Read Akuapem Twi Contemporary Bible 2020 Nnwom 147 Bible Online

Nnwom 147 - Akuapem Twi Contemporary Bible 2020 bible

Nnwom 147

¹Monkamfo AWURADE. Eye sɛ wɔto ayeyi nnwom ma yɛn Nyankopɔn, ɛyɛ fɛ na ɛfata dodo sɛ wɔkamfo no!

²AWURADE kyekyere Yerusalem; Ɔboaboa Israel nnommum ano.

³Ɔsa wɔn a wɔn koma abotow no yare, na ɔkyekyere wɔn akuru.

⁴Ɔkyerɛ nsoromma dodow a ɛwɔ hɔ, na ɔde obiara din frɛ no.

⁵Yɛn AWURADE so, na ne tumi yɛ kɛse; yɛrente nʼase nwie.

⁶AWURADE wowaw ahobrɛasefo na ɔtotow amumɔyɛfo hwehwe fam.

⁷Monto aseda nnwom mma AWURADE. Momfa sanku nto dwom mma yɛn Nyankopɔn.

⁸Ɔde omununkum kata ɔsoro ani; ɔma asase osu ma sare nyin wɔ nkoko so.

⁹Ɔma anantwi aduan, na sɛ kwaakwaadabimma su a, ɔma wɔn aduan.

¹⁰Ɛnyɛ ɔpɔnkɔ ahoɔden na nʼani sɔ na ɛnyɛ onipa ahoɔden nso.

¹¹Na mmom, AWURADE ani sɔ nnipa a wosuro no, wɔn a wɔde wɔn ho to nʼadɔe a ɛnsa da no so no.

¹²Momma AWURADE so, Yerusalem; kamfo wo Nyankopɔn, Sion,

¹³ɔma wʼapon akyi adaban yɛ den, na ohyira wo nkurɔfo a wɔte wo mu.

¹⁴Ɔma wʼahye so dwo, na ɔde awi ankasa ma wo.

¹⁵Ɔsoma nʼahyɛde kɔ asase so; nʼasɛm tu mmirika ntɛm so.

¹⁶Ɔtrɛw sukyerɛmma mu sɛ oguan ho nwi, na ɔpete obosu sukyerɛmma sɛ nsõ.

¹⁷Ɔtotow mparuwbo gu fam sɛ mmosea. Hena na obetumi agyina nʼawɔw dennen no ano?

¹⁸Ɔsoma nʼasɛm no ma ɛnan no; ɔhwanyan ne mframa, na nsu sen.

¹⁹Wada nʼasɛm adi akyerɛ Yakob, ne mmara ne ɔhyɛ nsɛm akyerɛ Israel.

²⁰Ɔnyɛɛ eyi maa ɔman foforo biara ɛ; wonnim ne mmara. Monkamfo AWURADE!