Read Akuapem Twi Contemporary Bible 2020 Ɛsra 1 Bible Online

Ɛsra 1 - Akuapem Twi Contemporary Bible 2020 bible

Ɛsra 1

¹Persiahene Kores afe a edi kan no mu no, AWURADE kaa Kores koma ma ɔkyerɛw saa dawubɔ nsɛm yi de kɔɔ ahemman no nyinaa mu, maa Yeremia nkɔmhyɛ no baa mu.

²Sɛnea Persiahene Kores[1] ka ni: AWURADE, ɔsoro Nyankopɔn de ahemman a ɛwɔ asase so nyinaa ahyɛ me nsa. Wayi me sɛ minsi asɔredan mma no wɔ Yerusalem wɔ Yuda asase so.

³Mo a moyɛ ne nkurɔfo nyinaa, monsan nkɔ Yerusalem wɔ Yuda, nsan nkosi saa AWURADE, Israel Nyankopɔn, a ɔte Yerusalem no asɔredan. Na mo Nyankopɔn bɛka mo ho.

⁴Wɔn a wɔtete baabiara a Yudafo nkae no wɔ no, ɛsɛ sɛ wɔma Yudafo no dwetɛ ne sikakɔkɔɔ, akwantu nneɛma, nyɛmmoa ne koma pa mu afɔrebɔde a wɔde ma Onyankopɔn asɔredan a ɛwɔ Yerusalem no, de boa wɔn akwantu no.

⁵Na Onyankopɔn kaa Lewifo, Yuda ne Benyamin mmusuakuw ntuanofo no koma sɛ, wɔnsan mmra Yerusalem mmesiesie AWURADE asɔredan no.

⁶Na wɔn afipamfo boa maa wɔn dwetɛ ne sikakɔkɔɔ ne nyɛmmoa, ma wɔde tuu kwan no. Wɔmaa wɔn akyɛde pa bebree de kaa nea efi wɔn ankasa koma mu no ho.

⁷Ɔhene Kores no ankasa de aboɔdenne a ɔhene Nebukadnessar tase fii AWURADE asɔredan mu wɔ Yerusalem de koguu ɔno ankasa anyame asɔredan mu no bae.

⁸Kores hyɛɛ Persia ɔsannaani Mitredat sɛ ɔnkenkan saa nneɛma no nyinaa, na ɔmfa nhyɛ wɔn a wotwaa wɔn asu a wɔresan aba Yuda no panyin Sesbasar nsa.

⁹Eyinom ne nneɛma a Kores de bɛkyɛe: sikakɔkɔɔ nsiase — 30 dwetɛ nsiase — 1,000 dwetɛ ɔhyewsɛn — 29

¹⁰sikakɔkɔɔ hweaseammɔ — 30 dwetɛ hweaseammɔ — 410 nneɛma a ɛkeka ho — 1,000

¹¹Ne nyinaa mu no, sikakɔkɔɔ ne dwetɛ nneɛma a wɔde maa Sesbasar sɛ ɔmfa nkɔ Yerusalem bere a wɔn a wotwaa wɔn asu fi Babilonia baa hɔ no dodow yɛ sikakɔkɔɔ ne dwetɛ mpem anum ne ahannan (5,400).