Read Akuapem Twi Contemporary Bible 2020 Nnwom 146 Bible Online

Nnwom 146 - Akuapem Twi Contemporary Bible 2020 bible

Nnwom 146

¹Monkamfo AWURADE. Me kra, kamfo AWURADE!

²Mɛkamfo AWURADE me nkwanna nyinaa; mɛto ayeyi dwom ama me Nyankopɔn, sɛ mete ase yi.

³Mommfa mo ho nto mmapɔmma so, adesamma a wɔrentumi nnye nkwa.

⁴Sɛ wɔn honhom tu kɔ a, wɔsan kɔ dɔte mu, saa da no ara wɔn nsusuwii nyinaa yɛ ɔkwa.

⁵Nhyira ne nea ne boafo ne Yakob Nyankopɔn, nea nʼanidaso wɔ AWURADE, ne Nyankopɔn mu.

⁶Ɔno ne ɔsoro ne asase Yɛfo, po ne biribiara a ɛwɔ mu nyinaa AWURADE a ɔyɛ nokwafo daa no.

⁷Odi ma wɔn a wɔhyɛ wɔn so, na ɔma wɔn a ɔkɔm de wɔn aduan. AWURADE gyaa nneduafo,

⁸AWURADE ma anifuraefo hu ade. AWURADE ma wɔn a wɔakom no so, AWURADE dɔ atreneefo.

⁹AWURADE hwɛ ahɔho so, na ɔwowaw ayisaa ne akunafo, na amumɔyɛfo akwan de, ɔdan ani.

¹⁰AWURADE di hene daa daa, Ao, Sion, wo Nyankopɔn, wɔ awo ntoatoaso nyinaa so. Monkamfo AWURADE.