Read Akuapem Twi Contemporary Bible 2020 Nnwom 139 Bible Online

Nnwom 139 - Akuapem Twi Contemporary Bible 2020 bible

Nnwom 139

¹Dawid dwom. AWURADE, woahwehwɛ me mu na woahu me.

²Wunim mʼasetena ne me sɔre; wufi akyirikyiri hu mʼadwene mu.

³Wunim mʼadifi ne me nnae mu; wunim mʼakwan nyinaa mu.

⁴Ansa na mebue mʼano akasa no AWURADE, na wunim ne nyinaa dedaw.

⁵Woakata me ho nyinaa ahyia na wobɔ me ho ban.

⁶Saa nimdeɛ yi yɛ me nwonwa dodo, ɛkɔ soro dodo ma me sɛ medu ho.

⁷Ɛhe na metumi afi wo honhom anim akɔ? Ɛhe na metumi aguan afi wʼanim akɔ?

⁸Sɛ meforo soro a, wowɔ hɔ. Na mekɔsɛw me kɛtɛ wɔ asaman a, wo ni.

⁹Sɛ mede adekyee ntaban tu na mekɔtena po akyi nohɔ a,

¹⁰mpo hɔ na wo nsa begya me akɔ, na wo nsa nifa beso me mu.

¹¹Na meka se, “Ampa ara sum mmɛkata me so na hann nnan adesae ntwa me ho nhyia a,”

¹²sum mpo nyɛ sum mma wo; na anadwo bɛhyerɛn sɛ awia; sum ne hann yɛ wo pɛ.

¹³Na wo na wobɔɔ me honhom wonwen me wɔ me na awotwaa mu.

¹⁴Mekamfo wo, efisɛ woyɛɛ me anwonwakwan so a ɛyɛ hu; wo nnwuma yɛ nwonwa. Minim ɛno yiye pa ara.

¹⁵Wɔamfa me bɔbea anhintaw wo bere a wɔyɛɛ me kokoa mu no; bere a wɔnwenee me wɔ asase bun mu no,

¹⁶wʼani huu me, bere a meyɛ mogyatɔw no. Nna dodow a woatwa ama me no, wɔakyerɛw ne nyinaa wɔ wo nhoma mu ansa na mu baako reba mu.

¹⁷Onyankopɔn, wo nsusuwii som bo ma me! woka ne nyinaa bɔ mu a, ɛtrɛw dodo!

¹⁸Sɛ mise mɛkan a, ne dodow bɛboro mpoano nwea, sɛ minyan a, me ne wo wɔ hɔ ara.

¹⁹Sɛ anka, Onyankopɔn, wubekunkum amumɔyɛfo ɛ! Mumfi me so, mo a moyɛ mogyapɛfo!

²⁰Wɔde adwemmɔne ka wo ho asɛm; wʼatamfo mmmɔ wo din pa.

²¹AWURADE, metan wɔn a wɔtan wo, na mikyi wɔn a wɔsɔre tia wo no ana?

²²Minni hwee sɛ ɔtan a mewɔ ma wɔn; mefa wɔn sɛ mʼatamfo.

²³Hwehwɛ me mu, Onyankopɔn, na hu me koma; sɔ me hwɛ, na hu mʼadwene.

²⁴Hwɛ sɛ bɔne bi wɔ me mu a, na di mʼanim fa daa nkwa kwan so. Wɔde ma dwonkyerɛfo.