Read Akuapem Twi Contemporary Bible 2020 Hosea 8 Bible Online

Hosea 8 - Akuapem Twi Contemporary Bible 2020 bible

Hosea 8

¹“Monhyɛn torobɛnto! Ɔkɔre bi wɔ AWURADE fifo so efisɛ nnipa no abu mʼapam so na wɔasɔre atia me mmara.

²Afei Israel su frɛ me se, ‘Yɛn Nyankopɔn, yegye wo to mu!’

³Nanso Israel apo nea eye; ɔtamfo bɛtaa no.

⁴Wosisi ahemfo a minnim ho hwee, wɔpaw ahenemma wɔ bere a mempenee so ɛ. Wɔde wɔn dwetɛ ne wɔn sikakɔkɔɔ yɛ ahoni ma wɔn ho de sɛe wɔn ankasa ho.

⁵Tow wo nantwi ba ohoni no kyene, Samaria! Mʼabufuwhyew reba wɔn so. Wɔbɛtena nea ɛho ntew mu akosi da bɛn?

⁶Wofi Israel! Saa nantwi ba yi, odwumfo bi na osenii; ɛnyɛ Onyankopɔn! Wobebubu mu asinasin, saa Samaria nantwi ba no.

⁷“Wodua mframa na wotwa mfɛtɛ. Awi a egyina hɔ no nni ti; nti wɔrennya siam mfi mu. Sɛ ɛsow aduan mpo a, ahɔho na wobedi.

⁸Wɔamene Israel; afei ɔfra aman no mu te sɛ ade a so nni mfaso biara.[4]

⁹Na wɔakɔ Asiria te sɛ wuram afurum a ɔno nko ara nenam. Efraim nso atɔn ne ho ama adɔfo.

¹⁰Ɛwɔ mu, wɔatɔn wɔn ho wɔ amanaman no mu de, nanso mɛboaboa wɔn ano. Wɔn so befi ase atew wɔ ɔhene kɛse bi nhyɛso ase.

¹¹“Ɛwɔ mu sɛ Efraim sisii afɔremuka bebree a wɔbɔ bɔnefakyɛ afɔre wɔ so de, ɛno nti abɛyɛ afɔremuka a wɔyɛ bɔne wɔ so.

¹²Mekyerɛw me mmara a ɛfa nneɛma bebree ho maa wɔn, nanso wɔfaa no sɛ ananafo ade.

¹³Wɔde mʼayɛyɛde bɔ afɔre na wɔwe nam no, nanso wɔnsɔ AWURADE ani. Afei ɔbɛkae wɔn atirimɔdensɛm na wɔatwe wɔn aso wɔ wɔn bɔne ho: Wɔbɛsan akɔ Misraim.

¹⁴Israel werɛ afi ne yɛfo na wasisi ahemfi akɛseakɛse; Yuda abɔ nkurow bebree ho ban. Nanso mɛto ne nkuropɔn mu gya a ɛbɛhyew wɔn aban.”