Read Akha 1 Saˬmeuˬlaˆ 9 Bible Online

1 Saˬmeuˬlaˆ 9 - Akha bible

1 Saˬmeuˬlaˆ 9

¹Beˬyaˬmiˬ tsawˇ jeuˬ laꞈ kʼoeˇ, Giˇshaˆ lehˇ myahˇ-euˬ smˇ muiˬ muiˬ-awˇ baoˬ jaˆ-eu tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, Aˬpiˇyaˬ aˇ jeuˬ aˇ ca-ahˇ taꞈ-eu Beˬgawˇlaˆ aˇ jeuˬ Zeˬyawˬ-euˬ oeˬ paˬ meh. Aˬ yawꞈ-euˬ aˬ da-aˬ, Aˬbyeˬlaˆ meh.

²Giˇshaˆ-aˬ, Sawˇluˆ lehˇ myahˇ-euˬ huiˬ loˆ laˇ-euˬ aˬ li tiˬ li jawˇ-eu meh. Sawˇluˆ-aˬ, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ deuˬ naˆ maˬ tseˇ uˬ duˬ tiˬ siˬ goˇ dzehˬ-awˇ, dawˬ tawˆ luꞈ naˆ maˬ tseˇ aˇ gʼehˇ muiˬ dui dui-eu zaˬ guˬ tiˬ gʼaˬ pyeuꞈ-eu meh.

³Giˇshaˆ-euˬ mahˬ tahˬ laˆ tiˬ deuˬ byoˆ-iˇ-euˬ miˇ neh, “Zaˬ kʼaˆ tiˬ gʼaˬ sheuˬ-awˇ mahˬ tahˬ laˆ poˆ-iˇ-awˬ” lehˇ, Sawˇluˆ-ahˇ Giˇshaˆ kʼehˇ-euˬ meh.

⁴Eˇpaˬleˬ miˇ kʼahˬ gawˬ jawˬ gawˬ duˇ doe ni poˆ-awˇ, Shaˬliˇshahˬ gahˬ kaˬ doe ni poˆ ka gʼeh kʼawꞈ, mahˬ tahˬ laˆ kʼoeˇ deuˬ-ahˇ aˬ yawꞈ nyaꞈ maˬ poˆ mawˇ nya-a. Shaˇliˬ gahˬ kaˬ paˇ poˆ doe kʼawꞈ maˬ poˆ mawˇ nya-ehˇ, Beˬyaˬmiˬ miˇ kʼahˬ paw paˇ poˆ-iˇ-euˬ meh. Ehˇ kʼawꞈ, mahˬ tahˬ laˆ kʼoeˇ deuˬ-ahˇ maˬ poˆ mawˇ nya-a.

⁵Zuˇpaˬ gahˬ kaˬ-ahˇ aˬ yawꞈ nyaꞈ oe keuˆ ngeh, “Aˇ nyaꞈ gʼoꞈ-iˇ kaˇ-euˇ. Nymˬ-mˇ ngaˬ da mahˬ tahˬ laˆ gaˇ kawˆ maˬ paˇ noeˬ ni, aˇ nyaꞈ gʼaˇ duˬ kʼahˬ lahˇ lahˇ-ehˇ jawˇ-eu baw le” lehˇ, zaˬ kʼaˆ kʼoeˇ gʼaˬ-ahˇ Sawˇluˆ ehˇ nehˬ-euˬ meh.

⁶Zaˬ kʼaˆ kʼoeˇ gʼaˬ ehˇ-eu, “Taˬ tehˬ lawˬ siˬ, Meuˬ heu meuˬ laꞈ kʼoeˇ muiˬ-eu shawˇ-eu tsawˇ haˬ tiˬ gʼaˬ jawˇ meh. Aˬ yawꞈ neh ja maw kʼaˇ maw-euˬ yawˬ jeˬ na luꞈ tsaˬ-eu miˇ neh, aˬ cawˬ aˬ yawꞈ-ahˇ yaw zeu baw dui dui meh. Aˇ nyaꞈ gʼeh aˬ yawꞈ jawˇ gaˇ le haw kaˇ-euˇ. Mahˬ tahˬ laˆ aˬ gaˇ jawˇ-eu aˬ yawꞈ ehˇ nehˬ laꞈ nya-eu baw le.”

⁷Sawˇluˆ ehˇ-eu, “Aˇ nyaꞈ aˬ yawꞈ jawˇ gaˇ le naˇ aˬ jeˬ yuˇ gʼeh nehˬ nmˇ. Aˇ nyaꞈ-euˬ pehˇ tahˇ laꞈ kʼoeˇ kaˬ muˇ maˬ paˇ ahˇ meh. Aˇ nyaꞈ aˬ yawꞈ-ahˇ biꞈ paˬ-ehˇ aˬ jeˬ paˇ ahˇ ta.”

⁸Zaˬ kʼaˆ kʼoeˇ gʼaˬ ehˇ-eu, “Ngaˇ pyuˇ maˇ byaˆ byaˆ zaˬ tiˬ byaˆ ahˇ ma. Mahˬ tahˬ laˆ aˬ gaˇ jawˇ nga lehˇ bi ehˇ mehˬ-eu gʼaˇ duˬ, pyuˇ maˇ byaˆ heu byaˆ aˬ yawꞈ-ahˇ biꞈ nehˬ ma.”

⁹(Aˇ hu maˇ diˇ aˇ hu-aˬ, tsawˇ haˬ tiˬ gʼaˬ na Miˬyehˇ gaˇ kawˆ siˬ mawꞈ naˇ, ‘Laˇ-awˬ. Shaˆ ma jawˇ gaˇ le kaˇ-euˇ’ lehˇ ehˇ-eu meh. Aˬ jeˬ miˇ neh ehˇ naˇ, nymˬ-mˇ Miˬyehˇ gʼaˇ duˬ ngehˬ dah-eu gʼaˬ lehˇ kuˇ gaˇ, aˇ hu shaˆ ma lehˇ kuˇ-euˬ meh.)

¹⁰“Nawˇ ehˇ-eu tsaˬ miˇ-a. Aˇ nyaꞈ shaˆ ma kʼoeˇ gʼaˬ jawˇ gaˇ le kaˇ-euˇ” lehˇ, zaˬ kʼaˆ kʼoeˇ gʼaˬ-ahˇ Sawˇluˆ ehˇ nehˬ-euˬ meh. Kʼoeˇ naˇ, Miˬyehˇ-euˬ tsawˇ haˬ kʼoeˇ gʼaˬ jawˇ-eu meuˬ kʼoeˇ meuˬ-ahˇ aˬ yawꞈ nyaꞈ le-euˬ meh.

¹¹Meuˬ kʼoeˇ meuˬ-ahˇ le-eu lehˇ aˬ yawꞈ nyaꞈ gawˬ duˇ-ahˇ daˆ leˇ-eu nehˬ-ehˇ, iˇ cuꞈ kʼawꞈ le-eu lehˇ doˆ le luꞈ-euˬ zaˬ miˬ aˬ buˇ zaˬ guˬ tiˬ deuˬ -ahˇ tahˬ puˬ-awˇ, “Shaˆ ma kʼoeˇ gʼaˬ meuˬ laꞈ kʼoeˇ jawˇ luꞈ meh loˇ” lehˇ aˬ yawꞈ nyaꞈ naˇ haˬ-euˬ meh.

¹²Zaˬ miˬ aˬ buˇ zaˬ guˬ kʼoeˇ deuˬ ehˇ-eu, “Jawˇ meh. Naw nyaꞈ laˇ-eu mehˬ hu keuˆ ni jawˇ luꞈ-a siˬ. Yaw kawˇ-ehˇ le-awˬ. Iˬ nah meuˬ-ahˇ jawˇ-eu tsawˇ haˬ deuˬ gawˬ duˇ-ahˇ jaˆ-eu lawˇ duˬ-ahˇ le-awˇ, lawˇ-eu shehˇ-eu jeˬ mˇ-eu aˇ nah pyeuꞈ-eu miˇ neh, uˬ soe tseuˆ tseuˆ hawˇ-eu aˬ yawꞈ meuˬ-ahˇ laˇ keuˆ-euˬ tehꞈ-a siˬ.

¹³Naw nyaꞈ meuˬ-ahˇ le uˇ ngeh, gawˬ duˇ-ahˇ laˆ dawˆ taˬ-euˬ dzaˬ byawˇ dzaˬ leˇ-eu lehˇ aˬ yawꞈ maˬ le mi naˆ-ehˇ, aˬ yawꞈ-ahˇ ya mawˇ tehꞈ-a. Aˬ yawꞈ maˬ le keuˆ kʼoeˇ keuˆ ni, tiˬ gʼaˬ-iˬ maˬ dzaˬ maˬ dawˇ ni dawˬ luꞈ tehꞈ-a. Aˬ jeˬ miˇ neh ehˇ naˇ, lawˇ-eu shehˇ-eu jeˬ-ahˇ aˬ yawꞈ dawˬ ngehˬ ya gʼeh nehˬ-eu meh. Kʼoeˇ sawˇ miˇ tsa hawˇ-eu, kuˇ taˬ-euˬ tsawˇ haˬ deuˬ dzaˬ dahˬ dawˇ dahˬ beh-eu meh. Nymˬ-mˇ yaw kawˇ-ehˇ le gʼeh leꞈ-awˬ. Naw nyaꞈ aˬ yawꞈ-ahˇ ja pyuˬ ni ya tahˬ puˬ tehꞈ-a.”

¹⁴Kʼoeˇ naˇ, Sawˇluˆ hawˇ-eu aˬ yawꞈ-euˬ zaˬ kʼaˆ kʼoeˇ gʼaˬ meuˬ-ahˇ le uˇ-euˬ meh. Aˬ yawꞈ nyaꞈ meuˬ-ahˇ le uˇ-eu nehˬ-ehˇ, uˬ duˬ tahˬ-eu jawˇ duˬ-ahˇ le-eu lehˇ aˬ yawꞈ nyaꞈ jawˇ paw doˆ le luꞈ-eu Saˬmeuˬlaˆ-ahˇ ya mawˇ-euˬ meh.

¹⁵Miˇ nah loꞈ-ehˇ gʼeh ngeh, Saˬmeuˬlaˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ taˬ-euˬ meh.

¹⁶“Ni shawˬ nah heu yamˬ-ahˇ, nawˇ jawˇ gaˇ Beˬyaˬmiˬ tsawˇ haˬ tiˬ gʼaˬ bi laˇ doˆ ma. Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ bi uˆ lahˇ-eu gʼaˇ duˬ, aˬ yawꞈ-ahˇ tsiˇ shehˆ daˆ nehˬ-awˬ. Aˬ yawꞈ maꞈ-ahˇ, Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ neh aˬ yawꞈ ka kʼoꞈ nehˬ tehꞈ-a. Ngaˬ-euˬ tsawˇ haˬ deuˬ ya daˬ luꞈ-eu jeˬ-ahˇ ngaˇ mawˇ-awˇ, ‘Caw ba nehˬ laꞈ-awˬ’ lehˇ aˬ yawꞈ maꞈ guˇ luꞈ-eu teˇ saˇ-ahˇ ngaˇ ya gaˬ gʼaˬ-euˬ ma.”

¹⁷Sawˇluˆ-ahˇ Saˬmeuˬlaˆ ya mawˇ ngeh, “Tsawˇ haˬ heu gʼaˬ ngaˬ neh nawˬ-ahˇ ehˇ nehˬ taˬ-euˬ tsawˇ haˬ kʼoeˇ gʼaˬ meh. Ngaˬ-euˬ tsawˇ jeuˬ-ahˇ aˬ yawꞈ uˆ lahˇ tehꞈ-a” lehˇ, Saˬmeuˬlaˆ-ahˇ Sahˬpaˬ Miˬyehˇ ehˇ nehˬ-euˬ meh.

¹⁸Kʼoeˇ naˇ, meuˬ-euˬ lahˇ kʼehˬ-ahˇ oe keuˆ taˬ-euˬ Saˬmeuˬlaˆ dawˬ peh Sawˇluˆ le-awˇ, “Shaˆ ma kʼoeˇ gʼaˬ aˬ gaˇ jawˇ ta lehˇ tiˬ poˆ ehˇ nehˬ laꞈ sheˇ” lehˇ naˇ haˬ-euˬ meh.

¹⁹Saˬmeuˬlaˆ ehˇ-eu, “Shaˆ ma kʼoeˇ gʼaˬ ngaˇ ma. Ngaˬ-euˬ mehˬ shi uˬ duˬ tahˬ-eu jawˇ duˬ-ahˇ le-awˬ. Naw nyaꞈ nyiˬ gʼaˬ luꞈ iˬ nah ngaˬ nehˬ-ehˇ ya dzaˬ ya dawˇ taꞈ meh. Ni shawˬ uˬ shawˬ naw nyaꞈ kʼaˇ siˬ nya mawꞈ-eu jeˬ ehˇ nehˬ-awˇ bi gʼoꞈ-iˇ ma.

²⁰Dzeuˇ yaꞈ-euˬ smˬ nah laꞈ kʼoeˇ byoˆ-iˇ-euˬ mahˬ tahˬ laˆ kʼoeˇ deuˬ gaˇ kawˆ taˬ paˇ noeˬ shaˬ. Mawˇ kʼoꞈ gʼaˬ-euˬ meh. Iˇsaˬleˬlaˆ tsawˇ haˬ deuˬ nymˬ-mˇ loˬ dui dui luꞈ-eu tsawˇ haˬ aˬ geu gʼaˬ-a lehˇ nawˇ siˬ nya ma loˇ. Aˬ yawꞈ maꞈ nawˬ-ahˇ loˬ-eu meh. Nawˇ hawˇ-eu nawˬ da-euˬ nymˇ jiˇ-ahˇ loˬ-eu meh.”

²¹Sawˇluˆ ehˇ-eu, “Ngaˇ-aˬ, Iˇsaˬleˬlaˆ tsawˇ jeuˬ tsawˇ ca deuˬ laꞈ kʼoeˇ aˬ cawˬ naˆ maˬ tseˇ nyiˇ teˬ dzehˬ-eu Beˬyaˬmiˬ tsawˇ haˬ tiˬ gʼaˬ ma. Ngaˬ-euˬ tsawˇ jeuˬ laꞈ kʼoeˇ kʼawꞈ, nga pehˬ-euˬ nymˇ jiˇ aˬ cawˬ naˆ maˬ tseˇ nyiˇ teˬ dzehˬ-eu ma. Aˬ jeˬ miˇ neh nawˇ ngaˬ-ahˇ teu loꞈ-ehˇ ehˇ te.”

²²Kʼoeˇ naˇ, Sawˇluˆ hawˇ-eu aˬ yawꞈ-euˬ zaˬ kʼaˆ-ahˇ, jeˇ lo ni gʼeh-eu kuˆ lawˆ tiˬ lawˆ laꞈ kʼoeˇ Saˬmeuˬlaˆ sheuˬ uˇ gʼeh-awˇ, daˬ yah smˬ tseˇ gʼaˬ byah ni jawˇ luꞈ-eu hawˬ jeh-euˬ kʼawˇ mehˇ paw bi jawˬ-euˬ meh.

²³Kʼoeˇ naˇ, hawˬ mˇ dzaˇ saꞈ gʼeh-eu gʼaˬ-ahˇ, “Dzaˇ nui deuˬ nehˬ-ehˇ maˬ bi keuˬ leˇ ni yuˇ paˆ taˬ-awˇ bi jaˆ-eu gʼaˇ duˬ ngaˬ neh nawˬ-ahˇ biꞈ-euˬ shaˬ jiˇ kʼoeˇ yuˇ laꞈ-awˬ” lehˇ, Saˬmeuˬlaˆ ehˇ nehˬ-euˬ meh.

²⁴Hawˬ mˇ dzaˇ saꞈ gʼeh-eu gʼaˬ muiˬ dui dui-eu shaˬ pyaˬ shaˬ jiˇ yuˇ doˆ laꞈ-awˇ, Sawˇluˆ mehˬ shi ciˬ taˬ le-euˬ meh. Kʼoeˇ ngeh, Sawˇluˆ-ahˇ Saˬmeuˬlaˆ ehˇ nehˬ-eu, “Haw sheˇ. Heu-aˬ nawˬ-euˬ gʼaˇ duˬ taˬ taˬ-euˬ shaˬ jiˇ ma. Shaˬ jiˇ heu dzaˬ-awˬ. Aˇ yamˬ heu yamˬ-ahˇ ngaˬ neh kuˇ uiˬ taˬ-euˬ tsawˇ haˬ heu deuˬ nehˬ-ehˇ bi dzaˬ bi dawˇ taꞈ-eu lehˇ, shaˬ jiˇ heu ngaˇ yuˇ doˆ taˬ-euˬ ma.” Kʼoeˇ loꞈ-ehˇ, kʼoeˇ ngeh nah Sawˇluˆ Saˬmeuˬlaˆ nehˬ-ehˇ dzaˬ taꞈ dawˇ taꞈ-euˬ meh.

²⁵Uˬ duˬ tahˬ-eu jawˇ duˬ-ahˇ neh meuˬ-ahˇ aˬ yawꞈ maꞈ gʼoꞈ ka-iˇ ngeh, Sawˇluˆ gʼaˇ duˬ nymˇ mˬ kʼoeˇ taˆ aˬ yawꞈ maꞈ yuꞈ duˬ laˆ saˆ nehˬ-euˬ meh.

²⁶Kʼoeˇ ngeh miˇ, Sawˇluˆ kʼoeˇ gaˇ yaꞈ-euˬ meh. Uˬ bya bya laˇ ngeh, nymˇ mˬ kʼoeˇ taˆ yuꞈ-eu Sawˇluˆ-ahˇ Saˬmeuˬlaˆ kuˇ-awˇ, “Tuˇ-awˬ. Nawˬ-ahˇ ngaˇ bi gʼoꞈ-iˇ ma” lehˇ ehˇ nehˬ-euˬ meh. Kʼoeˇ ngeh, Sawˇluˆ tuˇ-awˇ, Saˬmeuˬlaˆ aˬ yawꞈ nyaꞈ-ehˇ gaˇ jawˬ paw cah gʼeh-euˬ meh.

²⁷Aˬ yawꞈ nyaꞈ meuˬ meuˬ dzeˇ iˇ keuˆ ngeh, “Nawˬ-euˬ zaˬ kʼaˆ-ahˇ mehˬ hu paw bi iˇ tawˬ-awˬ” lehˇ, Sawˇluˆ-ahˇ Saˬmeuˬlaˆ ehˇ nehˬ-euˬ meh. Zaˬ kʼaˆ kʼoeˇ gʼaˬ iˇ dzeuˇ ngeh, “Heu gaˇ tiˬ kʼehˬ naˬ-awˬ. Miˬyehˇ neh ehˇ-euˬ dawˬ nawˬ-ahˇ ngaˇ ehˇ nehˬ nyaˇ” lehˇ, Sawˇluˆ-ahˇ Saˬmeuˬlaˆ ehˇ nehˬ-euˬ meh.