Read Akuapem Twi Contemporary Bible 2020 Hesekiel 35 Bible Online

Hesekiel 35 - Akuapem Twi Contemporary Bible 2020 bible

Hesekiel 35

¹AWURADE asɛm baa me nkyɛn se:

²“Onipa ba, fa wʼani kyerɛ Bepɔw Seir; hyɛ nkɔm tia no,

³na ka se, ‘Sɛɛ na Otumfo AWURADE se: Me ne wo anya, Bepɔw Seir, na mɛteɛ me basa atia wo na mɛma wo ada mpan.

⁴Mɛdan wo nkurow ama ayɛ mmubui na wobɛda mpan. Afei wubehu sɛ mene AWURADE no.

⁵“ ‘Esiane sɛ wode tete nitan hyɛɛ wo mu na wuyii Israelfo maa afoa wɔ wɔn amanehunu mu, bere a wɔn asotwe duu ne mpɔmpɔnso no

⁶nti, sɛ mete ase yi de, Otumfo AWURADE asɛm ni, mede wo bɛma mogyahwiegu na ebedi wʼakyi. Esiane sɛ woansuro mogyahwiegu no nti, mogyahwiegu bɛtaa wo.

⁷Mɛma bepɔw Seir ada mpan, na mayi wɔn a wodi so akɔneaba no afi hɔ.

⁸Mede atɔfo bɛhyɛ wo mmepɔw so ma; wɔn a wɔbɛtotɔ wɔ afoa ano bɛtotɔ ase wɔ wo nkoko so, aku mu ne wo subon mu.

⁹Mɛma woada mpan afebɔɔ, na obiara rentena wo nkurow so. Afei wubehu sɛ mene AWURADE no.

¹⁰“ ‘Woaka se, “Saa aman abien ne nsase yi bɛyɛ yɛn dea, na yɛbɛfa,” wɔ bere a me AWURADE mete hɔ;

¹¹enti sɛ mete ase yi, Otumfo AWURADE asɛm ni, me ne wo bedi no sɛnea abufuw ne ninkunu a wodaa no adi wɔ ɔtan a wotan wɔn no mu no te, na mɛda me ho adi wɔ wɔn mu, bere a mebu wo atɛn.

¹²Afei wubehu sɛ me AWURADE, mate animtiaabu nsɛm a woaka atia Israel mmepɔw no. Wokae se, “Wɔama ada mpan na wɔadan ama yɛn sɛ yɛmfa.”

¹³Mohoahoaa mo ho tiaa me na mokasa tiaa me a moanto sɛbe, na metee.

¹⁴Sɛɛ na Otumfo AWURADE se: Bere a wiase nyinaa redi ahurusi no, mɛma wo ada mpan.

¹⁵Sɛnea wudii ahurusi bere a Israelfi agyapade daa mpan no, saa ɔkwan no na mede wo bɛfa so. Wobɛda mpan, Bepɔw Seir, wo ne Edom nyinaa. Afei wobehu sɛ mene AWURADE no.’ ”