Read Akuapem Twi Contemporary Bible 2020 Hesekiel 30 Bible Online

Hesekiel 30 - Akuapem Twi Contemporary Bible 2020 bible

Hesekiel 30

¹AWURADE asɛm baa me nkyɛn se:

²“Onipa ba, hyɛ nkɔm na ka se: ‘Sɛɛ na Otumfo AWURADE se: “ ‘Twa adwo na ka se, “Ao da no!”

³Na da no abɛn, AWURADE da no abɛn, omununkum da, amanaman no atemmu bere.

⁴Afoa bi bɛsɔre atia Misraim, na ahoyeraw bɛba Kus so. Sɛ apirafo totɔ wɔ Misraim a wɔbɛsoa nʼahonyade akɔ na wɔabubu ne fapem agu fam.

⁵Kus ne Put, Lidia ne Arabia nyinaa, Libia ne bɔhyɛ asase no so nnipa ne Misraim bɛtotɔ wɔ afoa ano.

⁶“ ‘Sɛɛ na AWURADE se: “ ‘Misraim nnamfonom bɛtotɔ na nʼahomaso ahoɔden bedi no huammɔ. Efi Migdol kosi Aswan wɔbɛtotɔ wɔ afoa a ɛwɔ ne mu no ano, Otumfo AWURADE asɛm ni.

⁷Wɔbɛdeda mpan wɔ nsase a ada mpan mu, na wɔn nkuropɔn bebubu aka nkuropɔn a abubu ho.

⁸Afei wobehu sɛ mene AWURADE no, bere a mede ogya ato Misraim mu na madwerɛw nʼaboafo nyinaa no.

⁹“ ‘Saa da no, asomafo de ahyɛn befi me nkyɛn akohunahuna Kus a ne tirim yɛ no dɛ no. Ne ho bɛyeraw no wɔ Misraim atemmuda no, na ampa ara ɛbɛba mu.

¹⁰“ ‘Sɛɛ na Otumfo AWURADE se: “ ‘Mede Misraim dɔm bebrebe no bɛba awiei mɛfa Babiloniahene Nebukadnessar so.

¹¹Ɔno ne nʼasraafo; amanaman no mu anuɔdenfo, wɔde wɔn bɛba abɛsɛe asase no. Wɔbɛtwe wɔn afoa atia Misraim na wɔde afunu ahyɛ asase no so ma.

¹²Mɛma Nil mu nsu ayow na matɔn asase no ama nnipa bɔne; menam ananafo so bɛsɛe asase no ne nea ɛwɔ mu nyinaa. Me AWURADE na maka.

¹³“ ‘Sɛɛ na Otumfo AWURADE se: “ ‘Mɛsɛe ahoni no na mede Memfis nsɛsode ahorow no aba awiei. Misraim rennya mmapɔmma bio, na mɛma hu aba asase no so nyinaa.

¹⁴Mɛsɛe Misraim Atifi, ato Soan mu gya na matwe Tebes aso.

¹⁵Mehwie mʼabufuwhyew agu Pɛlusum so, Misraim bammɔ dennen no, na matwa Tebes nnipa bebrebe no agu.

¹⁶Mɛto Misraim mu gya; Pɛlusum de ɔyaw bebubu ne mu. Ahum bebu afa Tebes so; na Memfis bedi abooboo da biara.

¹⁷Heliopolis ne Bubastis mmerante bɛtotɔ wɔ afoa ano, na nkuropɔn no ankasa bɛkɔ nnommum mu.

¹⁸Sum kabii beduru Tapanhes, da no sɛ mibubu Misraim konnua no a; hɔ na nʼahomaso ahoɔden bɛba awiei. Omununkum bɛkata no so, na ne nkuraa bɛkɔ nnommum mu.

¹⁹Ɛno nti mɛtwe Misraim aso, na wobehu sɛ mene AWURADE no.’ ”

²⁰Afe a ɛto so dubaako no, ɔsram a edi kan no da a ɛto so ason no, AWURADE asɛm baa me nkyɛn se:

²¹“Onipa ba, mabu Misraimhene Farao basa mu. Wɔnkyekyeree, na atoa bio; na wɔmfa nhyɛɛ ntama bamma mu na anya ahoɔden a ɔde beso afoa mu.

²²Ɛno nti, Otumfo AWURADE na ose: Mene Misraimhene Farao anya; mebubu nʼabasa abien no mu; basa a eye ne nea mu abu no, na mama afoa afi ne nsam atɔ fam.

²³Mede Misraimfo bɛkɔ amanaman mu na mahwete wɔn agu nsase so.

²⁴Mɛhyɛ Babiloniahene basa mu den na mede mʼafoa ahyɛ ne nsa, nanso Farao de, mebu nʼabasa mu, na wasi apini wɔ nʼanim sɛ obi a wapira opirabɔne.

²⁵Mɛma Babiloniahene abasa mu ayɛ den, nanso Farao abasa bedwudwo asensɛn ne ho. Sɛ mede mʼafoa hyɛ Babiloniahene nsa na ɔma so tia Misraim a, wobehu sɛ mene AWURADE no.

²⁶Mede Misraimfo bɛkɔ amanaman mu na mahwete wɔn agu nsase no so. Ɛno na wobehu sɛ mene AWURADE no.”