Read Akuapem Twi Contemporary Bible 2020 Nnwom 118 Bible Online

Nnwom 118 - Akuapem Twi Contemporary Bible 2020 bible

Nnwom 118

¹Monna AWURADE ase efisɛ oye, na nʼadɔe wɔ hɔ daa.

²Momma Israel nka se, “Nʼadɔe wɔ hɔ daa.”

³Momma Aaronfi nka se, “Nʼadɔe wɔ hɔ daa.”

⁴Momma wɔn a wosuro AWURADE nka se, “Nʼadɔe wɔ hɔ daa.”

⁵Mʼahohia mu, misu frɛɛ AWURADE; ogyee me so, na ɔma me dee me ho.

⁶AWURADE ne me boafo; enti merensuro. Dɛn na onipa betumi ayɛ me?

⁷AWURADE ne me wɔ hɔ; ɔyɛ me boafo. Mede nkonimdi bɛhwɛ mʼatamfo.

⁸Eye sɛ yebehintaw wɔ AWURADE mu, sen sɛ yɛde yɛn ho bɛto onipa so.

⁹Eye sɛ yebehintaw AWURADE mu, sen sɛ yɛde yɛn ho bɛto mmapɔmma so.

¹⁰Amanaman no nyinaa twaa me ho hyiae, nanso AWURADE din mu mitwitwaa wɔn gui.

¹¹Wotwaa me ho hyiaa wɔ baabiara, nanso AWURADE din mu, mitwitwaa wɔn gui.

¹²Wɔkyere guu me so sɛ nnowa, nanso wɔhyew ntɛm so sɛ nsɔe a ogya atɔ mu; AWURADE din mu mitwitwaa wɔn gui.

¹³Wosum me kɔɔ mʼakyi a anka mereyɛ ahwe ase, nanso AWURADE boaa me.

¹⁴AWURADE yɛ mʼahoɔden ne me bammɔ; wayɛ me nkwagye.

¹⁵Osebɔ ne nkonimdi gyigye wɔ atreneefo ntamadan mu se, “AWURADE nsa nifa ayɛ nneɛma akɛse!

¹⁶Wɔama AWURADE nsa nifa so; AWURADE nsa nifa ayɛ nneɛma akɛse!”

¹⁷Merenwu, mmom mɛtena ase na mapae mu aka nea AWURADE ayɛ.

¹⁸AWURADE atwe mʼaso dennen, nanso onyaa me mmaa owu ɛ.

¹⁹Bue trenee apon ma me; na mɛhyɛn mu na mede aseda ama AWURADE.

²⁰AWURADE ponkɛse ni; ɛhɔ na atreneefo bɛfa ahyɛn mu.

²¹Mɛda wo ase, efisɛ wugyee me so; na woayɛ me nkwagye.

²²Ɔbo a adansifo no poe no, abɛyɛ tweatibo.

²³AWURADE na wayɛ eyi, na ɛyɛ nwonwa wɔ yɛn ani so.

²⁴Nnɛ yɛ da a AWURADE ayɛ. Momma yɛn ani nnye na yenni ahurusi.

²⁵AWURADE, gye yɛn nkwa; AWURADE, ma yɛn nkonimdi.

²⁶Nhyira ne nea ɔnam AWURADE din mu reba. Yehyira wo fi AWURADE fi.

²⁷AWURADE yɛ Onyankopɔn, na wama ne hann ahyerɛn yɛn so. Momfa nnua mman nkura na yɛnto afɔrebɔ santen nkɔ afɔremuka no mmɛn ho.

²⁸Woyɛ me Nyankopɔn na meyi wo ayɛ; wone me Nyankopɔn na mɛma wo so.

²⁹Monna AWURADE ase, efisɛ oye; na nʼadɔe wɔ hɔ daa.