Read Akuapem Twi Contemporary Bible 2020 1 Samuel 3 Bible Online

1 Samuel 3 - Akuapem Twi Contemporary Bible 2020 bible

1 Samuel 3

¹Abarimaa Samuel dii Eli nan ase, som AWURADE. Saa bere no na asɛm a wɔte fi AWURADE nkyɛn ne anisoadehu yɛ ade a ɛho yɛ na.

²Anadwo bi, na Eli a nʼani reyɛ afura koraa no kɔdae nkyɛe koraa.

³Na Onyankopɔn kanea no nnya nnumii. Saa bere no na Samuel da Ahyiae Ntamadan no mu baabi a ɛbɛn Onyankopɔn adaka no.

⁴Prɛko pɛ, AWURADE frɛe se, “Samuel! Samuel!” Samuel buae se, “Mini.”

⁵Na ɔyɛɛ ntɛm kɔɔ Eli nkyɛn kɔka kyerɛɛ no se, “Mini; wofrɛɛ me.” Eli nso buaa no se, “Memfrɛɛ wo ɛ; san kɔda.” Enti ɔsan kɔdae.

⁶AWURADE san frɛɛ bio se, “Samuel!” Bio, Samuel san yɛɛ ntɛm kɔɔ Eli nkyɛn kɔka kyerɛɛ no se, “Mini; wofrɛɛ me?” Eli buaa no se, “Me ba, memfrɛɛ wo ɛ; san kɔda.”

⁷Na Samuel nnya nhuu AWURADE, efisɛ na AWURADE asɛm mmaa ne nkyɛn da.

⁸AWURADE frɛɛ Samuel ne mprɛnsa so. Na Samuel yɛɛ ntɛm kɔɔ Eli nkyɛn kɔkae se, “Mini; wofrɛɛ me.” Ɛhɔ na Eli huu sɛ ɛyɛ AWURADE na ɔrefrɛ abarimaa no.

⁹Enti ɔka kyerɛɛ Samuel se, “Kɔ na kɔda bio, na sɛ wote sɛ obi refrɛ wo a, gye so se, ‘AWURADE kasa na wʼakoa retie.’ ” Enti Samuel kɔdaa bio.

¹⁰Na AWURADE ba bɛfrɛɛ bio se, “Samuel! Samuel!” Na Samuel buae se, “AWURADE kasa na wʼakoa retie.”

¹¹Na AWURADE ka kyerɛɛ Samuel se, “Merebɛyɛ akomatu ade bi wɔ Israel.

¹²Merebɛyɛ nea maka atia Eli ne nʼabusuafo no nyinaa.

¹³Mabɔ no kɔkɔ mpɛn bebree sɛ, atemmu reba ɔne nʼabusuafo so, efisɛ ne mmabarima abɔ mmusu atia Onyankopɔn, nanso wankasa ankyerɛ wɔn.

¹⁴Na maka ntam se, Eli ne ne mmabarima bɔne no, sɛ wɔbɔ okum afɔre anaa aduan afɔre koraa a, wɔremfa nkyɛ wɔn da.”

¹⁵Samuel daa hɔ ara kosii sɛ ade kyee. Obuebuee ntamadan hɔ mfɛnsere sɛnea ɔtaa yɛ no. Na osuro sɛ ɔbɛka asɛm a AWURADE ka kyerɛɛ no no akyerɛ Eli.

¹⁶Nanso Eli frɛɛ no se, “Samuel, me ba.” Samuel buae se, “Mini!”

¹⁷Eli bisaa no se, “Asɛm bɛn na AWURADE ka kyerɛɛ wo? Ka biribiara kyerɛ me. Sɛ wode biribiara sie me a, Onyankopɔn ntwe wʼaso.”

¹⁸Enti Samuel kaa biribiara kyerɛɛ Eli a wamfa hwee anhintaw no. Eli ka sɔw so se, “Ɔne AWURADE; ma ɔnyɛ nea eye wɔ nʼani so.”

¹⁹AWURADE kaa Samuel ho wɔ ne nyin mu, na biribiara a Samuel kae no, na ɛyɛ nyansasɛm a ɛboa.

²⁰Nnipa a wɔwɔ Israelman mu nyinaa, efi Dan asase wɔ atifi kosi anafo no, na wonim sɛ wɔahyɛ Samuel AWURADE diyifo.

²¹AWURADE kɔɔ so daa ne ho adi wɔ Silo, na ɔnam nʼasɛm so daa ne ho adi kyerɛɛ Samuel wɔ ntamadan mu hɔ. Na Samuel asɛm baa Israelman mu nyinaa