Read Alladian Matie 12 Bible Online

Matie 12 - Alladian bible

Matie 12

¹Ɛnvra jan vacì, Zhezü kɛ vɔ́n ci dùdú kɛ̀tɛ̀ hɔ̀n mɛ̀n ɛnyànmán-bì lɔ. N'ɛsɛ̀nkɛn-bɔ̀ ɔmùanwù kɛ ẅɛ̀n; yɔ bukru yɔ vɔyan dùdú lɔ kɩ yɔ rá n'ɛẅì lɔ.

²Ɛnvra léyi Ɔwɔ-nyànmàn-sùva-wá-bɔ̀ kán eci ndɔ lɔ nɔn, yɔ dɔ́ Zhezü le: “Ɛ̀ nyan v'ɛsɛ̀nkɛn-bɔ̀ kɛ hán eci léyi bɔ̀ ɛnyànmàn ke sɩ́ tán ɛnyànmán-bì vra lɔ nɔn.”

³Zhezü mrɛ́n yɔ ɔmùan le: “Nyɛ́n sɩ̀ krɛ̀ owrú léyi ye merɛ́n yɛ dɔ́ Davidɛ̀n ankà ɛnbì tɔ̀n léyi nɛ́n mán n'ɛsɛ̀nkɛn-bɔ̀ mɛhi ɔmùanwù kɛ ẅɛn yɔ nɛ́n?

⁴Nɛ̀n bru Ɔwɔ-wɔn lɔ mɛ̀n kɩ nɛ́n mán n'anwrɔn hɔ̀n mɛhi yɔ rá abùtùkumɛ́n hɔ̀n léyi ye ce Ɔwɔ nɔn; ɛnyànmàn kè sɩ̀ tán yɔ ɛkɔrɛ̀levri yɔ rá abùtùkumɛ́n ndɔ lɔ: bɔ́ ɛnyànmàn lɔ kɛ tán ɛcice-bɔ̀ zri kɩ ɛkɔrɛ̀levri kɛ̀ rá.

⁵Kàle nyɛ́n sɩ̀ krɛ̀ Mohizì nyànmàn lɔ mɛ̀n le, ɛnyànmán-bì lɔ, ɛcice-bɔ̀ hɔ̀n léyi ɔkɔ̀hɔ̀n-hán kɛ́n Ɔwɔ-cice-wɔn lɔ mɛ̀n nɔn, ke sɩ̀ ẅɛn ɛnyànmán-bì nyànmàn lɔ kɛ hɛ́n, kɩ ndɔ lɔ ke sɩ̀ di yɔ ɛgbàn mɛ̀n hàn?

⁶Tɛ́n, mɛ dɔ́ nyɛ̀n, ɛnu lɔ ndù vrán Ɔwɔ-cice-wɔn lɔ!

⁷Ke dú kɛ nyɛ́n nyri annànwɔrɛ mɛ̀n, Owrú Prɔnprɔn ankà-dɔ̀ ndɔ lɔ n'ɛmɛ̀n le: ‘Me ji ɛcüɛ̀n, tɛ́n kè sɩ̀ dù annɔ̀n cice’, kɩ ke sɩ̀ zrɔ tán le nyɛ́n wri anwrɔn hɔ̀n léyi kè sɩ̀ hàn eci zriɛmɛ́n nɔn.

⁸Ɔmuhi ɔwrɔnẅì Ẅì dú ɛnyànmán-bì nɛ́n Zi nɔn.”

⁹Zhezü cɔhɔ́ ɛyri léyi nɛ́n dù nɔn, kɩ hɔ́n y'Ɔwɔ-sɛ́n-wɔn hɔ̀n lɔ ɔtɔ̀n mɛ̀n.

¹⁰Ɔwrɔn tɔ̀n dú nanvrɛn lɔ ɛkɔrɛ̀ nwù. Ɔwɔ-nyànmàn-sùva-wá-bɔ̀ ke ji ke di Zhezü ankà mɛ̀n; hɩ le kruhú de yɔ yrɛ nɛ̀n le: “Bɔ́ ɛnyànmàn lɔ kɛ tán ɛkɔrɛ̀levri yɛ kɔrɛ ɔwrɔn ɛnyànmán-bì lɔa?”

¹¹Zhezü mrɛ́n yɔ ɔmùan le: “Ke dú kɛ ny'ɛmɛ̀n lɔ ɔwrɔn tɔ̀n ẅɛn kɔ̀kɔ̀sɛ̀ zri, kɩ kɔ̀kɔ̀sɛ̀ ndɔ lɔ ke bru ɛnnànmàn vrɛ́n tɔ̀n mɛ̀n ɛnyànmán-bì lɔ, nɛ́n sɩ̀ hɔ̀n nɛ́n mrɛ́n kɔ̀kɔ̀sɛ̀ lɔ ɛnnànmàn mɛ̀n nɛ̀n sɔhɔ́ nanvrɛn lɔa?

¹²Kɩ ɔwrɔnẅì zrɔ vrán kɔ̀kɔ̀sɛ̀! Ke dú ɔmu lɔ hô, bɔ́ ɛnyànmàn lɔ kɛ wá tán yɛ hán ɔwrɔn anvrɛn ɛnyànmán-bì lɔ.”

¹³Zɛtɛn Zhezü kɛ dɔ́ ɔwrɔn léyi ɛkɔrɛ̀ nwù nɔn le: “Sɩ̀ v'ɛkɔrɛ̀ lɔ ezì.” Nɛ̀n sɩ́ ɛkɔrɛ̀ ezì kɩ ɛkɔrɛ̀ lɔ wore.

¹⁴Ɔwɔ-nyànmàn-sùva-wá-bɔ̀ srɔ ɛntrɛ kɩ hɔ́n borɛkru, ô ke ji ɔmu le yɔ lɛ hán ô yɔ wri Zhezü nɔn.

¹⁵Ɛnvra léyi Zhezü yá le ye ji nɛ̀n ewri-yri nɔn, nɛ́n cɔhɔ́ ɛyri ndɔ lɔ kɩ anwrɔn bobrebe dú nɛ̀n ɛmɛẅi. Nɛ kɔrɛ ɛnlɔẅiɛ-bɔ̀ lɔ fɛn,

¹⁶tɛ́n nɛ wá tán yɔ ɛshishiemɛ̀n le ye bɩ́ dɔ́ ɔwrɔn léyi dú nɛ̀n nɔn yi ankà.

¹⁷Ɔmu lɔ de ndù nɔn, ô Ɔwɔ-mùanwú-ankà-dɔ́-wrɔn Ezàhi ankà léyi dɔ̀ nɔn kɛ̀ sá nmù:

¹⁸“Ɔwɔ dɔ̀ le: nyàn m'eci-bɩtan-wrɔn léyi mɛ̀n mrɛ́n mɛ́n bɩ nɔn, m'ɛcüɛn-wrɔn léyi mɛ́n pɔ̀püɛ̀ lɔ fɛn dú ɛwú nɔn. Mɛ lɛ hán m'Ɛnhɛ́n kè dú nɛ̀n ɛwú kɩ nɛ lɛ dɔ́ ɛnhi wú anmàn hɔ̀n m'ɛnyrɔnnan ankà.

¹⁹Nɛ́n mán ɔwrɔn zriɛmɛ́n mɛhi yɔ sɩ̀ wrɔ́n ecüì kɩ nɛ́n sɩ̀ di bobo, ye sɩ̀ yá nɛ̀n ɔmùan nɛ̀n dɔ́ anwrɔn ankà *andrɛnmɔɛn mɛ̀n.

²⁰Nɛ́n sɩ̀ vɔ́n ɛfi-sè léyi gɔ́ kùrɛ̀n nɔn kɩ nɛ́n sɩ̀ zɛ́n kɛniɛn léyi n'ɛyri-kàn kè sɩ̀ ẅɛ̀n ecüì nɔn. Nɛ lɛ hán ɔmu lɔ hàn kɩ ɛnyrɔnnan kɛ lɛ kɔ̀nkà;

²¹kɩ ɛnhibù wú anmàn hɔ̀n lɔ fɛn ke le bɩ́ y'esɛ́ kɛ̀ hɛ́n nɛ̀n ɛwúɛ.”

²²Zɛtɛn ye bɩ́ ɔwrɔn tɔ̀n léyi anvɛ̀ bɔyɛ hɩ ke sɩ́ dɔ́ ankà mán, yɛ vá sɩ́ Zhezü, ɔmuhi ɛnhɛ́n gbàngbàn tɔ̀n dú nɛ̀n edòmɛ̀n nɔn. Zhezü kɔrɛ ɔwrɔn ndɔ lɔ, hán tán kɩ nɛ̀n bukru nɛ dɔ́ ankà kɩ nɛ kán ɛyri.

²³Fɛcüè hɔ̀n lɔ fɛn dú anvɛmɛ̀n-frɛ́n-mɛ̀n kɩ yɔ dɔ̀ le: “Ne le dú Davidɛ̀n ẅì hɛ̀?”

²⁴Tɛ́n ɛnvra léyi Ɔwɔ-nyànmàn-sùva-wá-bɔ̀ yá yɔ ɔmùan nɔn, yɔ dɔ̀ le: “Ɔwrɔn ndɔ lɔ kɛ wrɔ́ anhɛ́n gbàngbàn ɔmuhi ‘Bɛlzebülɛ̀n’ léyi dú y'ɔwrɔn cüìcüì nɔn kɛ tán nɛ̀n ɛkɔrɛ̀srɔn!”

²⁵Tɛ́n Zhezü nyri y'ankà-tro kɩ kɛ dɔ́ yɔ zɛtɛn le: “Ɛnhi wú nɛ̀ncüì anmàn totɔtɔ̀n léyi y'anmàn-bɔ̀, kɛ kɔ́n y'edomɛ̀n anhà nɔn, ɔtrɔmɛ̀n lɔ, yɔ jrɛ́ y'edomɛ̀n. Anmàn totɔtɔ̀n mán ɛmɛ̀n totɔtɔ̀n, léyi ecüìwrɔn ke dú yɔ ɛmɛ̀n nɔn, ɔmùan-krɔn ke sɩ̀ dú yɔ, yɔ yɛ́ rɔ́.

²⁶Ke dú kɛ Anwa-wrɔn cüìcüì kɛ wrɔ́ eci léyi dú Anwa-wrɔn cüìcüì tɛn nɔn, nɛ̀n dú n'edomɛ̀n annan-kran mɛ̀n; anhɔntan de n'ɛnnɛ̀ncüì-duyri ke le vru ke dù rɔ́ nɛ́n?

²⁷Nyɛ dɔ̀ le mɛ wrɔ́ anhɛ́n gbàngbàn ɔmuhi Bɛlzebülɛ̀n kɛ tán mɛ̀n ɛkɔrɛ̀srɔn; zɛtɛn, antɔnwrɔn de kɛ tán anwrɔn hɔ̀n léyi nyɛ kɛ́n ɛsɛ̀n nɔn, ɛkɔrɛ̀srɔn kɛ wrɔ́ anhɛ́n gbàngbàn hɔ̀n lɔ nɛ́n? Anwrɔn hɔ̀n léyi nyɛ kɛ́n ɛsɛ̀n nɔn yɔ dùku yɔ nyri ɔmu le ny'ankà ke sɩ̀ zrɔa!

²⁸Annànwɔrɛ mɛ̀n lɔ, Ɔwɔ Hɛ́n mɛ̀n de mɛ wrɔ́ anhɛ́n gbàngbàn hɔ̀n lɔ nɔn, hɩ mɛ̀n kɛ dɔ̀ le, Anhobɩ́-Nɛ̀ncüì-dúyri gɔ́ vá dú bɔ̀ ɛmɛ̀n.

²⁹Ɔwrɔn zriɛmɛ́n ke sɩ́ bru ecüì-wrɔn ɛbemɛ̀n ô kè bɩ́ n'ɛci hɔ̀n lɔ, ke dú kɛ nɛ̀n sɩ̀ kɔra ecüì-wrɔn ndɔ lɔ. Tɛ́n, ɛnvra léyi nɛ̀n kɔra yi trɔ nɔn, ne le bɩ́ ɛci hɔ̀n lɔ fɛn léyi dú ecüì-wrɔn lɔ wɔn lɔ mɛ̀n.

³⁰Ɔwrɔn léyi nɛ́n mɛhi bɔ́ sɩ̀ dùɛ nɔn, nɛ̀n dú m'egbri-wrɔn; kɩ ɔwrɔn léyi ke sɩ́ wá mɛ̀n ɛkɔrɛ̀ bɔ́ borɛkru nɔn, ke bonyì.

³¹Hɩ le kruhú de mɛ dɔ́ nyɛ̀n le: anwrɔnẅì kɛ lɛ cɔ́ ɛgbàn-bɩ-ce, ɛwɔra hɔ́n léyi yɔ dɔ́ ku Ɔwɔ ɛwú nɔn hɩ wú, tɛ́n ɔwrɔn léyi kɛ wora Ɛnhɛ́n Prɔnprɔn nɔn, nɛ́n sɩ̀ cɔ́ ɛgbàn-bɩ-ce.

³²Ɔwrɔn léyi kɛ dɔ́ ankà gbàngbàn tɔ̀n ku ɔwrɔnẅì Ẅì wú nɔn, nɛ lɛ cɔ́ ɛgbàn-bɩ-ce, tɛ́n ɔwrɔn léyi kɛ dɔ́ ankà gbàngbàn ku Ɛnhɛ́n Prɔnprɔn ɛwú nɔn, nɛ́n sɩ̀ cɔ́ ɛgbàn-bɩ-ce ɛnvra ndɔ lɔ mɛ̀n mán ɛnvra léyi dú ezì kɛ và nɔn mɛ̀n.”

³³“Ke dú kɛ nye ji nyɛ́n cɔ́ antɛ̀-ẅì ankrànkràn hô, ke ji le nyɛ́n ẅɛn ɛtɛ̀ ankrànkràn; ke dú kɛ nyɛ ẅɛn ɛtɛ̀ gbàngbàn hô, nyɛ lɛ cɔ́ antɛ̀-ẅì gbàngbàn. Ɔmuhi ye nyri ɛtɛ̀, n'ɛẅì léyi ne shì nɔn kruhú.

³⁴Ɛnlɛbrì mɛ̀n bɔ̀! Anhɔntan de nyɛ lɛ hán nyɛ́n dɔ́ ankà ankrànkràn tɛ́n nyɛ́n dú anwrɔn gbàngbàn hɔ̀n nɛ́n? Ɔmuhi ɔmùan kɛ dɔ́ ankà hɔ̀n léyi nhyì dú ɛnbɔrɛ mɛ̀n nɔn.

³⁵Ɔwrɔn ankrànkràn kɛ cɔ́ ɛci ankrànkràn n'ɛnnɛ̀ncüì-di-ci ankrànkràn lɔ mɛ̀n; ɔwrɔn gbàngbàn kɛ cɔ́ ɛci gbàngbàn n'ɛnnɛ̀ncüì-di-ci gbàngbàn hɔ̀n lɔ mɛ̀n.

³⁶Mɛ dɔ́ nyɛ̀n le: ɛmrɛ̀nci bì lɔ, anwrɔn ke le di ɔwɔɛ̀n ankà gbàngbàn hɔ̀n léyi yɔ dɔ̀ nɔn hɩ wú.

³⁷Ɔmuhi v'ankà-dɔ̀ lɔ wú de yɛ lɛ ci mɛ́n ɛmrɛ̀n nɔn, ô yɛ dɛ́ ɛnyràn mán nwù yɛ tán mɛ́n nɔn.”

³⁸Zɛtɛn ɛnyànmàn-gbànvri-ankà-yé-bɔ̀ mán Ɔwɔ-nyànmàn-sùva-wá-bɔ̀ jan kɛ dɔ́ Zhezü le: “Ankà-yé-wrɔn, bɔ́ ji ɛ̀ hán anvɛmɛ̀n-frɛ́n-ci tɔ̀n ɛ̀ tán bɔ̀, bɔ̀ kàn.”

³⁹Zhezü mrɛ́n yɔ ɔmùan le: “Ɛnvra ndɔ lɔ mɛ̀n bɔ̀ léyi dú anwrɔn gbàngbàn mán anmùan-anhyrɛ̀-di-bɔ̀ Ɔwɔ tɛ̀sɛ̀n nɔn, ke ji anvɛmɛ̀n-frɛ́n-ci tɔ̀n kɛ̀ kàn, tɛ́n anvɛmɛ̀n-frɛ́n-ci zriɛmɛ́n ke sɩ̀ hán tán yɔ, ke dú kɛ kè sɩ̀ dù Ɔwɔ-mùanwú-ankà-dɔ́-wrɔn Zhonasɛ̀n anvɛmɛ̀n-frɛ́n-ci lɔ kɩ.

⁴⁰Ɔmuhi, ɔmu zri léyi Zhonasɛ̀n di ɛbi anhɔ̀n, ɛnnyran mán ɛcɛ̀n, ɛcàn vri lɔ mɛ̀ntɛ̀ mɛ̀n nɔn, ɔmu zri lɔ de ɔwrɔnẅì Ẅì ke le di ɛbi anhɔ̀n, ɛnnyran mán ɛcɛ̀n ɛnhibɩ́ nɔn.

⁴¹Ɛmrɛ̀nci bì lɔ, Ninivɛ̀n anmàn-bɔ̀ ke le tú nyɔn ɛnvra ndɔ lɔ mɛ̀n bɔ̀ zìwú kɩ kɛ lɛ dɔ́ ankà kú yɔ ɛwú, ɔmuhi Ninivɛ̀n anmàn-bɔ̀ crɔn yɔ eci-hán-ci ɛnvra léyi yɔ yá Zhonasɛ̀n Wɔ ankà-dɔ̀ lɔ nɔn. Kɩ ɛnu lɔ ɔwrɔn dù vrán Zhonasɛ̀n!

⁴²Ɛmrɛ̀nci bì lɔ, ecüe mɛẅi nɛ̀ncüì-hi ke le tú nyɔn ɛnvra ndɔ lɔ mɛ̀n bɔ̀ zìwú kɩ kɛ lɛ dɔ́ ankà kú yɔ ɛwú, ɔmuhi nɛ̀n dú esù she hi-wú anmàn nɛ̀n vá Salomɔn ankà-nyri-ankà nukù-die-yri nɔn. Kɩ ɛnu lɔ ɔwrɔn dù vrán Salomɔn!”

⁴³“Ɛnvra léyi ɛnhɛ́n gbàngbàn tɔ̀n ke dú ɔwrɔn tɔ̀n mɛ̀n kɛ srɔ ɛntrɛ nɔn, ne dú ɛhɔ́n mɛ̀n mán ɛvá mɛ̀n, ɛyri tramɛ̀n, ne ji ɛyri ô nɛ̀n wrɔncüe. Ɔmuhi nɛ́n sɩ́ cɔ́ ɛyri nɔn,

⁴⁴nɛ dɔ́ n'edomɛ̀n le: ‘Mɛ lɛ vru ɛmɛẅi mɛ̀n hɔ́n m'ɔwɔn léyi mɛ́n teze nɔn mɛ̀n.’ Ne vru ɛmɛẅi kɩ nɛ cɔ́ ɔwɔn lɔ dɛ́ oworo, yɛ taka nɛ̀n ɛmɛ̀n, yɛ bɔsɔ nɛ̀n anvrɛnvrɛn.

⁴⁵Zɛtɛn nɛ hɔ̀n ne bɩ́ anhɛ́n gbàngbàn hɔ̀n ɔbɔɛ̀n léyi krɛ́ ɛgbàn vrán nɛ̀n nɔn; yɔ vru ɛmɛẅi yɔ và kɩ yɔ yɛ́ ɔwɔn lɔ mɛ̀n. Ɔtrɔmɛ̀n lɔ, ɔwrɔn ndɔ lɔ wúvà kɛ sán krɛ́ ɛgbàn vrán ɛnkrubɔmɛ̀n lɔ. Kɩ ɔmu lɔ de ke le dú tán anwrɔn gbàngbàn hɔ̀n léyi dú ɛnvra ndɔ lɔ mɛ̀n bɔ̀ nɔn.”

⁴⁶Zhezü vru kɛ dɔ́ fɛcüè ankà, ɛnvra léyi nɛ́n muan mán nɛ́n muan-ẅì hɔ̀n nvà nɔn. Yɔ nyɔn ɛntrɛ kɩ yɔ ji yɔ dɔ́ nɛ̀n ankà.

⁴⁷Ɔwrɔn tɔ̀n kɛ dɔ́ Zhezü le: “E die nukùɛ, ɔmuan mán ɔmuan-ẅì hɔ̀n nyɔn ɛntrɛ, kɩ yɔ ji yɔ dɔ́ mɛ́n ankà.”

⁴⁸Zhezü mrɛ́n ɔwrɔn ndɔ lɔ ɔmùan le: “Antɔnwrɔn de dú nmàn mán nmàn-ẅì hɔ̀n nɛ́n?”

⁴⁹Zɛtɛn nɛ̀n kɛ́n n'ɛsɛ̀nkɛn-bɔ̀ ɛkɔrɛ̀ kɩ nɛ dɔ̀ le: “Nyɛ kàn: nmàn mán nmàn-ẅì hɔ̀n dú ɛnu lɔ.

⁵⁰Ɔmuhi ɔwrɔn léyi kɛ hán eci léyi Dade léyi dú anhobɩ́ ke ji nɔn, dú nmàn cɔnwrɔn-ẅì, nmàn nyɔnwrɔn-ẅì mán nmàn.”