Read Alladian Matie 14 Bible Online

Matie 14 - Alladian bible

Matie 14

¹Hɩ vra lɔ, Herɔdɛ̀n léyi dú Galile govràn nɔn, yá yɛ dɔ́ Zhezü ankà.

²Herɔdɛ̀n kɛ dɔ́ n'ɛci-bɩtan-bɔ̀ le: “Ɔwrɔn lɔ Zhan Batisì, nɛ̀n dú owúbɔ̀ mɛ̀n nɛ̀n vá ɔkɔrɛ-bɔ̀ mɛ̀n! Nyàn eci le kruhú nɛ̀n ẅɛ̀n ɛkɔrɛ̀srɔn nɛ hán anvɛmɛ̀n-frɛ́n-ci nɔn.”

³Annànwɔrɛ mɛ̀n lɔ, Herɔdɛ̀n de wá tán yɛ ẅɛn Zhan, nɛ̀n hán yɔ yɛ kora Zhan ye di anwɔn-mɛ̀n-wá-wɔn-mɛ̀n. Herodiadɛ̀n léyi dú nɛ́n muan-ẅì Filipɛ̀n hi nɔn kruhú de Herɔdɛ̀n hán eci ndɔ lɔ nɔn.

⁴Ɔmuhi Zhan kɛ dɔ́ Herɔdɛ̀n le: “Ke sɩ̀ zrɔ tán le è bɩ́ Herodiadɛ̀n è yrì!”

⁵Herɔdɛ̀n ke ji Zhan ewri-yri, tɛ́n ne sú Zhüifɛ̀n-bɔ̀ fɛcüè, ɔmuhi yɔ krɛ́ Zhan Ɔwɔ-mùanwú-ankà-dɔ́-wrɔn tɔ̀n nɔn.

⁶Ɛnbì tɔ̀n, Herɔdɛ̀n kɛ koran n'ebî-vra-koran, Herodiadɛ̀n nyɔnwrɔn-ẅì brí ɛmràn anwrɔn hɔ̀n léyi ye bi ɔkoran mɛ̀n nɔn zìwú. N'ɛmràn-brì lɔ zeze zrɔ Herɔdɛ̀n

⁷kɩ wá ɔmùan le nɛ lɛ tán ɛnnyɔnwrɔn-ẅì lɔ eci lɔ fɛn léyi yi kɛ lɛ sán nɔn.

⁸N'ɔmùan ankà-dɔ̀ lɔ wú, Herodiadɛ̀n nyɔnwrɔn-ẅì kɛ dɔ́ Herɔdɛ̀n le: “Ɛ̀ tán mɛ̀n ɛnu lɔ Zhan Batisì kru kpokpo trɛtrɛ mɛ̀n!”

⁹Ɛnnɛ̀ncüì lɔ dú obòto mɛ̀n; tɛ́n ɔmuhi nɛ̀n wá ɔmùan anwrɔn zìwú nɔn, nɛ̀n wá tán yɛ và sɩ́ ɛnnyɔnwrɔn-ẅì lɔ eci léyi nɛ̀n wá ɔmùan nɔn.

¹⁰Herɔdɛ̀n wá ɔwrɔn tɔ̀n ɔkɔ̀hɔ̀n anwɔn-mɛ̀n-wá-wɔn-mɛ̀n ke wí Zhan ɛnkru.

¹¹Ye sɩ́ Zhan Batisì kru lɔ kpokpo trɛtrɛ mɛ̀n kɩ yɛ tán sùgbán nyɔnwrɔn-ẅì lɔ hɔ́n sɩ́ nɛ́n muan.

¹²Zhan sɛ̀nkɛn-bɔ̀ vá bɩ́ Zhan dùwrú lɔ hɔ́n wá ezhe-nànmàn mɛ̀n; Zɛtɛn yɔ hɔ̀n yɔ dɔ́ Zhezü ankà léyi wɔɛ̀n nɔn.

¹³Ɛnvra léyi Zhezü yá Zhan Batisì ankà lɔ nɔn, nɛ̀n cɔhɔ́ ɛyri léyi nɛ̀n dù nɔn, nɛ̀n bru anhàka tɔ̀n mɛ̀n, ô nɛ́n zri nɛ̀n hɔ́n ɛyri tramɛ̀n. Tɛ́n fɛcüè hɔ̀n ncɔ́ nyrì; yɔ dú anmàn yɔ srɔ kɩ yɔ nán esù ɛnshi mùan kɛ́n Zhezü ɛsɛ̀n.

¹⁴Ɛnvra léyi Zhezü dú anhàka mɛ̀n kakɛ nɔn, nɛ̀n kán fɛcüè vri tɔ̀n; ɛnhyɔ̀bɔ̀ yɩ́ n'ɛnbɔrɛ lɔ mɛ̀n anwrɔn ndɔ hɔ̀n lɔ kruhú kɩ nɛ̀n bukru nɛ kɔrɛ y'ɛnlɔẅiɛ-bɔ̀.

¹⁵Ɛnvra léyi ɔwɔɛmɛ̀n ncɔ́ nɔn, Zhezü sɛ̀nkɛn-bɔ̀ sɔnba nɛ̀n ɛtɛ̀sɛ̀n kɩ kɛ dɔ̀ le: “Ɛnvra bru ɛmɛ̀n, kɩ ɛnu lɔ dú ɛyri tramɛ̀n. Ɛ̀ hán fɛcüè lɔ kɛ̀ hɔ́n anmàn, ô kɛ̀ wɔ́ ɛci-zî-ci.”

¹⁶Zhezü mrɛ́n yɔ ɔmùan le: “Kè sɩ̀ zrɔ tán le ye teze yɔ, yɔ hɔ̀n; nyɛ́n dùku nyɛ́n tán yɔ ɛci yɔ zî!”

¹⁷Tɛ́n yɔ dɔ́ nɛ̀n le: “Abùtùkumɛ́n ɛnrì mán ɛcàn anhyrɛ̀ kɩ bɔ̀ ẅɛn ɛnu lɔ.”

¹⁸Zhezü kɛ dɔ́ yɔ le: “Nyɛ́n bɩ́ abùtùkumɛ́n ɛnrì mán ɛcàn anhyrɛ̀ lɔ nyɛ́n và sɩ́ mɛ̀n.”

¹⁹Zɛtɛn, Zhezü wá tán fɛcüè lɔ kɛ yɛ́ ɛfi wú; kɩ nɛ̀n bɩ́ abùtùkumɛ́n ɛnrì mán ɛcàn anhyrɛ̀ lɔ, nɛ̀n sɩ́ anvɛ̀ ɛwú kɩ nɛ̀n tán Ɔwɔ ɔkùɛn. Nɛ̀n voyan abùtùkumɛ́n lɔ kɩ nɛ̀n tán n'ɛsɛ̀nkɛn-bɔ̀ dɛ́ fɛcüè lɔ.

²⁰Anwrɔn lɔ fɛn zî ɛci kɩ ɛmɛ̀ntɛ̀ yɩ́ yɔ. Zhezü sɛ̀nkɛn-bɔ̀ bi ɛci léyi wɔrɔ nɔn ankɛ́ ɛvà-anhyrɛ̀.

²¹Anwrɔn hɔ̀n léyi zî ɛci nɔn, yɔ dú anwrɔn tɛ̀bru-kru-ɛnrì, ye sɩ̀ krɛ̀ wúyɔ̀ mán ɛẅì hɔ̀n.

²²Ɛnvra zri léyi Zhezü tán anwrɔn ɛci zî trɔ nɔn, nɛ̀n hán n'ɛsɛ̀nkɛn-bɔ̀ ku anhàka mɛ̀n ô kɛ̀ vɔ́n ɛnshi nɛnbà cɛ wú kɛ̀ hɔ̀n kɛ̀ vrá nɛ̀n ɛnshi mɛẅi, nɛ tɛn, nɛ lɛ hán fɛcüè lɔ ke vru ɛmɛẅi kɛ̀ hɔ́n y'edúyri.

²³Ɛnvra léyi nɛ̀n hán fɛcüè lɔ hɔ̀n nɔn, Zhezü hɔ́n ɛnkpò cɛ tɔ̀n wú kɛ sɛ́n Ɔwɔ. Ɛnvra léyi ɛnnyran gɔ̀n nɔn, Zhezü zri dú ɛnkpò cɛ lɔ wú;

²⁴Anhàka lɔ dú esù she enhi tɛ̀sɛ̀n, ecüe-afù ke gorɛ anhàka lɔ, ɔmuhi ɛndɔ̀nwrɔ̀n crɛ ezì kɛ́n nɛ̀n nɔn.

²⁵Ɛnnyran gɔ̀n bru ɛmɛ̀n, kɩ Zhezü kɛ nán esù ɛnshi wú wrɔ́ n'ɛsɛ̀nkɛn-bɔ̀ lɔ hɔ̀n.

²⁶Tɛ́n ɛnvra léyi yɔ kán nɛ̀n, nɛ nán esù ɛnshi wú nɔn, yɔ dú gbɔ̀gbɔ̀mɛ̀n kɩ yɔ dɔ̀ le: “Ezhe tɔ̀n de kɛ và nɔn!” Kɩ yɔ di ɛnjansú bobo.

²⁷Tɛ́n ɛnvra zri lɔ, Zhezü dɔ́ yɔ ankà; nɛ dɔ̀ le: “Nyɛ́n bɩ́ edùyì, mɛ̀n Zhezü, ɛnjansù ke bɩ́ ẅɛn nyɛ̀n!”

²⁸Zɛtɛn Piɛrɛ̀n bɩ́ ankà-dɔ̀ kɩ kɛ dɔ́ nɛ̀n le: “Ɛẅɛnwrɔn, ke dú kɛ vɛ́n dùku hô, ɛ̀ wá tán mɛ̀n, mɛ̀n nán esù ɛnshi wú mɛ̀n và cɔ́ mɛ́n.”

²⁹Zhezü mrɛ́n ɔmùan le: “Và!” Piɛrɛ̀n dú anhàka mɛ̀n kakɛ kɩ bukru kɛ nán esù ɛnshi wú wrɔ́ Zhezü hɔ̀n.

³⁰Tɛ́n ɛnvra léyi nɛ́n kàn le ɛndɔ̀nwrɔ̀n kɛ ẅɛn ecüì nɔn, ɛnjansù bru nɛ̀n. Nɛ̀n bukru nɛ sɔ́n, kɩ ne di nkù le: “Ɛẅɛnwrɔn, bɩ́ mɛ̀n die!”

³¹Ɛnvra zri lɔ Zhezü trɛ́n ɛkɔrɛ̀, ẅɛn nɛ̀n kɩ kɛ dɔ́ nɛ̀n le: “Nyàn ɔmuhi v'ankàẅì-bùtan lɔ cɛcɛ nɔn! Cɛci kruhú kɛ ɛ wá ɛnbɔrɛ anhyrɛ̀ hà?”

³²Yɔ, anwrɔn anhyrɛ̀ lɔ, yɔ bru anhàka lɔ mɛ̀n kɩ ɛndɔ̀nwrɔ̀n sannyɔn.

³³Zɛtɛn ɛsɛ̀nkɛn-bɔ̀ léyi dú anhàka lɔ mɛ̀n nɔn, shɛ́n Zhezü ezìwú annankruemɛ̀n kɩ kɛ dɔ̀ le: “Annànwɔrɛ mɛ̀n lɔ è dú Ɔwɔ Ẅì!”

³⁴Zhezü mán n'ɛsɛ̀nkɛn-bɔ̀ vɔ́n ɛnshi nɛnbà cɛ wú kakɛ Zhenezarɛtɛ̀n kpɔsɔ wú.

³⁵Nanvrɛn anmàn-bɔ̀ nyri Zhezü kɩ yɔ dɔ́ n'ɛvá-ankà ɔkpɔsɔ lɔ wú, kɩ yɛ vá sɩ́ nɛ̀n ɛnlɔẅiɛ-bɔ̀ lɔ fɛn.

³⁶Yɛ sɛ́n nɛ̀n ô nɛ̀n teze ɛnlɔẅiɛ-bɔ̀ lɔ kɛ̀ tɛ́ n'ɛceci-she lɔ ɛkɔrɛ̀; kɩ ɛnlɔẅiɛ-bɔ̀ lɔ fɛn léyi kɛ tɛ́ nɛ̀n ɛkɔrɛ̀ nɔn kɛ kɔrɛ̀.