Read Akuapem Twi Contemporary Bible 2020 Nnwom 39 Bible Online

Nnwom 39 - Akuapem Twi Contemporary Bible 2020 bible

Nnwom 39

¹Dawid dwom. Mekae se, “Mɛhwɛ mʼakwan yiye na mamfa me tɛkrɛma anyɛ bɔne; mɛto mʼano nnareka bere a amumɔyɛfo bɛn me yi.

²Enti meyɛɛ komm a manka asɛm papa biara mpo nanso mʼapinisi mu yɛɛ den.

³Me koma ho guan no wɔ me mu. Midwinnwen no, ogya dɛwee; afei mede me tɛkrɛma kasae se:

⁴“AWURADE, ma minhu me nkwa awiei ne me nna dodow; ma minhu sɛnea me nkwa si twa mu ntɛm so.

⁵Woayɛ me nna sɛ nsateaa baako pɛ; na me mfe dodow nyɛ hwee wɔ wʼani so. Onipa nkwa yɛ ɔhome bi kɛkɛ.

⁶Onipa redi akɔneaba nyinaa no, ɔte sɛ sunsuma bi kwa; ɔhaw ne ho nanso ɔyɛ kwa; ɔboa ahonya ano na onnim nea ɛbɛyɛ ne de.

⁷“Afei AWURADE, dɛn na merehwehwɛ? Mʼanidaso wɔ wo mu.

⁸Gye me fi me bɔne nyinaa mu; mma mennyɛ nkwaseafo aserewde.

⁹Meyɛɛ komm, na mammue mʼano, efisɛ wo na woayɛ eyi.

¹⁰Yi wʼasotwe fi me so; wo nsa ano amanehunu amene me.

¹¹Woka nnipa anim, na wotwe wɔn aso wɔ wɔn bɔne ho; wosɛe wɔn ahonya te sɛ nwewee; onipa biara yɛ ɔhome kɛkɛ.

¹²“AWURADE, tie me mpaebɔ, tie me sufrɛ; nsiw wʼaso wɔ me su ho. Me ne wo te hɔ sɛ ɔnanani, sɛnea na mʼagyanom nyinaa te no.

¹³Yi wʼani fi me so na manya nkwa bio, ansa na mafi ha a mente ase bio.” Wɔde ma dwonkyerɛfo.