Read Akuapem Twi Contemporary Bible 2020 Atemmufo 17 Bible Online

Atemmufo 17 - Akuapem Twi Contemporary Bible 2020 bible

Atemmufo 17

¹Ɔbarima bi tenaa Efraim bepɔw asase so a na wɔfrɛ no Mika.

²Da koro bi, ɔka kyerɛɛ ne na se, “Metee sɛ wodomee ɔkorɔmfo a owiaa wo nnwetɛbona kilogram du abien ne fa fii wo nkyɛn no. Nnwetɛbona no wɔ me nkyɛn. Me ara na mefae.” Ne na kae se, “AWURADE nhyira wo, me ba.”

³Ɔde nnwetɛbona kilogram du abien ne fa no maa ne na no, ne na no kae se, “Metew me nnwetɛbona yi ho ma AWURADE. Mɛma wɔayɛ ohoni a wɔde dwetɛ agu. Mɛsan de ama wo.”

⁴Enti ne na de nnwetɛbona ahannu kɔmaa dwetɛdwumfo na ɔde yɛɛ ohoni. Na wɔde sii Mika fi.

⁵Mika yɛɛ nsɔre so na ɔyɛɛ asɔfotade ne ne fifo ahoni kaa ho. Ɛnna ɔhyɛɛ ne mmabarima no mu baako sɔfo.

⁶Saa bere no na Israel nni ɔhene, nti na nnipa no yɛ nea wɔpɛ biara.

⁷Da bi, Lewini aberante bi a ofi Betlehem a ɛwɔ Yuda

⁸beduu saa beae hɔ wɔ Efraim asase so a ɔrehwehwɛ baabi foforo atena. Ɛbae sɛ, ɔkɔsoɛɛ wɔ Mika fi.

⁹Mika bisaa no se, “Ɛhe na wufi?” Ɔno nso buae se, “Meyɛ Lewini a mifi Betlehem wɔ Yuda na merehwehwɛ baabi atena.”

¹⁰Mika ka kyerɛɛ no se, “Wo ne me ntena ha, na wobɛyɛ agya ne ɔsɔfo ama me. Mɛma wo nnwetɛbona gram ɔha ne dunan afe biara; mɛma wo ntade ne aduan.”

¹¹Lewini no penee so na ɔbɛyɛɛ sɛ Mika mmabarima no mu baako.

¹²Enti Mika hyɛɛ Lewini no sɔfo, na ɔtenaa Mika fi.

¹³Na Mika kae se, “Minim sɛ AWURADE behyira me, efisɛ mewɔ Lewini a ɔresom sɛ me sɔfo.”