Read Akuapem Twi Contemporary Bible 2020 Atemmufo 10 Bible Online

Atemmufo 10 - Akuapem Twi Contemporary Bible 2020 bible

Atemmufo 10

¹Abimelek wu akyi no, Pua a ɔyɛ Dodo aseni no babarima Tola ba begyee Israel. Na ofi Isakar abusuakuw mu, nanso ɔtenaa Samir a ɛwɔ Efraim bepɔw asase no so.

²Ɔyɛɛ Israel so temmufo mfe aduonu abiɛsa. Owui no, wosiee no wɔ Samir.

³Tola wu akyi no, Yair a ofi Gilead bɛyɛɛ Israel so temmufo mfe aduonu abien.

⁴Na ne mmabarima aduasa tena wɔn mfurum so kyinkyin, na wodi nkurow aduasa so wɔ Gilead asase so, a ebesi nnɛ wɔfrɛ hɔ Yair Nkurow.

⁵Yair wui na wosiee no Kamon.

⁶Bio, Israelfo yɛɛ AWURADE ani so bɔne. Wɔsom Baal ne Astoret ahoni ne Aram, Sidon, Moab, Amon ne Filisti anyame. Wɔtwee wɔn ho fii AWURADE ho a wɔansom no koraa.

⁷Enti AWURADE bo fuw Israelfo, na ɔde wɔn hyɛɛ Filistifo ne Amorifo nsa,

⁸na wofii ase hyɛɛ wɔn so saa afe no. Wɔhyɛɛ Israelfo a wɔwɔ Asubɔnten Yordan apuei fam wɔ Amorifo (wɔ Gilead) asase no so mfe dunwɔtwe.

⁹Amorifo no nso twaa Yordan kɔɔ atɔe fam kɔtow hyɛɛ Yuda, Benyamin ne Efraim so, Israelfo kɔɔ ahokyere kɛse mu.

¹⁰Afei Israelfo su frɛɛ AWURADE se, “Yɛayɛ bɔne atia wo, efisɛ yɛatwe yɛn ho afi yɛn Nyankopɔn ho na yɛasom Baal ahoni.”

¹¹AWURADE buae se, “Mannye mo amfi Misraimfo, Amorifo, Amonfo, Filistifo,

¹²Sidonfo, Amalekfo ne Maonfo nsam? Bere a wɔhyɛɛ mo so no, musu frɛɛ me na migyee mo.

¹³Nanso moagyaw me akɔsom anyame foforo. Ɛno nti, merennye mo bio.

¹⁴Munkosu nkyerɛ anyame a moafa wɔn no. Momma wonnye mo bere a morehu amane yi.”

¹⁵Nanso Israelfo no kɔɔ so srɛɛ AWURADE se, “Yɛayɛ bɔne. Twe yɛn aso sɛnea ɛfata. Nanso gye yɛn fi yɛn atamfo nsam nnɛ.”

¹⁶Na Israelfo no tow ananafo anyame no guu nkyɛn bɛsom AWURADE. Na AWURADE ho yeraw no wɔ wɔn ahokyere no ho.

¹⁷Saa bere no na Amonfo asraafo aboa wɔn ho ano wɔ Gilead, sɛ wɔrekɔtow ahyɛ Israel asraafo so wɔ Mispa.

¹⁸Na Gilead ntuanofo no keka kyerɛɛ wɔn ho wɔn ho se, “Obiara a obedi kan atow ahyɛ Amonfo so no bɛyɛ nea obedi Gileadfo nyinaa so.”