Read Alladian Matie 1 Bible Online

Matie 1 - Alladian bible

Matie 1

¹Nyàn Zhezü Krisì nɛ́n nancüì hɔ̀n bi, nɛ́n léyi nɛ̀n dú Davidɛ̀n cokomɛ̀n-wrɔn hɩ Davidɛ̀n mumù mán dú Abrahamɛ̀n mɛ̀n mɛ̀n-wrɔn nɔn.

²Abrahamɛ̀n dú Izaakɛ̀n nɛ́n zi; Izaakɛ̀n dú Zhakɔbɛ̀n nɛ́n zi; Zhakɔbɛ̀n dú Zhüda mán nɛ́n muan-ẅì hɔ̀n yɔ zi;

³Zhüda dú Farɛsɛ̀n mán Zara yɔ zi (yɔ muan dú Tamarɛ̀n); Farɛsɛ̀n dú Esrɔmɛ̀n nɛ́n zi; Esrɔmɛ̀n dú Aramɛ̀n nɛ́n zi;

⁴Aramɛ̀n dú Aminadabɛ̀n nɛ́n zi; Aminadabɛ̀n dú Nasɔn nɛ́n zi; Nasɔn dú Salmɔn nɛ́n zi;

⁵Salmɔn dú Boozɛ̀n nɛ́n zi (Rahabɛ̀n dú nɛ́n muan); Boozɛ̀n dú Obɛdɛ̀n nɛ́n zi (Rütɛ̀n dú nɛ́n muan); Obɛdɛ̀n dú Zhese nɛ́n zi;

⁶Zhese dú ɛnnɛ̀ncüì Davidɛ̀n nɛ́n zi. Davidɛ̀n dú Salomɔn nɛ́n zi (nɛ́n muan go dú Uri nɛ́n hi);

⁷Salomɔn dú Roboamɛ̀n nɛ́n zi; Roboamɛ̀n dú Abia nɛ́n zi; Abia dú Asafɛ̀n nɛ́n zi;

⁸Asafɛ̀n dú Zhozafatɛ̀n nɛ́n zi; Zhozafatɛ̀n dú Zhoramɛ̀n nɛ́n zi; Zhoramɛ̀n dú Oziasɛ̀n nɛ́n zi;

⁹Oziasɛ̀n dú Zhoatamɛ̀n nɛ́n zi; Zhoatamɛ̀n dú Ashazɛ̀n nɛ́n zi; Ashazɛ̀n dú Ezèkiasɛ̀n nɛ́n zi;

¹⁰Ezèkiasɛ̀n dú Manase nɛ́n zi; Manase dú Amɔn nɛ́n zi; Amɔn dú Zhoziasɛ̀n nɛ́n zi;

¹¹Zhoziasɛ̀n dú Yekonia mán nɛ́n muan-ẅì hɔ̀n yɔ zi, ɛnvra léyi Izraɛlɛ̀n ẅì hɔ̀n dú *anwɔ̀nẅìemɛ̀n Babilɔnɛ̀n anmàn nɔn.

¹²Ɛnvra zri lɔ mɛ̀n de Yekonia dú Salatiɛlɛ̀n nɛ́n zi; Salatiɛlɛ̀n dú Zorobabɛlɛ̀n nɛ́n zi;

¹³Zorobabɛlɛ̀n dú Abihudɛ̀n nɛ́n zi; Abihudɛ̀n dú Eliakimɛ̀n nɛ́n zi; Eliakimɛ̀n dú Azɔrɛ̀n nɛ́n zi;

¹⁴Azɔrɛ̀n dú Sadɔkɛ̀n nɛ́n zi; Sadɔkɛ̀n dú Akimɛ̀n nɛ́n zi; Akimɛ̀n dú Elihudɛ̀n nɛ́n zi;

¹⁵Elihudɛ̀n dú Eleazarɛ̀n nɛ́n zi; Eleazarɛ̀n dú Matan nɛ́n zi; Matan dú Zhakɔbɛ̀n nɛ́n zi;

¹⁶Zhakɔbɛ̀n dú Zhozɛfɛ̀n nɛ́n zi, Mari nɛ́n cüì, Mari léyi dú Zhezü, Ebɩdie-wrɔn, nɛ́n muan nɔn.

¹⁷Esùgbàn kru ɛvà-anzɔ̀ de ndù, bukru Abrahamɛ̀n vra hàn kɩ cɔ́ Davidɛ̀n vra; zɛtɛn esùgbàn kru ɛvà-anzɔ̀ kɛ́n Davidɛ̀n vra hàn kɩ cɔ́ ɛnvra léyi Izraɛlɛ̀n ẅì hɔ̀n hɔ́n dú anwɔ̀nẅìemɛ̀n Babilɔnɛ̀n anmàn, kɩ esùgbàn kru ɛvà-anzɔ̀ de vru dù, bukru anwɔ̀nẅìemɛ̀n vra lɔ hàn kɩ cɔ́ Ebɩdie-wrɔn bî vra lɔ nɔn.

¹⁸Nyàn ɔmu le ye bî Zhezü Krisì nɔn. Mari, nɛ́n muan, yɛ sɔ́n ɔmùan yɛ tán Zhozɛfɛ̀n; tɛ́n nɛ́n mán nɛ́n cüì mɛhi yɔ vá sɔ́n ebɩ́ kɩ Mari sɩ́ ɛmɛ̀ntɛ̀ Ɛnhɛ́n Prɔnprɔn cüìemɛ̀n.

¹⁹Zhozɛfɛ̀n, Mari nɛ́n cüì dú ɔwrɔn léyi ke bɩ́ Ɔwɔ ankà, kɩ ne ji nɛ̀n teze Mari ɛbán mɛ̀n, ô anwrɔn ke bɩ́ nyriɛn le Mari sî ɛmɛ̀ntɛ̀ ɛntrɛ.

²⁰Nɛ̀n dú ankà tro ndɔ lɔ mɛ̀n, kɩ Ɔwɔ-kùyüre-wrɔn tɔ̀n ci nɛ̀n ndà mɛ̀n kɛ dɔ́ nɛ̀n le: “Zhozɛfɛ̀n, Davidɛ̀n mɛẅi wrɔn, ɛnjansù ke bɩ́ ẅɛn mɛ́n, ke ji le è bɩ́ Mari e hi, ɔmuhi Ɛnhɛ́n Prɔnprɔn cüìemɛ̀n de nɛ̀n sî ɛmɛ̀ntɛ̀ nɔn.

²¹Ne le bî ɛncɔnwrɔn-ẅì tɔ̀n, ɛ̀ wá nɛ̀n ebi Zhezü, ɔmuhi nɛ lɛ mrɛ́n nɛ́n fɛcüè lɔ ɛgbàn mɛ̀n nɛ̀n sɔhɔ́ nɔn.”

²²Eci ndɔ lɔ fɛn hán, ô ankà léyi Ɛẅɛnwrɔn dɔ́ Ɔwɔ-mùanwú-ankà-dɔ́-wrɔn mùan wú nɔn, kɛ̀ sá nmù:

²³“Ɛnnyɔnwrɔn léyi kè sɩ̀ nyrì ɛncɔnwrɔn ankà nɔn ke le sî ɛmɛ̀ntɛ̀ kɩ ke le bî ɛncɔnwrɔn-ẅì tɔ̀n, ye le bi nɛ̀n Emanüɛlɛ̀n.” (N'ɛmɛ̀n kɛ dɔ̀ le “Ɔwɔ mɛhi bɔ́ dù”.)

²⁴Ɛnvra léyi Zhozɛfɛ̀n dú ndà mɛ̀n gbɛ́ ɛvɛ̀ nɔn, nɛ̀n hán eci léyi Ɔwɔ kùyüre-wrɔn wá tán nɛ̀n nɛ̀n hán nɔn, kɩ nɛ̀n bɩ́ Mari nɛ̀n sɩ́ ɛbemɛ̀n.

²⁵Nɛ̀n sɩ̀ cì yi ɛtɛ̀sɛ̀n hàn kɩ cɔ́ ɛnvra léyi Mari bî ɛncɔnwrɔn-ẅì tɔ̀n, hɩ Zhozɛfɛ̀n wá ebi Zhezü nɔn.