Read Akuapem Twi Contemporary Bible 2020 5 Mose 6 Bible Online

5 Mose 6 - Akuapem Twi Contemporary Bible 2020 bible

5 Mose 6

¹Eyinom ne ahyɛde, mmara ne nhyehyɛe a AWURADE mo Nyankopɔn ka kyerɛɛ me se menkyerɛkyerɛ mo na munni so wɔ asase a moretwa Yordan akɔfa no so,

²sɛnea ɛbɛyɛ a mo mma ne wɔn mma besuro AWURADE, mo Nyankopɔn, mmere dodow a mote ase no, na moadi ne mmara ne nʼahyɛde a mede ma mo no nyinaa so nyinaa so a mo nkwanna aware.

³Muntie, Ao Israel, na monhwɛ yiye nni so sɛnea ɛbɛyɛ a ebesi mo yiye na mo ase atrɛw yiye wɔ asase a nufusu ne ɛwo resen wɔ so no so sɛnea AWURADE, mo agyanom Nyankopɔn, hyɛɛ mo ho bɔ no.

⁴Tie, Ao Israel, AWURADE yɛn Nyankopɔn yɛ Awurade koro.

⁵Dɔ AWURADE wo Nyankopɔn fi wo koma nyinaa mu ne wo kra nyinaa mu ne wʼahoɔden nyinaa mu.

⁶Momma saa mmaransɛm a mede rema wo nnɛ yi ntena mo koma mu.

⁷Momfa nhyɛ mo mma mu. Sɛ mote fie anaa monam ɔkwan so, sɛ moda hɔ anaa mosɔre a, monka ho asɛm.

⁸Monkyekye no sɛ agyiraehyɛde mmɔ mo nsa na momfa bi mmɔ abotiri.

⁹Monkyerɛw ngu mo afi apongua ne mo abobow ano apon so.

¹⁰AWURADE mo Nyankopɔn de mo ba asase a ɔkaa ntam sɛ ɔde bɛma mo agyanom Abraham, Isak ne Yakob no, asase a nkuropɔn a ɛnyɛ mo na mokyekyeree ahyɛ so ma no so,

¹¹afi a nneɛma pa ahorow a ɛnyɛ mo na moyɛe ahyɛ no ma, mmura a ɛnyɛ mo na mututui, bobeturo a ɛnyɛ mo na moyɛe ne ngonnua a ɛnyɛ mo na muduae no so. Sɛ mudidi mee wɔ saa asase yi so a,

¹²monhwɛ yiye na mo werɛ amfi AWURADE a ogyee mo fii nkoasom mu wɔ Misraim asase so no.

¹³Ɛsɛ sɛ musuro AWURADE, mo Nyankopɔn, na mosom ɔno nko ara. Ne din nko ara na momfa nka ntam.

¹⁴Munnni anyame foforo akyi; anyame a wɔyɛ nnipa a wɔatwa mo ho ahyia no anyame no;

¹⁵na AWURADE mo Nyankopɔn a ɔwɔ mo ntam no yɛ Onyankopɔn ninkufo a nʼabufuw no bɛhyew mo, na ɔbɛsɛe mo afi asase no so.

¹⁶Monnsɔ AWURADE, mo Nyankopɔn, nhwɛ sɛnea moyɛe bere a na mowɔ Masa no.

¹⁷Ɛsɛ sɛ mudi AWURADE, mo Nyankopɔn, ahyɛde ne nea ɛwɔ mmara a ɔde ama mo no mu no so pɛpɛɛpɛ.

¹⁸Monyɛ de ɛteɛ na eye wɔ AWURADE ani so na biribiara awie mo yiye. Na moakɔ akɔfa asase pa a AWURADE hyɛɛ ho bɔ kyerɛɛ mo agyanom no,

¹⁹na moapam atamfo a wɔwɔ mo anim no nyinaa sɛnea AWURADE kae no.

²⁰Daakye bi, sɛ mo mma bisa mo se, “Saa mmara ne nʼahyɛde a AWURADE, yɛn Nyankopɔn, de ama mo yi ase ne dɛn?”

²¹a monka nkyerɛ wɔn se, “Na yɛyɛ Farao nkoa wɔ Misraim nanso AWURADE nam anwonwatumi so yii yɛn fii Misraim.

²²Yɛn ani tua AWURADE nsɛnkyerɛnne ne anwonwade akɛse na ɛyɛ hu a ɔyɛ tiaa Misraim, Farao ne ne nkurɔfo nyinaa.

²³Oyii yɛn fii Misraim sɛnea ɛbɛyɛ a, obetumi de asase a wahyɛ yɛn agyanom ho bɔ no ama yɛn.

²⁴Na AWURADE yɛn Nyankopɔn hyɛɛ yɛn sɛ yenni mmara no nyinaa so na yɛmfa obu ne nidi mma no sɛnea ɛbɛma asi yɛn yiye daakye sɛnea ɛte nnɛ yi.

²⁵Efisɛ sɛ yedi mmara no nyinaa a AWURADE, yɛn Nyankopɔn, de ama yɛn no so a, ɛbɛyɛ yɛn trenee.”