Read Akuapem Twi Contemporary Bible 2020 Nnwom 116 Bible Online

Nnwom 116 - Akuapem Twi Contemporary Bible 2020 bible

Nnwom 116

¹Medɔ AWURADE efisɛ, ɔtee me nne. Ɔtee me mmɔborɔsu.

²Esiane sɛ ɔbrɛɛ nʼaso ase maa me nti, mɛfrɛ no wɔ bere a mete ase yi.

³Owu ahama bebaree me, ɔda ho yawdi baa me so, ɔhaw ne awerɛhow hyɛɛ me so.

⁴Afei mebɔɔ AWURADE din kae se, “AWURADE, gye me nkwa!”

⁵AWURADE yɛ ɔdomfo ne ɔtreneeni; ayamhyehye ahyɛ yɛn Nyankopɔn ma.

⁶AWURADE bɔ ɔwɛmfo ho ban; bere a mewɔ ahohia mu no, ogyee me.

⁷Nya abotɔyam bio, me kra, efisɛ AWURADE ne wo adi no yiye.

⁸Na wo, AWURADE, woagye me kra afi owu mu; woamma mʼani amporow nisu, na woamma mʼanan anhintiw

⁹sɛ mɛnantew AWURADE anim wɔ ateasefo asase so.

¹⁰Migye dii; ɛno nti mekae se, “Mewɔ ahohia kɛse mu.”

¹¹Na mʼahokyere mu mekae se, “Nnipa nyinaa yɛ atorofo.”

¹²Dɛn na metumi de atua AWURADE ka wɔ ne papa a wayɛ me nyinaa?

¹³Mɛma nkwagye kuruwa no so na mabɔ AWURADE din.

¹⁴Medi bɔ a mahyɛ AWURADE no nyinaa so wɔ ne nkurɔfo nyinaa anim.

¹⁵Awurade nkoa nokwafo wu som bo wɔ AWURADE ani so.

¹⁶AWURADE, ampa ara meyɛ wo somfo; meyɛ wo somfo, wʼafenaa babarima; woayi me afi me mpokyerɛ mu.

¹⁷Mɛbɔ aseda afɔre ama wo na mabɔ AWURADE din.

¹⁸Medi me ntam a maka AWURADE no so wɔ ne nkurɔfo nyinaa anim,

¹⁹wɔ adiwo a ɛwɔ AWURADE fi no, wɔ wʼanim, Yerusalem. Monkamfo AWURADE.