Read Akuapem Twi Contemporary Bible 2020 2 Samuel 22 Bible Online

2 Samuel 22 - Akuapem Twi Contemporary Bible 2020 bible

2 Samuel 22

¹Bere a Awurade gyee Dawid fii nʼatamfo nyinaa ne Saulo nsam akyi no, ɔtoo saa dwom yi de yii AWURADE ayɛ.

²Nsɛm a ɛwɔ dwom no mu ni: “AWURADE yɛ me botan, mʼaban ne mʼagyenkwa;

³me Nyankopɔn yɛ me botan; ne mu na minya guankɔbea. Ɔyɛ me kyɛm, me nkwagye mu ahoɔden, mʼabandennen, mʼagyenkwa, nea ogye me fi basabasayɛ mu.

⁴“Misu frɛ AWURADE; ɔno na ayeyi sɛ no, efisɛ ogye me fi mʼatamfo nsam.

⁵Owu asorɔkye twaa me ho hyiae; ɔsɛe yiri faa me so.

⁶Ɔda mu hama kyekyeree me; mihyiaa owu mfiri.

⁷“Na mʼamanehunu mu no, misu frɛɛ AWURADE. Yiw, mefrɛɛ me Nyankopɔn pɛɛ mmoa. Ɔtee me nne fii ne kronkronbea. Me sufrɛ duu nʼasom.

⁸Na asase wosowee na ehinhimii; ɔsoro fapem wosowee; wɔwosowee, nʼabufuw nti.

⁹Wusiw fii ne hwene mu; ogyaframa fii nʼanom; na nnyansramma dɛw fii mu.

¹⁰Ofii ɔsoro baa fam; na omununkum kabii duruu nʼanan ase.

¹¹Ɔte kerubim so tui; gyaagyaa ne ho wɔ mframa ntaban so.

¹²Ɔde sum kataa ne ho hyiae, ɔde osu mununkum dii nʼanim kan.

¹³Hann kɛse hyerɛn wɔ nʼanim, na anyinam pa fii mu.

¹⁴AWURADE bobɔɔ mu fi ɔsoro; Ɔsorosoroni no teɛɛ mu dennen.

¹⁵Ɔtow nʼagyan maa nʼatamfo hwetee; anyinam twa ma wɔyɛɛ basaa.

¹⁶AWURADE kasae, na wiase nnyinaso no nyinaa daa hɔ. Wotumi huu ɛpo ase, na asase fapem ho daa hɔ.

¹⁷“Ofi ɔsoro baa fam besoo me mu; ɔtwee me fii asu a emu dɔ mu.

¹⁸Ogyee me fii mʼatamfo a wɔyɛ den nsam, atamfo a wokyi me na wɔn ho yɛ den pa ara sen me.

¹⁹Wɔbaa me so wɔ mʼamanehunu da, nanso AWURADE pagyaw me.

²⁰Ɔde me baa baabi a bammɔ wɔ; ogyee me, efisɛ nʼani kum me ho.

²¹“AWURADE atua me papayɛ so ka; me bem a midi no, wahyɛ me anan mu.

²²Efisɛ manantew AWURADE akwan so; mentwee me ho mfii me Nyankopɔn ho nkɔyɛɛ bɔne.

²³Ne mmara nyinaa gu mʼanim; mentwee me ho mfii ne nhyehyɛe ho.

²⁴Me ho nni asɛm wɔ Onyankopɔn anim; matwe me ho afi bɔne ho.

²⁵AWURADE tuaa me papayɛ so ka, efisɛ minni fɔ wɔ nʼanim.

²⁶“Woda wo ho adi sɛ ɔnokwafo kyerɛ wɔn a wodi nokware, wɔn a wodi mu nso wo kyerɛ wɔn sɛ wodi mu.

²⁷Wuyi wo kronkronyɛ kyerɛ ɔkronkronni, nanso amumɔyɛfo de wukyi wɔn.

²⁸Wugye ahobrɛasefo, nanso wʼani kɔ ahantanfo so sɛ wobɛbrɛ wɔn ase.

²⁹Wo AWURADE, woyɛ me kanea. Yiw, AWURADE woma me sum dan hann.

³⁰Wʼahoɔden mu, metumi aka asraafokuw agu; me Nyankopɔn nti, mitumi foro ɔfasu.

³¹“Onyankopɔn de, nʼakwan yɛ pɛ; AWURADE bɔhyɛ nyinaa ba mu. Ɔyɛ nkatabo ma wɔn a wɔhwehwɛ bammɔ wɔ ne mu.

³²Hena ne Onyankopɔn, gye sɛ AWURADE? Hena ne ɔbotantim no, gye sɛ yɛn Nyankopɔn?

³³Onyankopɔn ne mʼaban a ɛyɛ den; wagye me, na wama me kwan so ayɛ pɛ.

³⁴Ɔma mʼanammɔn ho yɛ hare sɛ ɔforote de; Ɔma me gyina sorɔnsorɔmmea.

³⁵Osiesie me ma ɔko; na me basa tumi kuntun kɔbere mfrafrae tadua.

³⁶Woama me wo nkwagye kyɛm. Wo mmoa ama mayɛ ɔkɛse.

³⁷Woabɔ kwan tɛtrɛɛ ama mʼanan sɛnea me nkotodwe rengurow.

³⁸“Metaa mʼatamfo sɛee wɔn; mannyina kosii sɛ wodii nkogu.

³⁹Meyam wɔn, mebɔɔ wɔn hwee fam, na wɔantumi ansɔre; wɔhwehwee ase wɔ mʼanan ase.

⁴⁰Wohyɛɛ me ahoɔden maa ɔko; woaka mʼatamfo ahyɛ mʼanan ase.

⁴¹Womaa wɔdan wɔn ani guanee, na mesɛe wɔn a wɔtan me nyinaa.

⁴²Wosu pɛɛ mmoa, nanso obiara ammegye wɔn. Wosu frɛɛ AWURADE, nanso wannye wɔn so.

⁴³Meyam wɔn ma wɔyɛɛ sɛ asase so mfutuma; mepraa wɔn guu suka mu sɛ wura.

⁴⁴“Womaa me nkonimdi wɔ wɔn a wɔbɔ me kwaadu so. Woahwɛ sɛ mɛyɛ amanaman sodifo; na nnipa a minnim wɔn som me.

⁴⁵Ananafo brɛ wɔn ho ase ma me; wɔte me nka pɛ ara a, wɔde wɔn ho ma me.

⁴⁶Wɔn nyinaa bɔ huboa, na wɔde ahopopo fi wɔn nsraban mu ba.

⁴⁷“AWURADE te ase! Ayeyi nka me botan, ma wɔmma Onyankopɔn, me nkwagye botan so.

⁴⁸Ɔno ne Onyankopɔn a ɔtɔ wɔn a wɔhaw me so were; ɔka amanaman no hyɛ mʼase

⁴⁹na ogye me fi mʼatamfo nsam. Wode me si baabi a mʼatamfo nnu, wugye me fi atutuwpɛfo a wotia me nsam.

⁵⁰AWURADE eyi nti, mɛkamfo wo wɔ amanaman mu, Ao AWURADE. Mɛto ayeyi dwom ama wo din.

⁵¹“Wode nkonimdi akɛse ama wo hene; woda ɔdɔ a ɛnsa da adi kyerɛ nea woasra no ngo, wode kyerɛ Dawid, ne nʼasefo afebɔɔ.”