Read Akuapem Twi Contemporary Bible 2020 Nnwom 135 Bible Online

Nnwom 135 - Akuapem Twi Contemporary Bible 2020 bible

Nnwom 135

¹Monkamfo AWURADE. Monkamfo AWURADE din; monkamfo no, mo AWURADE asomfo,

²mo a mosom wɔ AWURADE fi, wɔ adiwo a ɛwɔ yɛn Nyankopɔn fi.

³Monkamfo AWURADE efisɛ oye; monto ayeyi nnwom mma ne din, na ɛno na ɛyɛ anisɔ.

⁴AWURADE ayi Yakob sɛ ɔnyɛ ne de, wayi Israel sɛ nʼade a ɛsom bo.

⁵Minim sɛ AWURADE so; Ɔso sen anyame nyinaa.

⁶AWURADE yɛ nea ɔpɛ biara wɔ ɔsoro ne asase so, po ne mu bun nyinaa.

⁷Ɔma omununkum ma ne ho so fi asase ano ba; ɔsoma anyinam ka osu ho na ɔma ahum tu fi ne koradan mu.

⁸Okum Misraim mmakan, nnipa ne mmoa mmakan.

⁹Ɔsomaa ne nsɛnkyerɛnne ne nʼanwonwade baa mo mfimfini, Misraim, de tiaa Farao ne nʼasomfo nyinaa.

¹⁰Ɔsɛee amanaman pii, na okunkum ahemfo akɛse,

¹¹Amorifo hene, Sihon Basan hene, Og ne Kanaan ahemfo nyinaa,

¹²na ɔde wɔn nsase maa sɛ agyapade ɔde maa ne nkurɔfo Israelfo.

¹³AWURADE, wo din wɔ hɔ daa. AWURADE wo din ahyeta awo ntoatoaso nyinaa mu.

¹⁴AWURADE bedi ama ne nkurɔfo na obehu nʼasomfo mmɔbɔ.

¹⁵Amanaman no ahoni yɛ dwetɛ ne sikakɔkɔɔ a wɔde onipa nsa na ayɛ.

¹⁶Wɔwɔ ano, nanso wontumi nkasa, wɔwɔ ani, nanso wonhu ade;

¹⁷wɔwɔ aso, nanso wɔnte asɛm, na ɔhome nso nni wɔn anom.

¹⁸Wɔn a wɔyɛɛ ahoni no bɛyɛ sɛ wɔn ara, saa ara na wɔn a wɔde wɔn ho to wɔn so no bɛyɛ.

¹⁹Monkamfo AWURADE, mo Israelfo nyinaa; monkamfo AWURADE, Aaron fi;

²⁰monkamfo AWURADE, Lewi fi; monkamfo AWURADE, mo a musuro no.

²¹Mumfi Sion nkamfo AWURADE, monkamfo nea ɔte Yerusalem no. Monkamfo AWURADE.