Read Akuapem Twi Contemporary Bible 2020 Yosua 21 Bible Online

Yosua 21 - Akuapem Twi Contemporary Bible 2020 bible

Yosua 21

¹Afei, Lewifo abusua mu ntuanofo kɔɔ ɔsɔfo Eleasar ne Nun babarima Yosua ne Israel mmusuakuw a aka mu ntuanofo no nkyɛn.

²Wɔka kyerɛɛ wɔn wɔ Silo a ɛwɔ Kanaan asase so no se, “AWURADE hyɛɛ Mose sɛ, ɔmma yɛn nkurow na yɛntena mu ne adidibea mma yɛn anantwi.”

³Na sɛnea AWURADE hyɛe no, wɔde nkurow a edidi so yi a wɔn adidibea ka ho maa Lewifo sɛ wɔn agyapade.

⁴Aaron asefo a na wɔyɛ Kohat abusuamma, na wɔfra Lewi abusuakuw mu no nyaa nkurow dumiɛnsa a na anka ɛyɛ Yuda, Simeon ne Benyamin mmusuakuw no dea.

⁵Afi a aka wɔ Kohat abusua mu no, wɔmaa wɔn nkurow du fii Efraim ne Dan mmusuakuw no ne Manase abusuakuw fa no nsase mu.

⁶Gerson abusua no nso, wɔmaa wɔn nkurow dumiɛnsa fii Isakar, Aser, Naftali ne Manase abusuakuw fa no wɔ Basan.

⁷Merari abusua no nyaa nkurow dumien fii Ruben, Gad ne Sebulon mmusuakuw no nkyɛn.

⁸Enti Israelfo no dii AWURADE ɔhyɛ nsɛm a ɔde maa Mose no so. Wɔbɔɔ ntonto kronkron, nam so yiyii saa nkurow yi ne adidibea a ɛkeka ho maa Lewifo.

⁹Israelfo no de saa nkurow a ɛyɛ Yuda ne Simeon mmusuakuw no dea no

¹⁰maa Aaron asefo a wɔfra Kohat abusua mu na ɛka Lewi abusuakuw ho no, efisɛ ntonto kronkron a edi kan no bɔɔ wɔn.

¹¹Kiriat-Arba a (wɔfrɛ no Hebron), a ɛwɔ Yuda bepɔw asase so ne ɛho adidibea. (Arba yɛ Anak tete agya.)

¹²Nanso nsase ne nkuraa a atwa kurow no ho ahyia no de, wɔde maa Yefune babarima Kaleb.

¹³Nkurow a edidi so yi ne wɔn adidibea no wɔde maa ɔsɔfo Aaron asefo: Hebron (guankɔbea kuropɔn ma nea ne nsa apa wɔ obi ho), Libna,

¹⁴Yatir, Estemoa,

¹⁵Holon, Debir,

¹⁶Ain, Yuta ne Bet-Semes a ɛyɛ nkurow akron a wonya fii saa mmusuakuw abien yi nkyɛn no.

¹⁷Wofi Benyamin abusuakuw mu de saa nkurow yi ne adidibea a atwa ho ahyia no maa asɔfo: Gibeon, Geba,

¹⁸Anatot, Almon—a ɛyɛ nkurow anan.

¹⁹Enti nkurow dumiɛnsa na wɔde maa asɔfo a wɔyɛ Aaron asefo no.

²⁰Kohat[9] abusua nkae a wofi Lewi abusuakuw mu no nso, wɔde saa nkurow yi ne adidibea a efi Efraim abusua nkyɛn maa wɔn:

²¹Sekem, (guankɔbea kuropɔn), Geser.

²²Kibsaim ne Bet-Horon, a ɛyɛ nkurow anan.

²³Saa nkurow ne adidibea yi nso, wɔde maa asɔfo a wofi Dan abusuakuw mu: Elteke ne Gibeton,

²⁴Ayalon ne Gat-Rimon, ɛyɛ nkurow anan.

²⁵Manase abusuakuw fa no de saa nkurow ne wɔn adidibea maa asɔfo no: Taanak ne Gat-Rimon, ɛyɛ nkurow abien.

²⁶Enti nkurow du ne wɔn adidibea na wɔde maa Kohat abusua nkae no.

²⁷Gerson abusua a wɔyɛ Lewi abusuakuw no fa bi no nso nyaa nkurow abien ne wɔn adidibea fii Manase abusua fa no nkyɛn. Nkurow no ne Golan a ɛwɔ Basan (guankɔbea kuropɔn) ne Beestra.

²⁸Isakar abusuakuw no nso maa wɔn: Kision, Daberat,

²⁹Yarmut ne En-Ganim, nkurow anan a wɔn adidibea ka ho.

³⁰Aser abusuakuw no maa Misal, Abdon,

³¹Helkat ne Rehob, a ɛyɛ nkurow anan a wɔn adidibea ka ho.

³²Naftali abusuakuw no maa wɔn Kedes a ɛwɔ Galilea (guankɔbea kuropɔn), Hamot-Dor ne Kartan nkurow abiɛsa ne wɔn adidibea.

³³Enti nkurow dumiɛnsa ne ɛho adidibea na wɔde maa Gerson mmusua no.

³⁴Lewifo nkae a wɔyɛ Merari abusua no nyaa saa nkurow yi a efi Sebulon abusuakuw no nkyɛn: Yokneam, Karta,

³⁵Dimna ne Nahalal—nkurow anan ne ɛho adidibea.

³⁶Ruben abusuakuw no nso maa wɔn Beser, Yahas,

³⁷Kedemot ne Mefaat—nkurow anan ne wɔn adidibea.

³⁸Gad abusuakuw no maa wɔn Ramot a ɛwɔ Gilead (guankɔbea kuropɔn), Mahanaim,

³⁹Hesbon ne Yaser, nkurow anan ne ho adidibea.

⁴⁰Enti nkurow dumien na wɔde maa Merari abusua.

⁴¹Nkurow dodow ne ɛho adidibea a na ɛwɔ Israelman mu a wɔde maa Lewifo no nyinaa yɛ aduanan awotwe.

⁴²Na kurow biara wɔ adidibea da ho.

⁴³Enti AWURADE de nsase a ɔkaa ho ntam sɛ ɔde bɛma wɔn agyanom no maa Israelfo no, na wodii so nkonim, tenaa hɔ.

⁴⁴Na AWURADE ma wonyaa ɔhome wɔ afanan nyinaa, sɛnea ɔhyɛɛ wɔn agyanom bɔ no. Wɔn atamfo biara antumi annyina wɔn anim, efisɛ AWURADE boaa wɔn ma wodii wɔn atamfo so nkonim.

⁴⁵Bɔ pa biara a AWURADE hyɛɛ Israel no nyinaa baa mu; emu bi anni huammɔ.