Read Akuapem Twi Contemporary Bible 2020 Kwadwom 3 Bible Online

Kwadwom 3 - Akuapem Twi Contemporary Bible 2020 bible

Kwadwom 3

¹Mene ɔbarima a mahu amane wɔ nʼabufuw abaa ano.

²Wapam me afi ne ho ama manantew sum mu na ɛnyɛ hann mu;

³Ampa ara wama nsa so atia me mpɛn bebree, da mu nyinaa.

⁴Wama me were ne me nam anyin Na wabubu me nnompe.

⁵Waka me ahyɛ mu, na watua me ano ɔde nweenwen ne ahokyere atwa me ho ahyia.

⁶Wama matena sum mu sɛ wɔn a wɔawuwu dedaw no.

⁷Wato ɔfasu atwa me ho ahyia enti mintumi nguan; wagu me nkɔnsɔnkɔnsɔn ama matɔ beraw.

⁸Mpo sɛ mefrɛ anaasɛ mebɔ mpae srɛ mmoa a osiw me mpaebɔ ano.

⁹Ɔde abotan asiw me kwan; wama mʼakwan ayɛ kɔntɔnkye.

¹⁰Te sɛ sisi a ɔda hɔ retwɛn, te sɛ gyata a watɛw,

¹¹ɔtwee me fii ɔkwan no mu bebaree me na ogyaw me a minni mmoa biara.

¹²Okuntun ne ta mu na ɔde ne bɛmma kyerɛɛ me so.

¹³Ɔde bɛmma a efi ne kotoku mu hwirew me koma mu.

¹⁴Meyɛɛ akyiwade maa me nkurɔfo nyinaa; wɔto akutia nnwom de di me ho fɛw da mu nyinaa.

¹⁵Ɔde nhaban nweenwen ahyɛ me ma. Wama me bɔnwoma anom.

¹⁶Ɔde mmosea abubu me se; na watiatia me so wɔ mfutuma mu.

¹⁷Wɔama asomdwoe abɔ me; na me werɛ afi yiyedi.

¹⁸Enti mise, “Mʼanuonyam asa, nea mede mʼani too so Awurade mu no nyinaa.”

¹⁹Mekae mʼamanehunu wɔ mʼakyinkyinakyinkyin mu, nweenwen ne bɔnwoma mu.

²⁰Mekae yiye, na me kra abotow wɔ me mu.

²¹Nanso midwen eyi ho; saa nti mewɔ anidaso.

²²Awurade dɔ kɛse nti yɛnsɛee ɛ. Nʼayamhyehye nni huammɔ.

²³Ɛyɛ foforo anɔpa biara; wo nokwaredi yɛ kɛse.

²⁴Meka kyerɛ me ho se, “AWURADE yɛ me kyɛfa, enti mɛtwɛn no.”

²⁵AWURADE ye ma wɔn a wɔn anidaso wɔ ne mu, onipa a ɔhwehwɛ no no;

²⁶Eye sɛ wɔyɛ komm de twɛn AWURADE nkwagye.

²⁷Eye ma ɔbarima sɛ ɔsoa konnua no wɔ ne mmerantebere mu.

²⁸Ma ɔntena ase komm, efisɛ AWURADE de ato ne so.

²⁹Ma ɔmfa nʼanim nsie wɔ mfutuma mu, ebia anidaso wɔ hɔ.

³⁰Ma ɔmfa nʼafono mma nea ɔpɛɛ sɛ ɔbɔ no no na ɔnhyɛ no aniwu.

³¹Na AWURADE ntow onipa biara nkyene koraa.

³²Ɛwɔ mu, ɔde awerɛhow ba de, nanso obenya ayamhyehye. Ne dɔ kɛse no to rentwa da.

³³Ofi amemenemfe mu de amanehunu anaa awerɛhow brɛ nnipa mma.

³⁴Sɛ wɔde wɔn nan dwerɛw nneduafo a wɔwɔ asase no so a,

³⁵sɛ wotiatia obi ahofadi so wɔ Ɔsorosoroni no anim a,

³⁶anaa sɛ wobu obi ntɛnkyew a, Awurade renhu saa nneɛma yi ana?

³⁷Hena na obetumi aka na wama aba mu wɔ bere a ɛnyɛ Awurade na ɔhyɛe?

³⁸Ɛnyɛ Ɔsorosoroni no anom na mmusu ne nnepa fi ana?

³⁹Adɛn nti na ɛsɛ sɛ ɔteasefo nwiinwii bere a wɔatwe nʼaso wɔ ne bɔne ho?

⁴⁰Momma yɛnhwehwɛ yɛn akwan mu na yɛnsɔ nhwɛ, na yɛnsan nkɔ AWURADE nkyɛn.

⁴¹Momma yɛmma yɛn koma ne yɛn nsa so, nkyerɛ Onyankopɔn wɔ ɔsoro, na yɛnka se:

⁴²“Yɛayɛ bɔne, na yɛatew atua na wamfa ankyɛ.

⁴³“Wode abufuw akata wo ho ataa yɛn; na woakunkum a woannya ahummɔbɔ.

⁴⁴Wode wo ho asie omununkum mu nti mpaebɔ biara nnu wo nkyɛn.

⁴⁵Woayɛ yɛn atantanne ne nwura wɔ amanaman no mu.

⁴⁶“Yɛn atamfo nyinaa abaa wɔn anom tɛtrɛɛ de tia yɛn.

⁴⁷Yɛabrɛ ne ahunahuna ne akukuruhwease, mmubui ne ɔsɛe.”

⁴⁸Me nusu sen sɛ asuten efisɛ wɔasɛe me nkurɔfo.

⁴⁹Me nusu bɛsen ara, na ɛrennyae,

⁵⁰kosi sɛ AWURADE bɛhwɛ afi ɔsoro, na wahu.

⁵¹Nea mihu no ma me kra werɛ how, me kuropɔn no mu mmea nyinaa nti.

⁵²Mʼatamfo a menyɛɛ wɔn hwee pampam me sɛ anomaa.

⁵³Wɔpɛɛ sɛ wotwa me nkwa so na wosiw me abo wɔ amoa mu;

⁵⁴nsu bu faa me ti so, na ɛyɛɛ me sɛnea wɔrewie me.

⁵⁵Mebɔɔ wo din, AWURADE fii amoa no ase tɔnn.

⁵⁶Wotee me sufrɛ: “Nsiw wʼaso wɔ me gye sufrɛ ho.”

⁵⁷Wutwiw bɛn me bere a mefrɛɛ wo no, na wokae se, “Nsuro.”

⁵⁸Wo Awurade, wudii mʼasɛm maa me; na wugyee me nkwa.

⁵⁹Woahu bɔne a wɔayɛ me, AWURADE. Di mʼasɛm ma me!

⁶⁰Woahu wɔn aweretɔ no mu den, wɔn pɔw a wɔbɔ tia me no nyinaa.

⁶¹AWURADE, woate wɔn ntwirii, wɔn pɔw a wɔbɔ tia me no nyinaa,

⁶²nea mʼatamfo ka no asomsɛm na wɔka no brɛoo de tia me da mu nyinaa.

⁶³Hwɛ wɔn! Sɛ wogyinagyina hɔ anaasɛ wɔtete hɔ, wɔto akutia nnwom de di me ho fɛw.

⁶⁴Fa nea ɛfata tua wɔn so ka, AWURADE, nea wɔn nsa ayɛ nti.

⁶⁵Pirim wɔn koma, na ma wo nnome mmra wɔn so.

⁶⁶Fa abufuw taa wɔn, na sɛe wɔn fi AWURADE ɔsorosoro ase.