Read Akuapem Twi Contemporary Bible 2020 Kwadwom 5 Bible Online

Kwadwom 5 - Akuapem Twi Contemporary Bible 2020 bible

Kwadwom 5

¹AWURADE, kae nea aba yɛn so; hwɛ, na hu yɛn animguase.

²Wɔadan yɛn agyapade ama ahɔho, wɔde yɛn afi ama ananafo.

³Yɛayɛ nyisaa na yenni agyanom, yɛn nanom yɛ akunafo.

⁴Ɛsɛ sɛ yɛtɔ nsu a yɛnom; yebenya nnyina a, gye sɛ yɛtɔ.

⁵Wɔn a wɔtaa yɛn no abɛn yɛn pɛɛ; Yɛabrɛ na yennya ahomegye.

⁶Yɛde yɛn ho maa Misraim ne Asiria sɛnea yebenya aduan a ɛbɛso yɛn.

⁷Yɛn agyanom yɛɛ bɔne, na wonni hɔ bio, na yɛn na wɔn asotwe abɛda yɛn so.

⁸Nkoa di yɛn so, na obiara nni hɔ a obegye yɛn afi wɔn nsam.

⁹Yɛde yɛn nkwa bɔ afɔre de pɛ yɛn anoduan, afoa a ɛwɔ sare so no nti.

¹⁰Yɛn honam adɔ sɛ fononoo. Ɔkɔm ama atiridii abɔ yɛn.

¹¹Wɔato mmea mmonnaa wɔ Sion, ne mmabun a wɔwɔ Yuda nkurow so.

¹²Wɔkyekyere mmapɔmma nsa na wɔasɛn wɔn; wɔmmfa nidi mma mpanyimfo.

¹³Mmerante yɛ adwumaden wɔ awiyammo so; na mmerantewa nan toto wɔ nnyina duruduru ase.

¹⁴Mpanyimfo ntena kuropɔn apon ano bio; mmerante agyae wɔn nnwonto.

¹⁵Ahosɛpɛw afi yɛn koma mu; yɛn asaw adan agyaadwotwa.

¹⁶Ahenkyɛw afi yɛn ti so. Yɛn ara, yennue sɛ yɛayɛ bɔne!

¹⁷Eyi nti yɛn koma atɔ beraw, eyinom nti yɛn ani so ayɛ kusuu

¹⁸wɔ Sion bepɔw a ada mpan na sakraman nenam so no nti.

¹⁹Wo, AWURADE, di hene afebɔɔ; wʼahengua fi awo ntoatoaso kosi awo ntoatoaso.

²⁰Adɛn nti na wo werɛ fi yɛn daa yi? Adɛn nti na wagyaw yɛn, mmere tenten mu yi?

²¹Ka yɛn bata wo ho bio, AWURADE, na yɛatumi asan aba wo nkyɛn; yɛ yɛn nna foforo sɛ tete no

²²gye sɛ woapo yɛn koraa anaasɛ wo bo afuw yɛn mmoroso.