Read Akoose Kálag e Hibru 1 Bible Online

Kálag e Hibru 1 - Akoose bible

Kálag e Hibru 1

¹Seʼ bɔɔ́d, Dyǒb dénhɔ̄b wɛ́ɛ ábɛ̄d betaa, anláá bekal béʼdəə́dəŋ mam âláa bɔ́. Anhɔ́b áwāb ngen ne ngen, ábɛnléd-tɛ menzii híin âhɔ́b áwāb.

²Boŋ á eʼpun bé asóg hɛ́n, ahɔ́be wɛ́ɛ syánē, álāŋgē awe Mwǎn mam âláa syánē. Wɛ́ɛ ane Mwǎn dɔ́ɔ Dyǒb ápóó boŋ áhəgéʼ nkoŋ ḿ mín ne ń sé. Mɔ́-ʼaá Dyǒb átíídé aá mɔ́ awóó nhəgtéd ńsyə̄ə̄l.

³Ane mwǎn mɔ́ɔ adé eʼkin-áte bé ehúmé é Dyǒb, mɔ́-ʼaá alûmte syánē ngáne Dyǒb ákóó abɛ́. Adíi melemlem nɛ́ɛ Dyǒb-pɛ ádíí. Ngíne e eyale é nsəl échē ane Mwǎn ebɛlé mekan mésyə̄ə̄l mékag áʼsō ngáne métə́ŋgɛ́né abɛ́. Ahúd áde áhúdé syánē á mbéb-te, abɛlé syánē moosyəə́l desáá. Ámbīd e nɛ̂, andyɛɛ́ Dyǒb á Ngum é ekáá é mbáá ádyōb.

⁴Né-ɔɔ́, Mwǎn a Dyǒb atómé ángɛl. Melemlem nɛ̂ dɔ́ɔ dǐn áde Dyǒb áchə́gé mɔ́ aá, “Mwǎn” átómé dǐn ádāb á “ángɛl.”

⁵Dyǒb déēhɔ̄bɛ̄ɛ̄ wɛ́ɛ ángɛl ké pɔ́g mbêd aá, “Edíi awem Mwǎn, chii, ndíi sóó.” Dyǒb déēhɔ̄bēʼaá wɛ́ɛ ángɛl ké pɔ́g aá, “Mɛ̌bɛ̄ Sáá, mɔ́-ʼɛ abɛ́ awem Mwǎn.”

⁶Boŋ Dyǒb ádɛ̂hɔ́b aá mɔ́lōmeʼ awe Mwǎn aʼsó á nkǒŋsé-te, anhɔ́b ámpē aá, “Ángɛl échêm ésyə̄ə̄l étə́ŋgɛ́né mɔ́ edúbé abɛ.”

⁷Anhɔ́b tə̂ŋgɛne ángɛl pɛn aá, “Abɛlé éche ángɛl édé nɛ́ɛ epub. Échê Ángɛl éche édé ábē bembəledɛ, abɛlé édíi nɛ́ɛ muú ḿme ńchodneʼ.”

⁸Boŋ Dyǒb dénhɔ̄b tə̂ŋgɛne Mwǎn aá, “A-Dyǒb, wɛɛ́kamlɛ́n á ngíndé ne á ngíndé. Wɛɛ́kamlɛ́n ábōŋ bad nyaa echě etə́ŋgɛ́né.

⁹Edəə́ mam ḿme métə́ŋgɛ́né, ékɔ̄ɔ̄-ʼɛ mam ḿme méeboo. Né-ʼaá ákə́ə́ boŋ Dyǒb, ádoŋ Dyǒb, ápwɛ̄d wɛ âbɛ́ etógnɛ́n tómaa baásyə̄ə̄l ábe nyáābɔ̄ɔ nyêdé, ápwɛ̄d-tɛ wɛ âbɛ́ menyiŋge tómaa baásyə̄ə̄l ábe nyáābɔ̄ɔ nyêdé.”

¹⁰Dyǒb áhɔ́bé ámpē aá, “A-Sáŋ wɛ-ɛɛ́ ehəgé nkǒŋsé se á mbooted, nkoŋ ḿ mín-nɛ ndíi abwɔ́g áde éhə́gné échoŋ ekáá.

¹¹Ábê bwěm éʼsyə̄ə̄l bɛ́pɛ̌ á asóg, boŋ wɛ pɛn wɛɛ́bɛ̄ abɛ́ ne abɛ́. Ábê bwěm éʼsyə̄ə̄l bɛ́maá ásē nɛ́ɛ mbɔ́té.

¹²Wɛɛ́nyəg bɔ́ áte ngáne bényəgɛɛ́ mbɔ́té, wɛɛ́həŋlɛ́n-nɛ bɔ́ áte ngáne béhəŋlanné mbɔ́té. Boŋ wɛ pɛn wɛ̌bɛ̄ ebɛ́ melemlem, ádōŋ aloŋgé-ʼɛ déewóŋgé asóg.”

¹³Dyǒb déēlāŋgɛ̄ɛ̄ ángɛl ké pɔ́g mbêd aá, “Dyɛɛ́ mɛ é ekáá émbáá hén kə́ə́ŋ ne á póndé eche mɛ́bɛnlé boŋ ékɔgtéd ábōŋ bad bé ekɔyí ámīn ne mekuu.”

¹⁴Cheé-ɔ̄ ángɛl édíí? Édíi eʼdəə́dəŋ ábě éʼbɛnle Dyǒb. Dyǒb álóme-ʼɛ bɔ́ âwóŋgɛn bad ábe bɛ́kǔd eʼsoósoŋ.