Read Akuapem Twi Contemporary Bible 2020 Hesekiel 29 Bible Online

Hesekiel 29 - Akuapem Twi Contemporary Bible 2020 bible

Hesekiel 29

¹Mfe du so ɔsram a ɛto so du no da a ɛto so dumien no, AWURADE asɛm baa me nkyɛn se:

²“Onipa ba, fa wʼani kyerɛ Misraimhene Farao so na hyɛ nkɔm tia no ne Misraim nyinaa.

³Kasa kyerɛ no na ka se: ‘Sɛɛ na Otumfo AWURADE se. “ ‘Me ne wo anya, Misraimhene Farao asuboa kɛse a woda wo nsuwansuwa mu.’ ” Woka se, “Nil yɛ mede; meyɛ maa me ho.”

⁴Na mede nnarewa besuso wʼabogye mu na mama mpataa a wɔwɔ wo nsuwansuwa mu no atetare wʼabon ho. Mɛtwe wo afi wo nsuwansuwa no mu, a mpataa no nyinaa tetare wo ho.

⁵Megyaw wo hɔ wɔ sare no so, wo ne mpataa a wɔwɔ wo nsuwansuwa mu no nyinaa. Mobɛhwe ase wɔ asase petee mu a wɔremma mo so bio. Mede wo bɛma asase so mmoa ne wim nnomaa sɛ wɔn aduan.

⁶Afei wɔn a wɔte Misraim nyinaa behu sɛ mene AWURADE no. “ ‘Woayɛ sɛ demmire pema ama Israelfi.

⁷Wɔde wɔn nsa soo wo mu no, wo mu bukaw ma wuhuruwii, wotwerii wo no, wo mu bu ma wobɔɔ pemmɔ.

⁸“ ‘Ɛno nti sɛɛ na Otumfo AWURADE se: Mede afoa bɛba abɛko atia wo na makunkum wo mmarima ne wɔn mmoa.

⁹Misraim bɛda mpan na asɛe. Ɛno na wobehu sɛ mene AWURADE. “ ‘Efisɛ wokae se, “Nil yɛ me de; me na meyɛe,” enti

¹⁰me ne wo ne wo nsuwansuwa na anya, na mɛma Misraim asase asɛe na ada mpan, efi Migdol kosi Aswan twa mu de kɔka Kus hye so.

¹¹Onipa anaa aboa biara nan rensi so, obiara rentena so mfe aduanan.

¹²Mɛma Misraim asase no ada mpan wɔ nsase a asɛe mu na ne nkuropɔn bɛda mpan mfe aduanan wɔ wɔn nkuropɔn a asɛe no mu. Na mɛbɔ Misraimfo apete wɔ amanaman mu, na mahwete wɔn wɔ nsase so.

¹³“ ‘Nanso sɛɛ ne nea Otumfo AWURADE se: Mfe aduanan akyi no, mɛboaboa Misraimfo ano afi aman a mebɔɔ wɔn petee so no so.

¹⁴Mede wɔn befi nnommumfa mu aba na mede wɔn akɔ Misraim Atifi, wɔn nenanom asase. Ɛhɔ na wɔbɛyɛ ahenni mu kumaa bi.

¹⁵Ɛbɛyɛ ahenni a ɛnyɛ den na ɛrentumi mma ne ho so wɔ aman a aka no mu. Mɛyɛ no ahenni a ɛrentumi nni aman afoforo so.

¹⁶Misraim renyɛ ɔman a Israelfo de wɔn ho bɛto no so bio, mmom ɛbɛkae wɔn bɔne a wɔyɛɛ sɛ wɔde wɔn ho kɔdan no de pɛɛ mmoa. Afei, wobehu sɛ mene Otumfo AWURADE no.’ ”

¹⁷Mfe aduonu ason so, ɔsram a edi kan no da a edi kan no, AWURADE asɛm baa me nkyɛn se:

¹⁸“Onipa ba, Babiloniahene Nebukadnessar ne nʼasraafo tuu Tiro so sa abran so, eti biara so pepae, na ɔbati nso so popɔree. Nanso ɔne nʼasraafo no annya hwee amfi adwumaden a wɔyɛ de tiaa Tiro no mu.

¹⁹Ɛno nti, sɛɛ na Otumfo AWURADE se: Mede Misraim rebɛhyɛ Babiloniahene Nebukadnessar nsa na ɔbɛsoa nʼahode akɔ. Ɔbɛfom asase no de ayɛ akatua ama nʼasraafo.

²⁰Mede Misraim ama no sɛ nʼadwumayɛ so akatua, efisɛ ɔne nʼakofo yɛ maa me, Otumfo AWURADE asɛm ni.

²¹“Saa da no mɛma abɛn bi afifi ama Israelfi, na mebue wʼano wɔ wɔn mu. Afei wobehu sɛ mene AWURADE no.”