Read Akuapem Twi Contemporary Bible 2020 Yosua 15 Bible Online

Yosua 15 - Akuapem Twi Contemporary Bible 2020 bible

Yosua 15

¹Asase a wɔde maa mmusua a wobom yɛ Yuda abusuakuw no koduu Edom hye so wɔ anafo fam, na Sin sare so na ɛkɔpem.

²Anafo fam hye no fitii ase wɔ Nkyene Po no awiei a ɛwɔ anafo fam,

³sen faa Akrabbim kosii Sin sare so. Ɛtoaa so kɔɔ Kades-Barnea anafo fam kosii Hesron. Afei ɛkɔɔ soro kosii Adar na ɛpono kɔɔ Karka.

⁴Etwaa mu ha kɔɔ Asmon koduu Misraim asuwa no ho, na ɛfaa ho ara kowiee wɔ Po Kɛse no mu. Eyi ne wɔn anafo fam hye.

⁵Apuei fam hye no fi Nkyene Po no kodu Asubɔnten Yordan ano. Atifi fam hye no fi beae a Asubɔnten Yordan bɔ Nkyene Po no mu,

⁶twa mu kɔ Bet-Hogla, na afei akɔ Bet-Araba atifi fam, akɔka Bohan bo (Na Bohan yɛ Ruben babarima) no ho.

⁷Efi hɔ a, ɛkɔfa Akɔr bon no mu kɔka Debir, na ɛdan wɔ atifi fam kyerɛ Gilgal, a etwa mu fi Adumim nsian mu wɔ anafo fam wɔ obon no nkyɛn mu. Efi hɔ a, ɔhye no sen kosi En-Semes nsu no ano, na akɔpem En-Rogel.

⁸Afei, ɔhye no fa Hinom babarima bon no mu, kɔfa Yebusifo anafo nsian so, nea Yerusalem kuropɔn no da. Afei ɛkɔ atɔe fam wɔ bepɔw no apampam, toa so kɔ Hinom bon no so kosi Refaim bon ano wɔ atifi fam.

⁹Efi hɔ a, ɔhye no toa so kɔfa bepɔw no apampam kɔ Neftoa asuti no nsu ho, fi hɔ akɔ nkurow a ɛdeda Efron bepɔw so no. Na ebukaw kɔ Baala (a ɛyɛ Kiriat-Yearim.)

¹⁰Ɔhye no twa fa Baala ho wɔ atɔe fam kosi bepɔw Seir so, ɛkɔ ara kosi Kesalon kurom wɔ bepɔw Yearim atifi nsian so, na akɔ fam akosi Bet-Semes ne Timna.

¹¹Ɔhye no kɔɔ ara kosii bepɔw no nsian a ɛwɔ Ekron atifi fam no, dan kyerɛɛ Sikron, faa hɔ kɔɔ Baala bepɔw no de koduu Yabneel. Ɔhye no kɔpem Po Kɛse no.

¹²Na atɔe fam hye no nso ne Ntam Po no mpoano. Eyinom ne mmusua a wɔbɔ mu yɛ Yuda mmusuakuw no ahye.

¹³AWURADE hyɛɛ Yosua se ɔmfa Yuda asase no bi mma Yefune babarima Kaleb. Enti, wɔde kuropɔn Arba (a ɛyɛ Hebron) a wɔde too Anak tete agya no maa no.

¹⁴Na Kaleb tuu Sesai, Ahiman ne Talmai a wɔyɛ Anak asefo no fii hɔ.

¹⁵Afei, ɔko tiaa nnipa a na wɔte kurow Debir (a kan no na wɔfrɛ no Kiriat-Sefer) no.

¹⁶Kaleb kae se, “Mede me babea Aksa bɛma obi a ɔbɛtow ahyɛ Kiriat-Sefer kurow no so na wadi so no aware.”

¹⁷Ɛnna Kaleb nua Kenas babarima Otniel dii so nti, Aksa bɛyɛɛ Otniel yere.

¹⁸Aksa waree Otniel no, ɔhyɛɛ no sɛ ommisa nʼagya Kaleb na ɔmfa asase no bi nka ho. Aksa fii nʼafurum so sii fam no, Kaleb bisaa no se, “Dɛn na menyɛ mma wo?”

¹⁹Ɔka kyerɛɛ no se, “Yɛ me adom sononko. Woayɛ adom, ama me Asase wɔ Negeb; ma me nsuwansuwa asase nso.” Enti Kaleb maa no ɔsoro ne fam nsuwansuwa asase.

²⁰Eyi ne mmusua a wɔbɔ mu yɛ Yuda abusuakuw no agyapade.

²¹Na Yudafo nkurow a ɛdeda Edom ahye so wɔ anafo pɛɛ no ne: Kabseel ne Eder ne Yagur,

²²Kina ne Dimona ne Adada,

²³Kedes ne Hasor ne Itnan,

²⁴Sif ne Telem ne Bealot,

²⁵Hasor-Hadata ne ne Keriot Hesron (a ɛne Hasor),

²⁶Amam ne Sema ne Molada,

²⁷Hasar-Gada ne Hesmon ne Bet-Pelet,

²⁸Hasar-Sual ne Beer-Seba ne Bisotia,

²⁹Baala ne Iim ne Esem,

³⁰El-Tolad ne Kesil ne Horma,

³¹Siklag ne Madmana ne Sansana,

³²Lebaot ne Silhim ne Ain ne Rimon. Na saa nkurow yi nyinaa ne wɔn nkuraa a atwa ho ahyia dodow yɛ aduonu akron.

³³Saa nkurow a na ɛwɔ atɔe fam nkoko no so, a wɔde maa Yuda ni: Estaol ne Sora ne Asna.

³⁴Sanoa ne En-Ganim, Tapua ne Enam,

³⁵Yarmut ne Adulam, Soko ne Aseka,

³⁶Saaraim ne Aditaim ne Gedera ne Gederotaim. Saa nkurow yi ne nkuraa a atwa ho ahyia nyinaa dodow yɛ dunan.

³⁷Nea ɛka ho bio ne Senan ne Hadasa ne Migdal-gad,

³⁸Dilean ne ne Mispe ne Yokteel,

³⁹Lakis ne Boskat ne Eglon,

⁴⁰Kabon ne Lahmam ne Kitlis,

⁴¹Gederot, Bet-Dagon ne Naama ne Makeda. Saa nkurow yi ne nkuraa a atwa ho ahyia nyinaa dodow yɛ dunsia.

⁴²Eyinom akyi no na Libna ne Eter ne Asan,

⁴³Yifta ne Asna ne Nesib,

⁴⁴Keila ne Aksib ne Maresa ka ho. Saa nkurow yi ne nkuraa a atwa ho ahyia nyinaa dodow yɛ akron.

⁴⁵Ekron nkurow ne nkuraa nyinaa ka Yuda asase ho,

⁴⁶efi Ekron no, ɔhye no trɛw de kɔ atɔe fam a nkurow a ɛbɛn Asdod ne wɔn nkuraa a atwa ho ahyia ka ho.

⁴⁷Saa ara na Asdod nkurow ne ne nkuraa, Gasa nkurow ne ne nkuraa kosi Misraim asuwa no, de kɔfa Po Kɛse no mpoano ka ho.

⁴⁸Yuda san nyaa nkurow a edidi so yi a na ɛwɔ nkoko asase so: Samir ne Yatir ne Soko,

⁴⁹Dana ne Kiriat-Sana a ɛne Debir,

⁵⁰Anab ne Estemo ne Anim,

⁵¹Gosen ne Holon ne Gilo, Saa nkurow yi ne nkuraa a atwa ho ahyia nyinaa dodow yɛ dubaako.

⁵²Na saa nkurow yi ka ho: Arab ne Duma ne Esan,

⁵³Yanum ne Bet-Tapua ne Afeka,

⁵⁴Humta ne Kiriat-Arba (a ɛyɛ Hebron) ne Sior. Nkurow akron ne ne nkuraa a atwa ho ahyia.

⁵⁵Nkurow a edidi so yi nso ka ho: Maon, Karmel, Sif ne Yuta,

⁵⁶Yesreel ne Yokdeam ne Sanoa,

⁵⁷Kain, Gibea ne Timna, nkurow du ne ne nkuraa a atwa ho ahyia.

⁵⁸Bio Halhul, Bet-Sur ne Gedor,

⁵⁹Maarat ne Bet-Anot ne Eltekon ka ho, nkurow asia ne ne nkuraa a atwa ho ahyia.

⁶⁰Saa ara na Kiriat-Baal (a ɛne Kiriat-Yearim) ne Raba ka ho, nkurow abien ne ne nkuraa a atwa ho ahyia.

⁶¹Sare so nkurow no nso ne: Bet-Araba, Midin ne Sekaka,

⁶²Nibsan ne Nkyene kuropɔn no ne En-Gedi, nkurow asia ne ne nkuraa a atwa ho ahyia.

⁶³Na Yebusifo a wɔte Yerusalem no de, Yuda abusuakuw no antumi antu wɔn nti, Yebusifo ne Yuda abusuakuw no tenae de besi nnɛ.