Read Akuapem Twi Contemporary Bible 2020 Nnwom 119 Bible Online

Nnwom 119 - Akuapem Twi Contemporary Bible 2020 bible

Nnwom 119

¹Nhyira nka wɔn a wɔn akwan yɛ pɛ, na wɔnantew sɛnea AWURADE mmara kyerɛ.

²Nhyira nka wɔn a wɔkora nʼahyɛde, na wofi wɔn koma nyinaa mu hwehwɛ no.

³Wɔnyɛ mfomso biara; na wɔnam nʼakwan so.

⁴Woayɛ nkyerɛkyerɛ pa ato hɔ a ɛsɛ sɛ wodi so pɛpɛɛpɛ.

⁵Ao, sɛ anka mʼakwan besi pi, ayɛ osetie wɔ wo hyɛ nsɛm ho ɛ!

⁶Sɛ midwen wo mmaransɛm no nyinaa ho a, ɛno de, anka mʼanim rengu ase.

⁷Mede koma a mu tew bɛkamfo wo bere a meresua wo mmara a ɛteɛ no.

⁸Medi wo hyɛ nsɛm so; na nnyaw me korakora.

⁹Aberante bɛyɛ dɛn na nʼakwan ho atew? Ɛsɛ sɛ odi wʼasɛm so.

¹⁰Mede me koma nyinaa hwehwɛ wo; mma me mman mfi wo mmara nsɛm ho.

¹¹Mede wʼasɛm asie me koma mu sɛnea merenyɛ bɔne ntia wo.

¹²AWURADE, ayeyi nka wo; kyerɛkyerɛ me wo hyɛ nsɛm.

¹³Mede mʼano ka mmara a efi wʼanom nyinaa.

¹⁴Mʼani gye sɛ midi wʼahyɛde so, sɛnea obi ani gye ahonya bebree ho no.

¹⁵Midwinnwen wo nkyerɛkyerɛ ho na mehwehwɛ wʼakwan mu.

¹⁶Mʼani gye wo hyɛ nsɛm ho; na merentoto wʼasɛm ase.

¹⁷Yɛ wo somfo yiye; na matena ase adi wʼasɛm so.

¹⁸Bue mʼani na minhu anwonwade a ɛwɔ wo mmara no mu.

¹⁹Meyɛ ɔnanani wɔ asase so; mfa wo mmaransɛm no nhintaw me.

²⁰Me kra tɔ beraw bere biara, wo mmara ho anigyina nti.

²¹Woka ahantanfo anim, wɔn a wɔadome wɔn, na wɔman fi wo mmaransɛm ho no.

²²Yi wɔn animka ne animtiaabu fi me mu, efisɛ midi wʼahyɛde so.

²³Ɛwɔ mu sɛ sodifo hyia di me ho nseku, nanso wo somfo bedwinnwen wʼahyɛde ho.

²⁴Wʼahyɛde yɛ mʼanigyede na ɛyɛ me fotufo.

²⁵Woabrɛ me ase ma meda mfutuma mu; kyɛe me nkwa so sɛnea wʼasɛm no te.

²⁶Mesesee mʼakwan na wugyee me so; kyerɛkyerɛ me wʼahyɛde.

²⁷Ma mente nea ɛwɔ wo nkyerɛkyerɛ mu ase; na mesusuw wʼanwonwade ho.

²⁸Awerɛhow ama me kra atɔ beraw; hyɛ me den sɛnea wʼasɛm no kyerɛ.

²⁹Yi me fi nnaadaa akwan so; na fa wo mmara so dom me.

³⁰Mafa nokware kwan no so; mede me koma abata wo mmara ho.

³¹AWURADE, mikura wo nkyerɛkyerɛ mu dennen, mma mʼanim ngu ase.

³²Mitu mmirika wɔ wo mmaransɛm kwan no so, efisɛ woama mʼadwene mu adɔ.

³³Kyerɛkyerɛ me, AWURADE, na minni wo hyɛ nsɛm so, na medi so akosi awiei.

³⁴Ma me ntease, na medi wo mmara so, na mede me koma nyinaa bedi so.

³⁵Kyerɛ me wo mmaransɛm kwan no na hɔ na minya anigye.

³⁶Dan me koma kɔ wʼahyɛde ho na ɛnyɛ pɛsɛmenkominya so mfaso ho.

³⁷Yi mʼani fi nneɛma hunu so; na kyɛe me nkwa so sɛnea wʼasɛm te.

³⁸Di bɔ a woahyɛ wo somfo no so, na wasuro wo.

³⁹Yi animguase a ɛbɔ me hu no fi hɔ, efisɛ wo mmara yɛ papa.

⁴⁰Mʼani agyina wo nkyerɛkyerɛ no! Kyɛe me nkwa so wɔ wo trenee mu.

⁴¹AWURADE, ma wo dɔ a ɛnsa da no mmra me so, wo nkwagye no, sɛnea wo bɔhyɛ no te.

⁴²Afei mebua nea oyi me ahi no, efisɛ mewɔ wʼasɛm mu ahotoso.

⁴³Nyi nokwasɛm no mfi mʼanom, efisɛ mʼanidaso wɔ wo mmara mu.

⁴⁴Medi wo mmara so bere biara akosi daa apem.

⁴⁵Mede ahofadi bɛnantew, efisɛ mahwehwɛ wo nkyerɛkyerɛ.

⁴⁶Mɛka wʼahyɛde ho asɛm wɔ ahemfo anim na wɔrengu mʼanim ase,

⁴⁷efisɛ mʼani gye wo mmaransɛm ho, na medɔ no.

⁴⁸Mede nidi ma wo mmaransɛm a medɔ no, na midwinnwen wo hyɛ nsɛm ho.

⁴⁹Kae asɛm a woaka akyerɛ wo somfo, efisɛ woama me anidaso.

⁵⁰Mʼawerɛkyekye wɔ mʼamanehunu mu ne sɛ: Wo bɔhyɛ kyɛe me nkwa so.

⁵¹Ahantanfo bu me animtiaa bebree, nanso mennan mfi wo mmara ho.

⁵²AWURADE mekae wo tete mmara no, na minya awerɛkyekye wɔ mu.

⁵³Abufuw hyɛ me ma, esiane amumɔyɛfo a wɔapo wo mmara nti.

⁵⁴Wo hyɛ nsɛm yɛ me dwom tiban wɔ baabiara a mesoɛ.

⁵⁵AWURADE, anadwo mekae wo din, na medi wo mmara so.

⁵⁶Eyi ne ade a meyɛ da biara, midi wo nkyerɛkyerɛ so.

⁵⁷AWURADE, wo ne me kyɛfa; mahyɛ bɔ sɛ medi wo nsɛm so.

⁵⁸Mede me koma nyinaa ahwehwɛ wo; hu me mmɔbɔ sɛnea wo bɔhyɛ no te.

⁵⁹Madwene mʼakwan ho na madan mʼanammɔntu akyerɛ wʼahyɛde.

⁶⁰Mɛyɛ ntɛm, merentwentwɛn sɛ medi wo mmara nsɛm so.

⁶¹Ɛwɔ mu, amumɔyɛfo de hama kyekyere me, nanso me werɛ remfi wo mmara.

⁶²Ɔdasu mu, mesɔre de wʼaseda ma wo, wo mmara a ɛteɛ nti.

⁶³Meyɛ wɔn a wosuro wo nyinaa adamfo, wɔn a wodi wo nkyerɛkyerɛ so nyinaa.

⁶⁴AWURADE, wʼadɔe ahyɛ asase so ma; kyerɛkyerɛ me wo hyɛ nsɛm.

⁶⁵Wo ne wo somfo nni no yiye sɛnea wʼasɛm te, AWURADE.

⁶⁶Kyerɛkyerɛ me nimdeɛ ne atemmu pa, efisɛ migye wo mmara nsɛm no di.

⁶⁷Mefom ɔkwan ansa na mihuu amane, na mprempren de midi wʼasɛm so.

⁶⁸Wuye, na nea woyɛ nso ye; kyerɛkyerɛ me wo hyɛ nsɛm.

⁶⁹Ahantanfo de atoro asra me ho de, nanso mede me koma nyinaa di wo nkyerɛkyerɛ so.

⁷⁰Wɔn koma yɛ den na wonni ɔtema, nanso mʼani gye wo mmara ho.

⁷¹Eye sɛ mihuu amane sɛnea mesua wo hyɛ nsɛm.

⁷²Mmara a efi wʼanom no som bo ma me sen dwetɛ ne sikakɔkɔɔ mpem mpem.

⁷³Wo nsa na ɛbɔɔ me na ɛnwenee me; ma me ntease a mede besua wo mmara nsɛm.

⁷⁴Sɛ wɔn a wosuro wo no hu me a, ma wɔn ani nnye, efisɛ mede mʼanidaso ahyɛ wʼasɛm mu.

⁷⁵AWURADE, minim sɛnea wo mmara te, na nokwaredi mu na woatwe mʼaso.

⁷⁶Ma wʼadɔe a ɛnsa da no nkyekye me werɛ sɛnea bɔ a woahyɛ wo somfo no te no.

⁷⁷Ma wʼayamhyehye mmra me so, na minnya nkwa, efisɛ mʼani ka wo mmara ho.

⁷⁸Ma ahantanfo ani nwu sɛ wɔfom me kwa nti nanso mesusuw wo nkyerɛkyerɛ ho.

⁷⁹Ma wɔn a wosuro wo no mmra me nkyɛn, wɔn a wɔte wo mmara ase no.

⁸⁰Ma me koma nnya bembu wɔ wo hyɛ nsɛm ho, na mʼanim angu ase.

⁸¹Wo nkwagye ho anigyina ama me kra atɔ piti, nanso mede mʼanidaso ahyɛ wʼasɛm mu.

⁸²Mahwɛ wo bɔhyɛ anim ama mʼani abu; meka se, “Da bɛn na wobɛkyekye me werɛ?”

⁸³Ɛwɔ mu sɛ mete sɛ nsa kotoku a ɛsɛn wusiw ano de, nanso me werɛ mfi wo hyɛ nsɛm no.

⁸⁴Wo somfo ntwɛn nkosi da bɛn? Da bɛn na wobɛtwe wɔn a wɔtaa me no aso?

⁸⁵Ahantanfo atu amoa de asum me afiri, a ɛne wo mmara bɔ abira.

⁸⁶Wo mmara nsɛm nyinaa mu wɔ ahotoso; boa me, efisɛ nnipa taa me kwa.

⁸⁷Ɛkaa kakraa bi a anka woyii me fii asase so, nanso minnyaee wo nkyerɛkyerɛ sodi.

⁸⁸Kyɛe me nkwa so sɛnea wʼadɔe te, na medi nkyerɛkyerɛ a efi wʼanom no so.

⁸⁹AWURADE, wʼasɛm no wɔ hɔ daa; egyina hɔ pintinn wɔ ɔsorosoro.

⁹⁰Wo nokwaredi kɔ so wɔ awo ntoatoaso nyinaa mu; wode asase sii hɔ, na etim hɔ.

⁹¹Wo mmara wɔ hɔ besi nnɛ, na nneɛma nyinaa som wo.

⁹²Sɛ mʼani anka wo mmara no ho a, anka mʼamanehunu akum me.

⁹³Me werɛ remfi wo nkyerɛkyerɛ no, efisɛ ɛno so na wonam akyɛe me nkwa so.

⁹⁴Gye me nkwa, na meyɛ wo de; na mahwehwɛ wo nkyerɛkyerɛ no.

⁹⁵Amumɔyɛfo retwɛn sɛ wɔbɛsɛe me, nanso, misusuw wʼahyɛde ho.

⁹⁶Mahu sɛ pɛyɛ nyinaa wɔ nea ɛkɔpem; nanso wo mmara nsɛm no nni ɔhye.

⁹⁷Ao, medɔ wo mmara no yiye! Midwinnwen ho da mu nyinaa.

⁹⁸Wo mmara nsɛm ma mihu nyansa sen mʼatamfo, efisɛ ɛwɔ me nkyɛn daa.

⁹⁹Mewɔ nhumu sen mʼakyerɛkyerɛfo nyinaa, efisɛ midwinnwen wʼahyɛde ho.

¹⁰⁰Mewɔ ntease sen mpanyimfo, efisɛ midi wo nkyerɛkyerɛ so.

¹⁰¹Memfaa mʼanan nsii ɔkwan bɔne biara so sɛnea metumi ayɛ osetie ama wʼasɛm.

¹⁰²Memman mfii wo mmara ho, efisɛ wʼankasa na woakyerɛkyerɛ me.

¹⁰³Wo nsɛm yɛ me dɛ, ɛyɛ dɛ sen ɛwo wɔ mʼanom.

¹⁰⁴Minya ntease fi wo nkyerɛkyerɛ mu; enti mikyi ɔkwan bɔne biara.

¹⁰⁵Wʼasɛm yɛ mʼanan ase kanea ne me kwan so hann.

¹⁰⁶Maka ntam ahyɛ mu kena se medi wo trenee mmara no so.

¹⁰⁷Mahu amane bebree; kyɛe me nkwa so, AWURADE, sɛnea wʼasɛm te.

¹⁰⁸AWURADE, ma wʼani nsɔ mʼanom nkamfo a efi me pɛ mu, na kyerɛkyerɛ me wo mmara.

¹⁰⁹Ɛwɔ mu sɛ daa metoto me nkwa ase de, nanso me werɛ remfi wo mmara.

¹¹⁰Amumɔyɛfo asum me afiri, nanso memfom mfii wo nkyerɛkyerɛ ho.

¹¹¹Wʼahyɛde yɛ mʼagyapade afebɔɔ; ɛma me koma ani gye.

¹¹²Me koma ayɛ krado sɛ ɛbɛhwɛ wo hyɛ nsɛm so akosi awiei.

¹¹³Mikyi nnipa a wɔn adwene yɛ wɔn ntanta, na medɔ wo mmara.

¹¹⁴Wone me guankɔbea ne me kyɛm; mede mʼanidaso ahyɛ wʼasɛm mu.

¹¹⁵Mumfi me so nkɔ, mo nnebɔneyɛfo, na minni me Nyankopɔn mmara nsɛm so!

¹¹⁶Wowaw me sɛnea wo bɔhyɛ no te, na mɛtena nkwa mu; mma mʼanidaso nyɛ ɔkwa.

¹¹⁷So me mu, na menya ogye; na bere biara mɛhwɛ wo hyɛ nsɛm no.

¹¹⁸Wopo wɔn a wɔfom wo hyɛ nsɛm nyinaa, na wɔn nnaadaa no yɛ ɔkwa.

¹¹⁹Wotow amumɔyɛfo nyinaa gu sɛ afide; enti medɔ wʼahyɛde.

¹²⁰Wo ho suro ma me ho popo; wo mmara abɔ me hu.

¹²¹Mayɛ nea ɛteɛ na ɛyɛ pɛ. Nnyaa me mma wɔn a wɔhyɛ me so!

¹²²Hwɛ ma wo somfo nni yiye; mma ahantanfo nhyɛ me so.

¹²³Mahwɛ wo nkwagye anim ama mʼani abu, ɛrehwehwɛ wo bɔhyɛ a ɛteɛ no.

¹²⁴Wo ne wo somfo nni no sɛnea wʼadɔe te, na kyerɛkyerɛ me wo hyɛ nsɛm.

¹²⁵Meyɛ wo somfo; ma me nhumu na mate wʼahyɛde ase.

¹²⁶AWURADE, bere aso sɛ woyɛ biribi; wɔrebu wo mmara so.

¹²⁷Esiane sɛ medɔ wo mmara nsɛm sen sikakɔkɔɔ, anaa sikakɔkɔɔ ankasa,

¹²⁸na midwen sɛ wo nkyerɛkyerɛ nyinaa ye nti, mikyi ɔkwan bɔne biara.

¹²⁹Wʼahyɛde yɛ nwonwa; enti midi so.

¹³⁰Wo nsɛm asete ma hann; na ɛma ntetekwaa nya ntease.

¹³¹Mibue mʼanom na migu ahome, na mʼani gyina wo mmara nsɛm.

¹³²Dan wʼani hwɛ me na hu me mmɔbɔ sɛnea woyɛ daa ma wɔn a wɔdɔ wo din no.

¹³³Tutu mʼanammɔn sɛnea wʼasɛm no te; mma bɔne biara nni me so.

¹³⁴Gye me fi nnipa nhyɛso mu, na madi wo nkyerɛkyerɛ so.

¹³⁵Ma wʼanim nhyerɛn wo somfo so na kyerɛkyerɛ me wo hyɛ nsɛm.

¹³⁶Nsuten nisu aguare me, efisɛ nnipa nni wo mmara so.

¹³⁷Ɔtreneeni ne wo, AWURADE, na wo mmara nso yɛ pɛ.

¹³⁸Ahyɛde a woayɛ no yɛ trenee; ɛyɛ nea wonya mu ahotoso pa ara.

¹³⁹Abufuw ahyɛ me ma, efisɛ mʼatamfo bu wɔn ani gu wo nsɛm so.

¹⁴⁰Wɔasɔ wo bɔhyɛ ahorow no ahwɛ pa ara, na wo somfo dɔ wɔn.

¹⁴¹Ɛwɔ mu sɛ menka hwee na memfra de, nanso me werɛ mfi wo nkyerɛkyerɛ.

¹⁴²Wo trenee wɔ hɔ daa, na wo mmara no yɛ nokware.

¹⁴³Ɔhaw ne awerɛhow aba me so, nanso wo mmara nsɛm ma me ahosɛpɛw.

¹⁴⁴Wʼahyɛde yɛ nokware daa; ma me ntease na manya nkwa.

¹⁴⁵AWURADE, mede me koma nyinaa mefrɛ wo, gye me so, na medi wo hyɛ nsɛm no so.

¹⁴⁶Misu mefrɛ wo, gye me nkwa na midi wʼahyɛde so.

¹⁴⁷Mesɔre anɔpahema, na misu pɛ mmoa; mede me werɛ ahyɛ wo nsɛm mu.

¹⁴⁸Mʼani gu so anadwo nyinaa, na misusuw wo bɔhyɛ ho.

¹⁴⁹Tie me nne sɛnea wʼadɔe no te; AWURADE, kyɛe me nkwa so sɛnea wo mmara te.

¹⁵⁰Wɔn a wɔhyehyɛ atirimɔdensɛm no abɛn, nanso wɔne wo mmara ntam ware.

¹⁵¹AWURADE, wo de, wobɛn me, na wo mmara nsɛm nyinaa yɛ nokware.

¹⁵²Mmere bi a atwa mu no, misuaa wʼahyɛde a wode tim hɔ sɛ ɛntena hɔ daa no.

¹⁵³Hwɛ mʼamanehunu na gye me nkwa efisɛ me werɛ mfii wo mmara no.

¹⁵⁴Di mʼasɛm ma me na gye me; kyɛe me nkwa so sɛnea wo bɔhyɛ no te.

¹⁵⁵Nkwagye ne atirimɔdenfo ntam kwan ware, efisɛ wɔnhwehwɛ wo hyɛ nsɛm no.

¹⁵⁶AWURADE, wʼayamhyehye yɛ kɛse; kyɛe me nkwa so sɛnea wo mmara no te.

¹⁵⁷Atamfo a wɔteetee me dɔɔso, nanso memman mfii wo nhyehyɛe ho.

¹⁵⁸Mehwɛ wɔn a wonni gyidi no a wɔn ho yɛ me nwini, efisɛ wonni wʼasɛm so.

¹⁵⁹Hwɛ sɛnea mʼani gye wo nkyerɛkyerɛ ho; AWURADE, kyɛe me nkwa so sɛnea wʼadɔe te.

¹⁶⁰Wo nsɛm nyinaa yɛ nokware; na wo mmara a ɛteɛ no to rentwa da.

¹⁶¹Sodifo taataa me kwa, nanso ɛyɛ wʼasɛm nko ara na misuro.

¹⁶²Mʼani gye wo bɔhyɛ ho te sɛ obi a wanya asade kɛse.

¹⁶³Mikyi nkontompo na medɔ wo mmara.

¹⁶⁴Mekamfo wo mpɛn ason da biara, wo mmara a ɛteɛ no nti.

¹⁶⁵Wɔn a wɔdɔ wo mmara no wɔ asomdwoe mmoroso, na biribiara rentumi mma wonhintiw.

¹⁶⁶AWURADE, metwɛn wo nkwagye, na midi wo mmara nsɛm so.

¹⁶⁷Midi wʼahyɛde so na medɔ no yiye.

¹⁶⁸Midi wo nkyerɛkyerɛ ne wʼahyɛde so, na wunim mʼakwan nyinaa.

¹⁶⁹AWURADE, ma me sufrɛ nnu wʼanim; ma me ntease sɛnea wʼasɛm no te.

¹⁷⁰Ma me nkotosrɛ nnu wʼanim; na gye me sɛnea wo bɔhyɛ no te.

¹⁷¹Ma nkamfo nhyɛ mʼanom ma; efisɛ wokyerɛkyerɛ me wo hyɛ nsɛm.

¹⁷²Ma me tɛkrɛma nto wʼasɛm ho dwom, efisɛ wo mmara nsɛm nyinaa yɛ trenee.

¹⁷³Ma wo nsa nyɛ krado mmɛboa me, efisɛ maso wo nkyerɛkyerɛ no mu.

¹⁷⁴AWURADE, mʼani agyina wo nkwagye, na wo mmara yɛ mʼanigyede.

¹⁷⁵Ma mentena nkwa mu na matumi akamfo wo, na wo mmara nso awowaw me.

¹⁷⁶Mafom kwan sɛ oguan a wayera. Hwehwɛ wo somfo, efisɛ me werɛ mfii wo mmara nsɛm no ɛ.