Read Akuapem Twi Contemporary Bible 2020 Yeremia 28 Bible Online

Yeremia 28 - Akuapem Twi Contemporary Bible 2020 bible

Yeremia 28

¹Ɔsram a ɛto so anum wɔ afe koro a ɛyɛ Yudahene Sedekia adedi mfiase, afe a ɛto so anan no mu, odiyifo Hanania a ɔyɛ Asur a ofi Gibeon babarima no ka kyerɛɛ me wɔ AWURADE fi bere a na asɔfo ne nnipa no nyinaa ahyia no se,

²“Sɛɛ na Asafo AWURADE, Israel Nyankopɔn se: ‘Mebubu Babiloniahene konnua no.

³Mfe abien mu no, mede AWURADE fi mu nneɛma a Babiloniahene Nebukadnessar bɛfa fii ha kɔɔ Babilonia no nyinaa bɛsan aba.

⁴Na mɛsan de Yehoiakyin a ɔyɛ Yudahene Yehoiakim babarima ne Yuda nnommum a wɔkɔɔ Babilonia no nyinaa aba’ sɛɛ na AWURADE se, ‘na mebubu Babiloniahene konnua no.’ ”

⁵Na odiyifo Yeremia buaa odiyifo Hanania wɔ asɔfo ne nnipa a na wogyinagyina AWURADE fi no nyinaa anim.

⁶Ɔkae se, “Amen! Ma AWURADE nyɛ no saa! Ma AWURADE mma wo nkɔm a woahyɛ sɛ wɔde AWURADE fi nneɛma no nyinaa ne nnommum no befi Babilonia asan aba ha yi no mmra mu.

⁷Nanso tie asɛm a ɛsɛ sɛ meka ma wote na nnipa no nyinaa nso te:

⁸Efi tete no, adiyifo a wodii mʼanim ne wʼanim no hyehyɛɛ ɔko, amanehunu ne ɔyaredɔm ho nkɔm tiaa aman bebree ne ahenni akɛse.

⁹Nanso odiyifo a ɔhyɛ asomdwoe ho nkɔm no, sɛ ne nkɔmhyɛ no ba mu a wobegye no ato mu sɛ obi a ampa ara AWURADE asoma no.”

¹⁰Na odiyifo Hanania yii konnua no fii odiyifo Yeremia kɔn mu, bubuu mu,

¹¹na ɔkaa wɔ nnipa no nyinaa anim se, “Sɛɛ na AWURADE se: ‘Saa ara na mebubu Babiloniahene Nebukadnessar konnua no afi amanaman nyinaa kɔn mu wɔ mfe abien mu.’ ” Odiyifo Yeremia tee eyi no ofii hɔ kɔe.

¹²Odiyifo Hanania bubuu konnua no fii odiyifo Yeremia kɔn mu akyi no, AWURADE asɛm baa Yeremia nkyɛn se:

¹³“Kɔ na kɔka kyerɛ Hanania se, ‘Sɛɛ na AWURADE se: Woabubu dua konnua mu, nanso mede dade konnua besi anan mu.

¹⁴Na sɛnea Asafo AWURADE, Israel Nyankopɔn no se ni: Mede dade konnua bɛto amanaman nyinaa kɔn mu, ama wɔn asom Babiloniahene Nebukadnessar, na wɔbɛsom no. Na mpo mɛma no adi wuram mmoa so.’ ”

¹⁵Na odiyifo Yeremia ka kyerɛɛ odiyifo Hanania se, “Tie, Hanania! AWURADE nsomaa wo, nanso, woama ɔman yi agye atoro ato mu.

¹⁶Ɛno nti, sɛ AWURADE se ni: ‘Merebeyi wo afi asase so. Afe yi mu ara wubewu, efisɛ woaka atuatew nsɛm atia AWURADE.’ ”

¹⁷Ɔsram a ɛto so ason wɔ afe no ara mu no, odiyifo Hanania wui.