Read Akuapem Twi Contemporary Bible 2020 Amos 3 Bible Online

Amos 3 - Akuapem Twi Contemporary Bible 2020 bible

Amos 3

¹Muntie saa asɛm a AWURADE aka atia mo yi, Israelfo, nea etia abusua a miyii wɔn fii Misraim no nyinaa:

²“Mo nko ara na mayi mo wɔ mmusua a ɛwɔ asase so nyinaa mu; enti mɛtwe mo aso wɔ mo bɔne nyinaa ho.”

³Nnipa baanu betumi abɔ mu anantew, wɔ bere a wɔnyɛɛ nokoro ana?

⁴Gyata bobɔ mu wɔ ɔdɔtɔ ase wɔ bere a onhuu hanam biara ana? Ɔbobɔ mu wɔ ne tu mu wɔ bere a ɔnkyeree hanam biara ana?

⁵Anomaa bɛtɔ afiri mu wɔ fam wɔ baabi a wonsum afiri ana? Afiri huan konkɔn hɔ wɔ bere a enyii aboa ana?

⁶Sɛ wɔhyɛn torobɛnto wɔ kuropɔn mu a nnipa no ho mpopo ana? Sɛ atoyerɛnkyɛm ba kuropɔn bi mu a ɛnyɛ AWURADE na ɔyɛe ana?

⁷Ampa ara, Otumfo AWURADE nyɛ biribi a ɔnna ne nhyehyɛe adi nkyerɛ nʼAsomafo adiyifo no.

⁸Gyata no abobɔ mu, hena na onnsuro? Otumfo AWURADE akasa, hena na ɔrenhyɛ ho nkɔm?

⁹Mompae mu nka nkyerɛ Asdod aban ne Misraim aban: “Mommoaboa mo ho ano wɔ Samaria mmepɔw so; hwɛ basabasayɛ a ɛwɔ no so ne nhyɛso a ɛwɔ ne nkurɔfo mu.”

¹⁰“Wonnim sɛnea wɔyɛ nea eye,” sɛnea AWURADE se ni. “Wɔde nneɛma a wɔafow ne nea wɔawia sie wɔ wɔn aban mu.”

¹¹Ɛno nti, sɛɛ na Otumfo AWURADE se, “Ɔtamfo bi betwiw afa mo asase no so; Obebubu mo bammɔ agu, na wɔafow mo aban.”

¹²Nea AWURADE se ni: “Sɛnea oguanhwɛfo gye anan abien nnompe anaa aso sin pɛ fi gyata anum no, saa ara na wobegye Israelfo nkwa, wɔn a wɔtete wɔn mpa ntwea so wɔ Samaria, ne wɔn a wɔdeda nkongua pa mu wɔ Damasko no.”

¹³“Tie eyi, na di adanse tia Yakobfi,” sɛnea AWURADE, Asafo AWURADE Nyankopɔn se ni.

¹⁴“Da a mɛtwe Israel aso wɔ ne nnebɔne ho no, mɛsɛe afɔremuka a ɛwɔ Bet-El; wobetwitwa afɔremuka no mmɛn na abu ahwe fam.

¹⁵Medwiriw awɔwbere mu ofi ne ahuhurubere mu ofi agu; na afi a wɔde asonse adura ho no wɔbɛsɛe no na afi akɛse no nso wobebubu agu,” sɛnea AWURADE se ni.