Read Akuapem Twi Contemporary Bible 2020 5 Mose 16 Bible Online

5 Mose 16 - Akuapem Twi Contemporary Bible 2020 bible

5 Mose 16

¹Daa munni Twam Afahyɛ no wɔ ɔsram Abib[1] no mu mma AWURADE, mo Nyankopɔn, efisɛ ɔsram Abib mu da bi anadwo na Onyankopɔn yii mo fii Misraim.

²Munkum anantwi anaa nguan sɛ Twam afɔrebɔde mma AWURADE, mo Nyankopɔn no, wɔ faako a AWURADE beyi sɛ atenae wɔ ne din mu no.

³Munnni mmɔkaw brodo nka ho; na mmom, nnanson so na munni apiti amanehunu brodo, efisɛ mufii Misraim ɔhare so, sɛnea ɛbɛyɛ a mo nkwanna nyinaa mu no mobɛkae bere a mutu fii Misraim no.

⁴Mommma wonhu sɛ mowɔ mmɔkaw wɔ mo nkyɛn wɔ mo nsase nyinaa so nnanson. Mommma nam a mode bɔɔ afɔre da a edi kan no anwummere no nka gya so nkosi anɔpa.

⁵Mommɔ Twam Afahyɛ afɔre no wɔ nkurow a AWURADE, mo Nyankopɔn no, de rema mo no mu biara so,

⁶gye faako a AWURADE, mo Nyankopɔn no, beyi sɛ wɔnkamfo ne din wɔ hɔ no. Ɛhɔ na mommɔ Twam afɔre no anwummere mfa nni mo Misraimfi bere no afahyɛ.

⁷Montoto na monwe no wɔ faako a AWURADE, mo Nyankopɔn no, bɛpaw ama mo no. Na ade kye a, monsan nkɔ mo ntamadan mu.

⁸Nnansia na momfa nni apiti, na ne nnanson so no, nnipa no nyinaa nhyia wɔ AWURADE, mo Nyankopɔn no, anim. Na saa da no, obiara nyɛ adwuma.

⁹Mumfi bere a mubefi ase atwa atoko no nkan nnaawɔtwe ason.

¹⁰Na monhwɛ sɛnea AWURADE, mo Nyankopɔn no, asi ahyira mo no so mfi mo pɛ mu mmɔ afɔre, nnyina so nni Asese Afahyɛ no mma AWURADE, mo Nyankopɔn no.

¹¹Na munnye mo ani wɔ AWURADE, mo Nyankopɔn no, anim wɔ faako a ɔbɛpaw sɛ atenae ma ne din no. Mo ne mo mmabarima ne mo mmabea, mo nkoa ne mo mfenaa, Lewifo a wɔwɔ mo nkurow mu ne ahɔho, nyisaa ne akunafo a wɔne mo te nyinaa.

¹²Monkae sɛ na moyɛ nkoa wɔ Misraim enti monhwɛ yiye na munni saa mmara yi nyinaa so.

¹³Sɛ moboaboa mo awiporowbea ne mo nsakyi amoa mu ade ano wie a, momfa nnanson nni Asese Afahyɛ no.

¹⁴Munnye mo ani wɔ mo afahyɛ yi se; mo ne mo abusuafo, mo asomfo ne Lewifo, ahɔho, nyisaa ne akunafo a wofi mo nkurow mu.

¹⁵Momfa nnanson nni saa afahyɛ yi mfa nhyɛ AWURADE, mo Nyankopɔn no, anuonyam wɔ faako a ɔbɛpaw, efisɛ AWURADE, mo Nyankopɔn no, na ɔma mo nnɔbae bɔ pii na ohyira mo nnwuma nyinaa so; na mo anigye bewie pɛyɛ.

¹⁶Afe biara mu no, ɛsɛ sɛ mo mmarima no nyinaa hyia wɔ mo AWURADE, mo Nyankopɔn no, anim faako a ɔbɛpaw no mprɛnsa de ama Apiti Afahyɛ, Otwabere Afahyɛ ne Asese Afahyɛ no. Ɛnsɛ sɛ obiara ba AWURADE anim nsapan.

¹⁷Ɛsɛ sɛ obiara de akyɛde a ɛne nhyira a AWURADE, mo Nyankopɔn no, nhyira no no sɛ ba.

¹⁸Munsisi atemmufo ne mpanyimfo mfi mo mmusuakuw biara mu wɔ nkurow a AWURADE, mo Nyankopɔn no, de rema mo no mu, na wobebu nnipa no atɛntrenee.

¹⁹Mummmu ntɛnkyew anaa monnhwɛ nnipa anim mmu atɛn. Monnnye adanmude, efisɛ adanmude fura onyansafo ani ma ɔdan nea odi bem no asɛm ani.

²⁰Mummu atɛntrenee nkutoo, na ama moatumi atena asase a AWURADE, mo Nyankopɔn no, de rema mo no so.

²¹Mummfi afɔremuka a mubesi ama AWURADE, mo Nyankopɔn no, akyi nsi abosonnua foforo biara,

²²na munnsi ɔbo kronkron, efisɛ AWURADE, mo Nyankopɔn no, kyi eyinom.