Read Akuapem Twi Contemporary Bible 2020 5 Mose 14 Bible Online

5 Mose 14 - Akuapem Twi Contemporary Bible 2020 bible

5 Mose 14

¹Moyɛ AWURADE, mo Nyankopɔn no, mma. Ɛno nti monnsesa mo ho anaa monntworɔtworɔw mo moma so mma awufo,

²efisɛ, moyɛ nnipa kronkron ma AWURADE, mo Nyankopɔn no. Nnipa a wɔwɔ asase so nyinaa, mo na AWURADE ayi mo sɛ nʼagyapade a ɛsom bo.

³Munnni akyiwade biara.

⁴Eyinom ne mmoa a ɛsɛ sɛ mowe: nantwi, oguan, abirekyi

⁵ɔforote, adowa, ɔwansan, ewi, ɔtwe, ne ɛko.

⁶Na munni tɔteboa biara a ne tɔte mu apae abien na opuw wosaw.

⁷Nanso ntɔteboa a wopuw wosaw anaa wɔn tɔte mu apae abien no mu no, monnwe yoma, adanko ne atwaboa, efisɛ, wopuw wosaw de, nanso wɔn tɔte mu mpae; wɔn ho ntew mma mo.

⁸Prako nso ho ntew. Ɛwɔ mu sɛ ne tɔte mu apae de, nanso ompuw nwosaw. Ɛnsɛ sɛ mowe ne nam anaa mode mo nsa so ne funu mu koraa.

⁹Nsumnam a wɔwɔ ntɛtɛ ne abon nyinaa mutumi we.

¹⁰Nanso nsumnam a wonni ntɛtɛ ne abon de, monnwe. Wɔn ho ntew mma mo.

¹¹Anomaa biara a ne ho tew no, monwe.

¹²Nnomaa a ɛnsɛ sɛ mowe ni: ɔkɔre, opete, asu so kɔre,

¹³ɔkompete, nkorɔma ahorow nyinaa

¹⁴kwaakwaadabi ahorow nyinaa,

¹⁵sohori, anadwo akoroma, ɛpo so asomfena ne akoroma ahorow nyinaa,

¹⁶patu, ɔpatukɛse, bakanoma

¹⁷nantwinoma, opete ne ɛpo so kwaakwaadabi,

¹⁸ne asukɔnkɔn ahorow nyinaa, asuɔkwaa ne ampan.

¹⁹Ntummoa a wɔwea nyinaa ho ntew mma mo; monnwe.

²⁰Nanso aboa a ɔwɔ ntaban a ne ho tew biara no motumi we.

²¹Monnwe aboa biara a mubehu sɛ wawu. Momfa mma ɔhɔho a ɔne mo te, anaasɛ montɔn ma ɔnanani. Na mo ankasa de, monnwe, efisɛ wɔayi mo asi nkyɛn sɛ ɔman kronkron ama AWURADE, mo Nyankopɔn no. Monnnoa abirekyi ba wɔ ne na nufusu mu.

²²Afe biara monhwɛ na munyi mo mfuw mu nnɔbae nkyɛmu du mu baako.

²³Munni mo atoko, nsa, ne ngo, ne mo anantwi ne nguan abakan wɔ AWURADE, mo Nyankopɔn no, anim wɔ faako a ɔbɛpaw sɛ ɛyɛ atenae wɔ ne din mu na ama moasua sɛnea wosi di AWURADE, mo Nyankopɔn no ni daa.

²⁴Sɛ beae a AWURADE, mo Nyankopɔn no, bɛkyerɛ mo sɛ monkamfo ne din no ne nea mote no ntam kwan ware a,

²⁵ɛno de, momfa mo ntotoso du du no nsesa dwetɛ na momfa dwetɛ no nkɔ beae a AWURADE, mo Nyankopɔn no, bɛpaw no.

²⁶Sɛ mudu hɔ a, momfa sika no ntɔ biribiara a mo kɔn dɔ, sɛ ebia, nantwi, oguan, bobesa, anaa nsa biara a ɛyɛ den ne ade biara a mo kra pɛ na mo ne mo fifo nni wɔ AWURADE, mo Nyankopɔn no, anim na mo ani nnye.

²⁷Na mummu mo ani ngu Lewifo a wɔfra mo mu no so, efisɛ wonni wɔn ankasa wɔn agyapade biara.

²⁸Mfe abiɛsa biara awiei no, momfa mo nnɔbae so ntotoso du du no mmra mmɛkora wɔ mo nkurow mu,

²⁹sɛnea ɛbɛyɛ a Lewifo a wonni agyapade mu kyɛfa wɔ mo mu no ne ananafo a wɔwɔ mo nkurow so ne nyisaa ne akunafo a wɔwɔ mo nkurow so no betumi adidi amee; na ama AWURADE, mo Nyankopɔn no, ahyira mo nsa ano nnwuma nyinaa so.