Read Alladian Matie 11 Bible Online

Matie 11 - Alladian bible

Matie 11

¹Ɛnvra léyi Zhezü yé n'ɛsɛ̀nkɛn-bɔ̀ ɛvà-anhyrɛ̀ lɔ ankà trɔ nɔn, nɛ̀n cɔhɔ́ nanvrɛn, nɛ̀n hɔ́n anmàn hɔ̀n léyi dú ɔkpɔsɔ lɔ wú nɔn, ô nɛ̀n yé, nɛ̀n dɔ́ yɔ Ɔwɔ ankà.

²Zhan Batisì dú anwɔn-mɛ̀n-wá-wɔn mɛ̀n kɩ yá ɛci hɔ̀n léyi Krisì kɛ hán nɔn. Zhan Batisì wá n'ɛsɛ̀nkɛn-bɔ̀ jan ɔkɔ̀hɔ̀n

³kè yrɛ nɛ̀n le: “È dú ɔwrɔn léyi bɔ́ nyrì le kɛ lɛ và, kàle ke ji le bɔ̀ vrá ɔwrɔn nyàntɛn hán?”

⁴Zhezü mrɛ́n yɔ ɔmùan le: “Nyɛ́n hɔ̀n nyɛ́n dɔ́ Zhan ankà léyi nyɛ yá mán eci léyi nyɛ kàn nɔn:

⁵Anvɛ̀-boyɛ-bɔ̀ kɛ kán ɛyri, ɛsɔ̀nze-bɔ̀ kɛ nán esù, kokove-bɔ̀ kɛ cɔ́ ɔkɔrɛ̀, nukù-sî-bɔ̀ kɛ yá ankà, owú-bɔ̀ kɛ wrɔ vá ɔkɔrɛ-bɔ̀ mɛ̀n, kɩ ɛmian-bɔ̀ kɛ cɔ́ ɛmɛẅi ankà ankrànkràn kɛ yá.

⁶Ɛnbɔrɛbru dú tán ɔwrɔn léyi kè sɩ̀ teze ankàẅì-bùtan léyi nɛ̀n ẅɛn m'ɛwú nɔn.”

⁷Ɛnvra léyi Zhan sɛ̀nkɛn-bɔ̀ lɔ hɔ̀n nɔn, Zhezü bukru kɛ dɔ́ fɛcüè Zhan ankà, kɩ nɛ dɔ̀ le: “Ecitan de nyɛ́n hɔ́n ɛnnùwì ɛnyan-yri nɛ́n? Ɛfi-sè léyi ɛndɔ̀nwrɔ̀n kɛ cüɛ̀n nɛ́n? Hɔ̂a?

⁸Zɛtɛn ecitan de nyɛ́n hɔ́n ɛnyan-yri nɛ́n? Ɔwrɔn tɔ̀n léyi cɔ́ ɛceci ankrànkràn nɛ́n? Tɛ́n anwrɔn hɔ̀n léyi kɛ cɔ́ ɛceci ankrànkràn nɔn dú ɛnnɛ̀ncüì hɔ̀n bemɛ̀n.

⁹Zɛtɛn ecitan cehɛ́n de nyɛ hɔ́n ɛnyan-yri nɛ́n? Ɔwɔ-mùanwú-ankà-dɔ́-wrɔn tɔ̀n hàn? Hɛ̀ɛ̀ mɛ dɔ́ nyɛ̀n, kɩ nɛ̀n vru nɛ̀n vrán Ɔwɔ-mùanwú-ankà-dɔ́-wrɔn tɔ̀n mán.

¹⁰Ɔmuhi Zhan dú ɔwrɔn léyi Owrú Prɔnprɔn kɛ dɔ̀ le: ‘Ɔwɔ dɔ̀ le: Mɛ lɛ hán m'ɔkɔ̀hɔ̀n-wá-wrɔn kè dú mɛ́n ezì, ô kɛ̀ mrɛ́n mɛ́n ɛnlevri.’

¹¹Mɛ dɔ́ nyɛ̀n annànwɔrɛ mɛ̀n le: anwrɔnẅì mɛ̀n lɔ, ɔwrɔn zriɛmɛ́n bàdà mrìmrì kè sèvri kɛ̀ vrán Zhan-Batisì: tɛ́n ɔwrɔn léyi dú ɛcɛ Anhobɩ́ nɛ̀ncüì-dúyri nɔn, sevri vrán nɛ̀n.

¹²Ɛnvra léyi Zhan-Batisì bukru kɛ dɔ́ Ɔwɔ ankà hàn kɩ cɔ́ zɛtɛ̀ lɔ nɔn, Anhobɩ́-Nɛ̀ncüì-dúyri dú ɛjɔ̀kɔmɛ̀n kɩ ɛci-gbàngbàn-hán-bɔ̀ ke ji n'ebɩ́-yri.

¹³Ɔwɔ-mùanwú-ankà-dɔ́-bɔ̀ lɔ fɛn mán Mohizì nyànmàn, dɔ́ Anhobɩ́-Nɛ̀ncüì-dúyri ankà hàn kɩ cɔ́ Zhan vra lɔ.

¹⁴Kɩ ke dú kɛ nye ji nyɛ́n bú m'ankà nyɛ́n tán ankàẅì hô, Zhan dú Eli ndɔ léyi yɛ dɔ́ n'ɛvá-ankà nɔn.

¹⁵Nyɛ́n die nukù anvrɛnvrɛn, ke dú kɛ nyɛ́n ẅɛn nukù!

¹⁶Antɔnwrɔn de me le bɩ mɛ̀n krɔn ɛnyɔncì bɔ̀ lɔ nɛ́n? Yɔ dù yɔ cá ɛẅì hɔ̀n léyi yɛ́ angbàtà-vri ɛntrɛ, kɩ ndɔ hɔ̀n ke di bobo tán yɔ nyran hɔ̀n le:

¹⁷‘Bɔ̀ krɛ́ ɛmràn-bri-cɔ̀ tɔ̀n kètè mɛ̀n bɔ̀ tán nyɛ̀n kɩ nyɛ́n sɩ̀ brì ɛmràn! Bɔ̀ krɛ́ eyú-di-cɔ̀ kɩ nyɛ́n sɩ́ boto hɛ́!’

¹⁸Annànwɔrɛ mɛ̀n lɔ Zhan và, nɛ́n sɩ́ zî ɛci, nɛ́n sɩ́ mi ɛntàn wɔnsɛn, kɩ yɛ dɔ̀ le: ‘Ɛnhɛ́n gbàngbàn tɔ̀n dú nɛ̀n edomɛ̀n!’

¹⁹Ɔwrɔnẅì Ẅì nvà, ne zî ɛci, ne mi ɛntàn kɩ yɛ dɔ̀ le: ‘Nyɛ́n nyan ɔwrɔn ndɔ léyi, ɛci-zî mán ɛntàn-mí-ankà kɩ ke tro, nɛ̀n dú anmàn-wɔɛ̀n-yrɛ-bɔ̀ mán anwrɔn hɔ̀n léyi yɛ krɛ́ ɛci-gbàngbàn-hán-bɔ̀ nɔn yɔ nyran hɔ̀n!’ Tɛ́n ankà-nyrì léyi dú Ɔwɔ mɛ̀n nɔn ke yé n'edomɛ̀n ɛnyrɔnnan ci-hán mɛ̀n.”

²⁰Zɛtɛn Zhezü bukru ke fe anmàn hɔ̀n léyi, nanvrɛn lɔ, nɛ̀n hán anvɛmɛ̀n-frɛ́n-ci bobrebe, ɔmuhi anmàn hɔ̀n lɔ bɔ̀, ke sɩ́ crɔn y'eci-hán-ci nɔn. Nɛ dɔ̀ le:

²¹“Muzhie dú vɛ tɛn, Korazɛn! Muzhie dú vɛ tɛn, Bɛtsahida! Ɔmuhi anvɛmɛ̀n-frɛ́n-ci hɔ̀n léyi yɛ hán nye yri nɔn, ke dú kɛ yɛ hán yɔ, Tirɛ̀n mán Sidɔn anmàn hô, ɛnvra sheshemɛ̀n de y'anmàn-bɔ̀ kɛ lɛ cɔ́ ɛceci gbrɔ̀, kɛ wá ɛnwɔ̀n edomɛ̀n, ô kè yé le, yɔ ji yɔ crɔn y'eci-hán-ci.

²²Hɩ le kruhú de mɛ dɔ́ nyɛ̀n le, ɛmrɛ̀nci bì lɔ, y'ɛgbàn-wɔɛ̀n-dì lɔ kɛ lɛ sɔ́ vrán Tirɛ̀n mán Sidɔn tɛn lɔ.

²³Kɩ vɛ́n, Kapɛrnahümɛ̀n, e tro le e le sɩ́ v'edomɛ̀n ɛwú hàn kɩ ɛ̀ cɔ́ anhobɩ́ hɛ́? Ye le sɩ́ mɛ́n ɛnhi hàn kɩ ɛ lɛ cɔ́ owú-bɔ̀ anmàn. Ɔmuhi anvɛmɛ̀n-frɛ́n-ci hɔ̀n léyi yɛ hán v'eyri nɔn, ke dú kɛ yɛ hán yɔ Sodɔmɛ̀n anmàn hô, anmàn ndɔ lɔ ke le vru kè dú ɛnyɔncì lɔ.

²⁴Hɩ le kruhú de, mɛ dɔ́ nyɛ̀n le, ɛmrɛ̀nci bì lɔ, v'ɛgbàn-wɔɛ̀n-dì kɛ lɛ sɔ́ vrán Sodɔmɛ̀n tɛn lɔ.”

²⁵Hɩ vra lɔ, Zhezü kɛ dɔ̀ le: “Ô Dade, anhobɩ́ mán ɛnhibù Ẅɛnwrɔn, mɛ tán mɛ́n ɔkùɛn ɔmuhi eci léyi ɛ̀ bán ankà-nyri-bɔ̀ mán ɛnkruemɛ̀n-ẅɛn-bɔ̀ nɔn, e bɩ è yé ɛẅì hɔ̀n.

²⁶Hɛ̀ɛ̀, Dade, ɔmu lɔ de ndù nɔn, ɔmuhi nzrɔ tán mɛ́n le, kè dú ɔmu lɔ nɔn.

²⁷Dade wá mɛ̀n eci lɔ fɛn antamɛ̀n. Ɔwrɔn zriɛmɛ́n ke sɩ̀ nyri Ɛnẅì lɔ ke dú kɛ kè sɩ̀ dù Ɛnẅì-nɛ́n-zi, kɩ ɔwrɔn zriɛmɛ́n ke sɩ̀ nyri Ɛnẅì-nɛ́n-zi ke dú kɛ kè sɩ̀ dù Ɛnẅì lɔ mán anwrɔn hɔ̀n léyi Ɛnẅì lɔ ke ji kɛ̀ tán kè nyrì nɔn.

²⁸Nyɛ́n và cɔ̀ mɛ̀n, nyɛ́n léyi eci srɔnsrɔn ẅɛ̀n dùkà dú nyɛ̀n edomɛ̀n kɩ mɛ lɛ tán nyɛ̀n ɔwrɔncüe.

²⁹Nyɛ́n bɩ́ m'ejüedì gbànkàn lɔ, ô nyɛ́n teze mɛ̀n, mɛ̀n yé nyɛ̀n ankà, ɔmuhi mɛ́n wɔ̀ kɩ mɛ́n dú ɛnhyɔ̀bɔ-wrɔn nɔn, kɩ nyɛ lɛ cɔ́ ɛwrɔncüe léyi dú nyɛ́n dùku nyɛ tɛn nɔn.

³⁰Ɛgbànkàn léyi mɛ lɛ tán nyɛ̀n nɔn, kè sɩ̀ sɔ̀a, kɩ ɛnlowrú léyi mɛ lɛ wá nyɛ̀n antamɛ̀n nɔn, wore.”