Read Akuapem Twi Contemporary Bible 2020 Amos 5 Bible Online

Amos 5 - Akuapem Twi Contemporary Bible 2020 bible

Amos 5

¹Tie asɛm yi, mo Israelfo, saa adwotwa yi fa mo ho:

²“Ɔbabun Israel ahwe ase a ɔrensɔre bio, wɔapo no wɔ nʼankasa asase so, na onni obi a ɔbɛma no so.”

³Nea Otumfo AWURADE se ni: “Kuropɔn a ɔde mmarima ahoɔdenfo apem ko ma Israel no, mu ɔha pɛ na wɔbɛka; Kurow a ɔde ahoɔdenfo ɔha no, mu du pɛ na wɔbɛka.”

⁴Nea AWURADE ka kyerɛ Israelfo ni: “Monhwehwɛ me na munnya nkwa;

⁵Monnhwehwɛ Bet-El, monnkɔ Gilgal, na munntu kwan nkɔ Beer-Seba nso. Ampa ara Gilgal bɛkɔ nnommum mu na wɔbɛhwe Bet-El ase koraa.”

⁶Monhwehwɛ AWURADE na munnya nkwa, anyɛ saa a ɔbɛpra Yosef fi te sɛ ogya; ɛbɛhyew, na Bet-El rennya obi anum no.

⁷Mo a moma atemmu yɛ nwen na mototo trenee ase.

⁸Nea ɔbɔɔ nsoromma, Akokɔbeatan ne ne mma, nea ɔdan sum yɛ no adekyee na ɔma awia dan adesae. Nea ɔboaboa po mu nsu ano na ohwie gu asase so, ne din ne AWURADE.

⁹Ɔsɛe abandennen ntɛm so na obubu kuropɔn a wɔabɔ ho ban nso,

¹⁰motan nea ɔteɛteɛ wɔ asennii na mubu nea ɔka nokware animtiaa.

¹¹Mutiatia ohiani so na mohyɛ no gye aduan fi ne nkyɛn. Enti ɛwɔ mu sɛ mode abo a wɔatwa asisi afi akɛse de, nanso morentena mu; ɛwɔ mu sɛ moayɛ bobe nturo a ɛyɛ fɛ de nanso morennom mu nsa.

¹²Na minim mo mmarato dodow ne mo bɔne akɛse no. Mohyɛ atreneefo so na mugye adanmude mubu ahiafo ntɛnkyew wɔ asennii.

¹³Ɛno nti, onyansafo yɛ komm saa mmere yi mu, efisɛ ɛyɛ mmere bɔne.

¹⁴Monhwehwɛ papa, na moanya nkwa na ɛnyɛ bɔne. Na Asafo AWURADE Nyankopɔn bɛka wo ho, sɛnea moka sɛ ɔyɛ no.

¹⁵Munkyi bɔne, na monnɔ papa; Mummu atɛntrenee wɔ asennii. Ebia, Asafo AWURADE Nyankopɔn benya ahummɔbɔ ama Yosef nkae no.

¹⁶Enti nea AWURADE, Asafo AWURADE Nyankopɔn se ni: “Adwotwa bɛba mmorɔn nyinaa so na ɔyaw ne apinisi bɛba mmɔnten so. Wɔbɛfrɛ akuafo ama wɔabesu na agyamfo abetwa adwo.

¹⁷Wobetwa adwo wɔ bobeturo nyinaa mu, efisɛ mɛnantew mo mu,” sɛnea AWURADE se ni.

¹⁸Nnome nka wɔn a wɔpɛ sɛ AWURADE da no ba! Dɛn nti na mopɛ sɛ AWURADE da no ba? Saa da no bɛyɛ sum, na ɛnyɛ hann.

¹⁹Ɛbɛyɛ te sɛ onipa a oguan fi gyata anim na okohyia sisi, sɛnea owura ne fi de ne nsa to ɔfasu so, na ɔwɔ ka no.

²⁰Na AWURADE da no bɛyɛ sum; ɛrenyɛ hann, ɛbɛyɛ sum kabii a hann nsinsan biara nni mu.

²¹“Mikyi na mepo mo nyamesom mu aponto; mʼani nnye mo afahyɛ nhyiamu ho.

²²Ɛwɔ mu sɛ mode ɔhyew afɔre ne aduan afɔre brɛ me de, nanso merennye. Mode asomdwoe afɔre brɛ me nanso mʼani rensɔ.

²³Momfa mo nnwonto gyegyeegye no mfi me so! Merentie mo asankuten so nnwom.

²⁴Mmom, momma atɛntrenee nteɛ sɛ asubɔnten, na trenee nyɛ sɛ asuten a ɛrenyow da!

²⁵“Israelfo, ɛnyɛ me na mode afɔrebɔde ne ayɛyɛde brɛɛ me mfe aduanan wɔ sare so ana?

²⁶Mode mo ho nyinaa ato Molok nyame, ne mo honi Rɛfan so; wɔyɛ ahoni a moayɛ sɛ mobɛsom wɔn.

²⁷Ɛno nti, metwa mo asu akɔ Damasko nohɔ,” sɛnea AWURADE a ne din ne Asafo Onyankopɔn se ni.