Read Akuapem Twi Contemporary Bible 2020 Mmebusɛm 8 Bible Online

Mmebusɛm 8 - Akuapem Twi Contemporary Bible 2020 bible

Mmebusɛm 8

¹Tie: Nyansa refrɛ. Ntease ma ne nne so.

²Ɔkwan no so, sorɔnsorɔmmea hɔ, nkwantanan no so, ɛhɔ na egyina,

³apon a ɛkɔ kuropɔn no mu no ho, ɛteɛ mu wɔ abobow ano hɔ se,

⁴“Ao, mo nnipa na meteɛ mu refrɛ; meteɛ mu frɛ adesamma nyinaa.

⁵Mo a moyɛ ntetekwaa, momma mo ani ntew; mo a moyɛ nkwaseafo, munnya ntease.

⁶Muntie, na mewɔ nsɛm pa bi ka kyerɛ mo; mibue mʼano ka nea eye.

⁷Mʼano ka nea ɛyɛ nokware, efisɛ mʼanofafa kyi amumɔyɛsɛm.

⁸Mʼanom nsɛm nyinaa yɛ pɛ; biara nni mu a ɛyɛ nkontompo anaa nnaadaasɛm.

⁹Ne nyinaa mu da hɔ ma nea ɔwɔ nhumu; ɛho nni asɛm ma wɔn a wɔwɔ nimdeɛ.

¹⁰Mompo dwetɛ na momfa mʼakwankyerɛ, momfa nimdeɛ na mompo sikakɔkɔɔ ankasa.

¹¹Efisɛ nimdeɛ som bo sen bota, na worentumi mfa nea wopɛ biara ntoto no ho.

¹²“Me, nyansa, mene anitew na ɛte; nimdeɛ ne nhumu wɔ me.

¹³Sɛ wosuro AWURADE ɛne sɛ wokyi bɔne; mikyi ahantan ne ahomaso, ɔbra bɔne ne nnaadaasɛm.

¹⁴Afotu ne atemmu pa wɔ me; mewɔ ntease ne tumi.

¹⁵Me so na ahemfo nam di ade na sodifo nam me so hyehyɛ mmara a ɛyɛ pɛ;

¹⁶Mmapɔmma de me bu ɔman ne atitiriw nyinaa a wodi asase so hene.

¹⁷Medɔ wɔn a wɔdɔ me, na wɔn a wɔhwehwɛ me no hu me.

¹⁸Ahonyade ne anuonyam wɔ me nkyɛn, ahode a ɛkyɛ ne yiyedi nso saa ara.

¹⁹Mʼaba ye sen sikakɔkɔɔ ankasa; nea efi me mu boro dwetɛ a wɔasɔn so so.

²⁰Trenee akwan so na menam, atɛntrenee akwan so,

²¹mede ahode ma wɔn a wɔdɔ me na mehyɛ wɔn adekoradan amaama.

²²“AWURADE bɔɔ me sɛ nʼabɔde mu abakan dii ne tete nneyɛe anim;

²³oyii me sii hɔ fi tete, ansa na wiase refi ase.

²⁴Wɔwoo me ansa na wɔrebɔ po kakraka no, ansa na wɔreyɛ nsuti a nsu ahyɛ no ma no,

²⁵ansa na wɔde mmepɔw resisi hɔ; wɔwoo me ansa na nkoko reba,

²⁶ansa na ɔbɔɔ asase ne ne mfuw anaa dɔte biara a ɛwɔ asase so.

²⁷Mewɔ hɔ ansa na wɔbɔɔ ɔsoro, bere a otwaa ɔhye too ebun no ani no,

²⁸bere a ɔbɔɔ omununkum wɔ soro na ɔde ebun mu nsuti tintim hɔ dennen no;

²⁹bere a otwaa ɔhye maa po sɛnea nsu no rentra ne hye, ne bere a otwaa asase fapem no,

³⁰na meyɛ odwumfo a mete ne nkyɛn. Anigye hyɛɛ me ma daa na midii ahurusi wɔ nʼanim bere biara,

³¹na mʼani gye wɔ ne wiase nyinaa mu na mʼani ka wɔ adesamma mu.

³²“Enti me mma, muntie me; nhyira ne wɔn a wɔnantew mʼakwan so.

³³Muntie mʼakwankyerɛ na munhu nyansa; mummmu mo ani ngu so.

³⁴Nhyira ne onipa a otie me, ɔwɛn mʼabobow ano daa, na ɔtwɛn wɔ hɔ.

³⁵Na obiara a ohu me no nya nkwa, na onya anisɔ fi AWURADE nkyɛn.

³⁶Na nea wanhwehwɛ me no haw ne ho na wɔn a wɔtan me no dɔ owu.”