Read Akoose Kálag e Hibru 8 Bible Online

Kálag e Hibru 8 - Akoose bible

Kálag e Hibru 8

¹Atɔ́n áde sékooʼɛ́ ahɔ́b ádíi nɛ́n; dewóó ene ndín e prisɛ ambáámbáa awě adyɛɛ́ é ekáá émbáá é atii dé nkamlɛn á Dyǒb á Ngum ámīn.

²Abɛnleʼ Dyǒb wɛ́ɛ bwěm ábě éʼsáá éʼdíí á hǒm áde ákóó ebem é Dyǒb abɛ́. Sáŋ Dyǒbɛ mwěn mɔ́ɔ alóó échê ebem, saké baányoŋ.

³Bépwɛde prisɛ ambáámbáa tɛ́ɛ́ âbɛ Dyǒb ndɛ ne mendɛ mé elém. Né-ɔɔ́, anɛ́n prisɛ ambáámbáa mɔ́mpē atə́ŋgɛ́né chǒm awóŋ éche ábɛɛ́ Dyǒb.

⁴Bɔɔb-pɔɔ́, nzé émbɛ̄ nɛ́n bán ambɛ́ á nkǒŋsé, né éebáá prisɛ ne abɛ́ děn, áyə̄le nɛ́n beprisɛ bédé ábe bébage Dyǒb mendɛ ngáne mbéndé éhɛdɛɛ́.

⁵Nsɔ́n ḿme ábê beprisɛ bébɛlɛɛ́ ńdíi nɛ́ɛ eʼchemléd ne ediídiŋgɛ éʼ mekan ḿme médé ádyōb. Debíí nɛ̂ áyə̄le nɛ́n, áde Mosɛɛ áhɔ́bé aá mɔ́lōoʼ ebem é Dyǒb, Dyǒb dénsīm mɔ́ etúu áte aá, “Nyín nɛ́n wɛ́ɛ mɔ́lōō chǒm ésyə̄ə̄l á yə̌l e échê ebem nyaa e nlóŋtéd eche ńlúmté wɛ á mbɔɔd mǐn.”

⁶Boŋ bɔɔb, nsɔ́n ḿme prisɛ ḿme bébágé Yesuɛ ńtómé nsɔ́n ḿme ábê beprisɛ béʼ bɔɔ́d. Melemlem nɛ̂ dɔ́ɔ nchemtɛn ḿme Yesuɛ ápɛ́ɛ́né átîntê e Dyǒb ne ábē bad, ńtómé nchemtɛn méʼsō ḿme bêmpɛɛ́nné, áyə̄le nɛ́n, Dyǒb ábágé bad akag aá mɔ́ɔ̄bɛ̌ bɔ́ bwěm éʼ bwâm.

⁷Nzé émbɛ̄ nɛ́n bán melɛ̌ méʼsō mênkwognéd âbɛl bad békobned áʼsō éʼ Dyǒb, melɛ̌ mémpēe méehɛdnad-taá.

⁸Boŋ Dyǒb dénnyīn awusé ne ábē bad, anhɔ́b-pɛ aá, “Mɛ Sáŋgwɛ́ɛ́ nhɔ́beʼ nɛ́n mɛɛ́ eʼpun éʼ bǐn éʼhúɛ áde mɛ́mwɛ̄ɛ̄ melɛ̌ mékɔ̄ɔ̄lē ne bad bé Israɛl ne bad bé Juda.

⁹Ḿmê melɛ̌ méebáá nɛ́ɛ melɛ̌ ḿme mémwɛ̄ɛ̄ ne ábāb betaa áde ńchə́ŋgé bɔ́ á ekáá boŋ mbídɛ́n bɔ́ á aloŋ á Egipto. Bénkênhídté ḿmê melɛ̌. Né-ɔɔ́, menhúd bɔ́ dǐd áyə̄l.

¹⁰Dyǒb áhɔ́bé ámpē aá, Mɛ Sáŋgwɛ́ɛ́ mɛ-ɛɛ́ nhɔ́beʼ. Bɔɔb-pɔɔ́ melɛ̌ ḿme mɛ́mwɛ̄ɛ̄ ne bad bé Israɛl á póndé echě ehúɛʼ áʼsō médíi nɛ́n: Mǎbɛ̌l bébíí échêm mbéndé, béwóŋ-ʼɛ nlém âhíd chɔ́. Mɛ̌bɛ̄ ádab Dyǒb, bɔ́-ʼɛ bɛ́bē ábêm bad.

¹¹Bɔ́ modmod éeyə́gédté waáb, modmod éeláá-ʼaá mwǎnyaŋ nɛ́n aá ábíi Dyǒb, áyə̄le bɔ́ moosyəə́l bɛ́bīī mɛ, bootya bésad, kə́ə́ŋ ne bémbáá.

¹²Mɛɛ́lagsɛ́n ḿmab mbéb, méekamtɛ́n-naá ḿmāb mewusé.”

¹³Ahɔ́b áde Dyǒb áhɔ́bɛɛ́ tə̂ŋgɛne melɛ̌ mékɔ̄ɔ̄lē, álûmteʼ nɛ́n bán abɛlé melɛ̌ mé nchun ńtómé póndé. Chǒm kéhéé éche étóme póndé, éche échune-ʼɛ, mwǎmpīn ḿ póndé éebáá ámpē ne abɛ́ děn.