇtuˆ miˇ kʼahˬ laꞈ kʼoeˇ aˬ yawꞈ maꞈ-ahˇ ngaˇ sheuˬ doˆ nehˬ laꞈ ngeh neh, aˬ yawꞈ maꞈ ngaˬ-ahˇ byehˇ dzeh-awˇ, miˬyehˇ nui deuˬ-ahˇ uˬ duˬ tahˬ-euˬ meh. Aˬ yawꞈ maꞈ ngaˬ-ahˇ aˇ hu neh jahˇ nehˬ laꞈ-euˬ jeˬ, nymˬ-mˇ nawˬ-ahˇ aˬ yawꞈ maꞈ paˇ jahˇ nehˬ luꞈ-eu meh.

⁹Kʼoeˇ miˇ neh, aˬ yawꞈ maꞈ ehˇ gaˇ naˇ haˬ nehˬ-awˬ. Ehˇ kʼawꞈ, aˬ yawꞈ maꞈ ya yahˇ paˬ-ehˇ gʼeh-eu jeˬ yaw muiˬ paˬ-ehˇ ehˇ mehˬ nehˬ-awˇ, aˬ yawꞈ maꞈ-euˬ sahˬ paˬ aˬ yawꞈ maꞈ kʼoeˇ taˆ uˆ lahˇ-eu aˇ nah keuˆ le ngeh, aˬ joˆ-ehˇ pyeuꞈ laˇ paˬ-ehˇ jaˆ-eu gaˇ kawˆ deuˬ kʼawꞈ ja sawˇ nehˬ-awˬ.”

¹⁰Sahˬ paˬ shaˇ laˇ-euˬ tsawˇ haˬ kʼoeˇ deuˬ-ahˇ, Sahˬpaˬ Miˬyehˇ neh aˬ yawꞈ-ahˇ kʼaˇ ehˇ nehˬ-euˬ jeˬ Saˬmeuˬlaˆ dzawˇ mehˬ nehˬ-euˬ meh.

¹¹Saˬmeuˬlaˆ ehˇ-eu, “Naw maꞈ-euˬ sahˬ paˬ naw maꞈ-ahˇ heu loꞈ-ehˇ uˆ lahˇ tehꞈ-a. Naw maꞈ-euˬ aˬ li deuˬ-ahˇ aˬ yawꞈ-euˬ yehˇ bi geuꞈ tehꞈ-a. Aˬ yawꞈ maꞈ-ahˇ, mahˬ laˆ lawˬ teh-eu yehˇ deuˬ, mahˬ dziˬ-eu yehˇ deuˬ hawˇ-eu, aˬ yawꞈ-euˬ mahˬ laˆ lawˬ deuˬ mehˬ hu paw bi cehˆ-eu yehˇ deuˬ bi geuꞈ tehꞈ-a.

¹²Tiˬ paˆ na deuˬ-ahˇ tiˬ heˇ gʼaˬ kʼoeˇ taˆ uˆ lahˇ-eu aˬ yuiꞈ bi geuꞈ-awˇ, tiˬ paˆ na deuˬ-ahˇ ngaˬ tseˇ gʼaˬ kʼoeˇ taˆ uˆ lahˇ-eu aˬ yuiꞈ bi geuꞈ tehꞈ-a. Aˬ yawꞈ-euˬ deh yaˇ tsehˬ-eu, cehˇ yehˬ-eu, guiˇ deuˆ-eu keu ka hawˇ-eu mahˬ laˆ lawˬ keu ka tehˆ-eu gaˇ heu deuˬ-ahˇ, naw maꞈ-euˬ aˬ li deuˬ aˬ yawꞈ gʼaˇ duˬ ya mˇ nehˬ tehꞈ-a.

¹³Naw maꞈ-euˬ aˬ buˇ zaˬ miˬ deuˬ-aˬ, aˬ yawꞈ zmˬ-eu tsiˇ yaw saw jeˬ jahˇ-eu, aˬ yawꞈ dzaˬ-eu gʼaˇ duˬ hawˬ mˇ dzaˇ saꞈ gʼeh-eu hawˇ-eu, aˬ yawꞈ gʼaˇ duˬ kaˬ muˇ jahˇ-eu gaˇ deuˬ ya mˇ nehˬ tehꞈ-a.

¹⁴Aˬ cawˬ naˆ maˬ tseˇ muiˬ dzehˬ-eu naw maꞈ-euˬ deh yaˇ deuˬ maˬ ehˇ, aˬ gaꞈ yaˇ kmˇ deuˬ hawˇ-eu saˬ loˬ yaˇ kmˇ deuˬ maˬ ehˇ, aˬ yawꞈ yuˇ-awˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ biꞈ nehˬ tehꞈ-a.

¹⁵Naw maꞈ-euˬ cehˇ hawˇ-eu aˬ gaꞈ aˇ siˬ tseˇ bymˇ tiˬ bymˇ taꞈ-awˇ, aˬ yawꞈ-euˬ saˇ naˇ-ahˇ gaˇ bi mˇ-euˬ yaw huiˬ yaw mahˇ deuˬ hawˇ-eu, gaˇ nui jeˬ bi mˇ-euˬ yaw huiˬ yaw mahˇ deuˬ-ahˇ biˇ nehˬ tehꞈ-a.

¹⁶Naw maꞈ-euˬ zaˬ kʼaˆ deuˬ maˬ ehˇ, muiˬ dui dui-eu naw maꞈ-euˬ mawˇ neˇ hawˇ-eu mahˬ tahˬ laˆ deuˬ maˬ ehˇ, aˬ yawꞈ yuˇ geuꞈ-awˇ, aˬ yawꞈ-euˬ gaˇ bi mˇ tehꞈ-a.

¹⁷Naw maꞈ-euˬ yawˇ yawˇ maꞈ laꞈ kʼoeˇ, tseˇ bymˇ tiˬ bymˇ aˬ yawꞈ teh doˆ geuꞈ tehꞈ-a. Aˇ saˬ saˬ laˇ ngeh, naw maꞈ-euˬ gʼawˇ mawˇ kʼawꞈ, aˬ yawꞈ-euˬ zaˬ kʼaˆ ya geuꞈ gaˇ keuˆ tehꞈ-a.

¹⁸Aˇ yamˬ kʼoeˇ yamˬ keuˆ laˇ ngeh jawˇ, naw maꞈ-euˬ nui kʼahˇ byah laˇ ni yawˬ haˇ yawˬ ha tseˇ doˆ-euˬ sahˬ paˬ baˬ da neh, nui ma cawˆ dui dui nya lehˇ naw maꞈ ya ehˇ tehꞈ-a. Ehˇ kʼawꞈ, naw maꞈ nui ma cawˆ-awˇ toˇ-eu dawˬ-ahˇ, Sahˬpaˬ Miˬyehˇ maˬ paˇ naˇ haˬ nehˬ laꞈ-aˇ.”

¹⁹Ehˇ kʼawꞈ, Saˬmeuˬlaˆ neh ehˇ-euˬ dawˬ-ahˇ tsawˇ haˬ kʼoeˇ deuˬ-euˬ naˬ bawˇ maˬ gaˬ leˇ-a. Aˬ yawꞈ maꞈ ehˇ-eu, “Ehˬ-ehˇ ngeuˇ-iˬ. Nga maꞈ sahˬ paˬ tiˬ gʼaˬ geuꞈ mawꞈ-eu ma.

²⁰Kʼoeˇ sawˇ miˇ tsa nga maꞈ kʼawꞈ aˬ cawˬ tsawˇ jeuˬ-ahˇ duˇ laˇ-awˇ, nga maꞈ kʼoeˇ taˆ uˆ lahˇ-eu sahˬ paˬ tiˬ gʼaˬ jawˇ laˇ ngeh jawˇ, nga maꞈ-ahˇ guiˇ deuˆ gaˇ aˬ yawꞈ sheuˬ gʼeh nehˬ laꞈ tehꞈ-a.”

²¹Aˬ yawꞈ maꞈ kʼaˇ ehˇ-eu jeˬ-ahˇ Saˬmeuˬlaˆ naˇ haˬ nehˬ-awˇ, Sahˬpaˬ Miˬyehˇ-ahˇ paˇ dzawˇ nehˬ leˇ-euˬ meh.

²²Kʼoeˇ ngeh, “Aˬ yawꞈ maꞈ shaˇ-eu loꞈ-ehˇ, aˬ yawꞈ maꞈ-ahˇ sahˬ paˬ tiˬ gʼaˬ biꞈ nehˬ-awˬ” lehˇ, Saˬmeuˬlaˆ-ahˇ Sahˬpaˬ Miˬyehˇ ehˇ nehˬ-euˬ meh. Kʼoeˇ naˇ, Saˬmeuˬlaˆ-aˬ, Iˇsaˬleˬlaˆ tsawˇ haˬ kʼoeˇ deuˬ dawˬ tawˆ luꞈ-ahˇ bi gʼoꞈ-iˇ-euˬ meh.