Read Akuapem Twi Contemporary Bible 2020 2 Mose 31 Bible Online

2 Mose 31 - Akuapem Twi Contemporary Bible 2020 bible

2 Mose 31

¹AWURADE ka kyerɛɛ Mose se,

²“Mapaw Besaleel a ɔyɛ Uri babarima na ɔyɛ Hur nena a ofi Yuda abusua mu no

³de Onyankopɔn Honhom, nyansa, ntease, nimdeɛ ne nnepa ahorow nyinaa ahyɛ no mma

⁴sɛ ɔmfa nyɛ sika, dwetɛ ne kɔbere nnwinne ahorow,

⁵sɛ ɔmfa nyɛ abo ne dua dwumfo ne adwinni ahorow nyinaa.

⁶Bio, mayi Ahisamak ba Oholiab a ofi Dan abusua mu sɛ ɔnyɛ ne boafo. “Ɛno akyi no, mama adwumayɛfo no nyinaa nimdeɛ sononko bi sɛnea ɛbɛyɛ a, wobetumi adi dwuma biara a makyerɛ sɛ munni no:

⁷“Ahyiae Ntamadan, Apam Adaka ne mpata agua ne Ahyiae Ntamadan no mu ahyehyɛde nkae no nyinaa;

⁸ɔpon no ne so nneɛma, sikakɔkɔɔ kaneadua ne ho nneɛma, ohuam afɔremuka;

⁹ɔhyew afɔremuka ne ho nneɛma, nsankason ne ne nnyinaso;

¹⁰ɔsɔfo Aaron ntade kronkron fɛɛfɛ no ne ne mma ntade bere a wɔsom sɛ asɔfo no;

¹¹ne ɔsra ngo ne Kronkronbea hɔ aduhuam no. “Ɛsɛ sɛ wɔfa kwan a mɛkyerɛ wo no so na wɔyɛ eyinom nyinaa.”

¹²Afei, AWURADE ka kyerɛɛ Mose se,

¹³“Ka kyerɛ Israelfo no se, ‘Sɛ edu Homeda a, monhome. Eyi ne nsɛnkyerɛnne a ɛda me ne mo ne awo ntoatoaso a ɛbɛba no ntam, na moahu sɛ mene AWURADE a meyɛ mo kronkron no.’

¹⁴“ ‘Munni Homeda no, efisɛ ɛyɛ da kronkron. Obiara a obebu saa mmara yi so no, obewu. Na nea ɔbɛyɛ adwuma saa da no nso, wobekum no.

¹⁵Nnansia na mode bɛyɛ adwuma. Na nnanson so no yɛ Homeda a wɔntoto no ase a ɛyɛ kronkron ma AWURADE. Ɛsɛ sɛ wokum obiara a ɔbɛyɛ adwuma Homeda no.

¹⁶Ɛsɛ sɛ Israelfo no di Homeda no, wonni mma awo ntoatoaso no nhu sɛ ɛyɛ apam afebɔɔ.

¹⁷Ɛbɛyɛ daa apam a ɛda me ne Israelfo ntam no ho nsɛnkyerɛnne. Efisɛ nnansia mu na AWURADE de bɔɔ ɔsoro ne asase, na ɔhomee da a ɛto so ason no.’ ”

¹⁸Onyankopɔn kasa kyerɛɛ Mose wɔ Sinai Bepɔw so wiee no, ɔde abo pon abien a ɔde ne nsa akyerɛw Mmaransɛm Du no wɔ so no maa no.