Read Akuapem Twi Contemporary Bible 2020 Nnwom 145 Bible Online

Nnwom 145 - Akuapem Twi Contemporary Bible 2020 bible

Nnwom 145

¹Ayeyi dwom. Dawid de. Mɛma wo so, me Nyankopɔn, Ɔhenkɛse; mɛkamfo wo din daa daa.

²Da biara, mɛkamfo wo; na mama wo din so daa daa.

³AWURADE so, na ɔsɛ nkamfo kɛse; obiara ntumi nsusuw ne kɛseyɛ.

⁴Awo ntoatoaso baako bɛkamfo wo nnwuma akyerɛ afoforo; wɔbɛka wo nnwuma akɛse ho asɛm.

⁵Wɔbɛka wʼanuonyam ne wo tumi a ɛheran no ho asɛm, na mɛdwene wʼanwonwadwuma ho.

⁶Wɔbɛka wo nnwuma a ɛyɛ hu no mu tumi ho asɛm; na mapae mu aka wo nneyɛe akɛse no akyerɛ.

⁷Wɔbɛhyɛ wo papayɛ mmoroso no ho fa, na wɔde anigye ato wo trenee ho dwom.

⁸AWURADE yɛ ɔdomfo ne mmɔborɔhunufo; ne bo kyɛ fuw na nʼadɔe dɔɔso.

⁹AWURADE ye ma obiara; na ɔwɔ ahummɔbɔ ma nʼabɔde nyinaa.

¹⁰AWURADE, wʼabɔde nyinaa bɛkamfo wo; na wʼahotefo bɛma wo so.

¹¹Wɔbɛka wʼahenni no anuonyam ho asɛm na wɔaka wo mmaninyɛ ho asɛm,

¹²sɛ ɛbɛyɛ a nnipa behu wo nnwuma akɛse ne wʼahenni anuonyam a ɛheran no.

¹³Wʼahenni yɛ daa ahenni, na wo tumidi wɔ hɔ ma awo ntoantoaso nyinaa. AWURADE di ne bɔhyɛ nyinaa so, na ɔwɔ ɔdɔ ma biribiara a wayɛ.

¹⁴AWURADE wowaw wɔn a wɔhwe ase na ɔpagyaw wɔn a wɔn nnesoa ama wɔakom.

¹⁵Aniwa nyinaa hwɛ wo kwan, na woma wɔn, wɔn aduan wɔ ne bere mu.

¹⁶Wubue wo nsam, na woma biribiara a ɛwɔ nkwa no nʼapɛde.

¹⁷AWURADE teɛ wɔ nʼakwan nyinaa mu; na ɔyɛ adɔe ma nea wayɛ nyinaa.

¹⁸AWURADE bɛn wɔn a wɔfrɛ no nyinaa, wɔn a wɔfrɛ no nokware mu nyinaa.

¹⁹Ɔyɛ wɔn a wosuro no no apɛde ma wɔn; otie wɔn sufrɛ na ogye wɔn.

²⁰AWURADE hwɛ wɔn a wɔdɔ no no nyinaa so, nanso amumɔyɛfo de, ɔbɛsɛe wɔn nyinaa.

²¹Mʼano bɛkamfo AWURADE. Ma abɔde nyinaa nkamfo ne din kronkron no daa daa.