Read Akuapem Twi Contemporary Bible 2020 Hosea 1 Bible Online

Hosea 1 - Akuapem Twi Contemporary Bible 2020 bible

Hosea 1

¹Bere a Usia, Yotam, Ahas ne Hesekia yɛ ahemfo wɔ Yuda, na Yoas babarima Yeroboam di hene wɔ Israel no, AWURADE de saa nsɛm yi baa Beeri babarima Hosea nkyɛn.

²Bere a AWURADE dii kan kasa faa Hosea so no, ɔka kyerɛɛ no se, “Kɔware oguamanfo,[1] na wo ne no nwo, efisɛ ɔman no di aguamammɔ ho fɔ na wɔnam so atetew wɔne Onyankopɔn ntam.”

³Enti, ɔwaree Diblaim babea Gomer, na onyinsɛn woo ɔbabarima maa no.

⁴Na AWURADE ka kyerɛɛ no se, “To ne din Yesreel,[2] efisɛ, merebɛtwe ɔhene Yehufi aso, de atua awu a odii wɔ Yesreel no so ka. Na mede Israel ahenni bɛba awiei.

⁵Saa da no, mebubu Israel tadua wɔ Yesreel bon no mu.”

⁶Gomer nyinsɛnee bio, na ɔwoo ɔbabea. Na AWURADE ka kyerɛɛ Hosea se, “To ne din Lo-ruhama efisɛ, merenna me dɔ adi nkyerɛ Israelfo bio, na meremfa wɔn ho nkyɛ wɔn koraa.

⁷Nanso meyi me dɔ akyerɛ Yudafo. Me AWURADE wɔn Nyankopɔn, mede me tumi begye wɔn afi wɔn atamfo nsam a meremfa tadua, afoa anaa ɔko anaa apɔnkɔ ne apɔnkɔsotefo.”

⁸Bere a Gomer twaa Lo-ruhama nufu akyi no, ɔwoo ɔba barima foforo.

⁹Na AWURADE kae se, “To ne din Lo-ami, efisɛ monnyɛ me nkurɔfo na mennyɛ mo Nyankopɔn.

¹⁰“Nanso Israelfo bɛyɛ sɛ mpoano nwea a wontumi nkan wɔn. Faako a wɔka kyerɛɛ wɔn se, ‘Monnyɛ me nkurɔfo’ no, wɔbɛka se, ‘Moyɛ Onyankopɔn teasefo no mma.’

¹¹Na Yudafo ne Israelfo bɛka abɔ mu bio, na wobeyi ɔkwankyerɛfo baako ama wɔn, na wɔn nyinaa bɛsan afi nnommum no mu aba. Saa da no bɛyɛ da kɛse ama Yesreel.”