Read Akuapem Twi Contemporary Bible 2020 Yeremia 21 Bible Online

Yeremia 21 - Akuapem Twi Contemporary Bible 2020 bible

Yeremia 21

¹Asɛm fi AWURADE hɔ baa Yeremia nkyɛn bere a ɔhene Sedekia somaa Malkia babarima Pashur ne Maaseia babarima ɔsɔfo Sefania kɔɔ ne nkyɛn no. Wɔkae se,

²“Bisa AWURADE, ma yɛn efisɛ Babiloniahene Nebukadnessar ne yɛn rebedi ako. Ebia AWURADE bɛyɛ anwonwade ama yɛn, sɛnea ɔyɛɛ mmere bi a atwa mu no na ama wafi yɛn so akɔ.”

³Na Yeremia buaa wɔn se, “Monka nkyerɛ Sedekia se,

⁴‘Sɛnea AWURADE, Israel Nyankopɔn, se ni: Merebɛdan mo nsam akode atia mo, nea mode reko atia Babiloniahene ne Babiloniafo a wɔwɔ ɔfasu no akyi na wɔatua mo kuropɔn no ano. Mɛboa wɔn ano wɔ kuropɔn yi mu.

⁵Me ara mede nsa a mateɛ ne abasa a ɛyɛ den bɛko atia mo wɔ abufuw, anibere ne abufuwhyew mu.

⁶Mɛbobɔ wɔn a wɔtete kuropɔn yi mu ahwehwe fam; nnipa ne mmoa nyinaa, na ɔyaredɔm a ɛyɛ hu bekunkum wɔn.

⁷Ɛno akyi, AWURADE asɛm ni, mede Yudahene Sedekia, nʼadwumayɛfo ne nnipa a wɔwɔ kuropɔn yi mu a ɔyaredɔm, afoa ne ɔkɔm ankunkum wɔn no bɛma Babiloniahene Nebukadnessar ne wɔn atamfo a wɔrehwehwɛ wɔn nkwa no. Ɔde afoa bekunkum wɔn; ɔrenhu wɔn mmɔbɔ na ɔrennya ayamhyehye mma wɔn.’

⁸“Bio, ka kyerɛ nnipa no se, ‘Eyi ne nea AWURADE se: Hwɛ mede nkwa kwan ne owu kwan resi mo anim.

⁹Obiara a ɔte saa kuropɔn yi mu bewu wɔ afoa anaa ɔkɔm anaa ɔyaredɔm ano. Nanso obiara a obepue na ɔde ne ho akɔma Babiloniafo a wɔabetua mo kuropɔn yi no, bɛfa ne ho adi.

¹⁰Mawe ahinam sɛ mɛyɛ kuropɔn yi bɔne na ɛnyɛ papa, AWURADE na ose. Wɔde bɛhyɛ Babiloniahene nsa, na ɔde ogya bɛhyew no.’

¹¹“Nea ɛka ho ne sɛ, ka kyerɛ Yuda adehye se, ‘Muntie AWURADE asɛm;

¹²Dawidfi, sɛɛ na AWURADE se: “ ‘Mummu atɛntrenee anɔpa biara; munnye nea wɔabɔ no korɔn no mfi ne nhyɛsofo nsam, anyɛ saa a, mʼabufuwhyew bɛsɔre na ahyew sɛ ogya esiane bɔne a moayɛ nti, ɛbɛhyew a obiara rennum no.

¹³Mene mo anya, Yerusalem Mo a mote obon yi atifi abotan asasetaw so, AWURADE na ose, mo a moka se, “Hena na obetumi ako atia yɛn? Hena na obetumi ahyɛn yɛn hintabea?”

¹⁴Mɛtwe mo aso sɛnea ɛfata mo nneyɛe, AWURADE na ose. Mɛto mo kwae mu gya, a ɛbɛhyew biribiara a atwa mo ho ahyia no.’ ”